Nalunaarutit

<p>2A Borgmesterimit</p>

<p>2B Ataatsimiititanit ataavartunit</p>

2A. Borgmesterimit

Aallaqqaasiullugu nalunaarutigineqarpoq Kommunalbestyrelsip ataatsimiinneranut atatillugu innuttaasunit, "Meeqqat Børn" aaqqissuussaannik, nipaatsumik akerliussutsimik takutitsisoqarmat. Akerliussutsimik takutitsineq Nakkutilliinermut nalunaarusiap kingunerisaanik aaqqissuussaavoq. Akerliussutsimik takutitsisut oqariartuutaat allagaqaataallu tiguneqarput. Ilanngullugu nalunaarutigineqarpoq Meeqqanut Ilaqutaqarnermullu Ingerlatsivik aamma Isumaginninnermut Suliffeqarnermullu Ingerlatsivik nalunaarusiap imaanik aammalu aaqqiissuteqaqqinnissamik pilersaarutip imaanik saqqummiissammata.

• Ulluni 18-23. maaji Dansk Industrimit isumasioqatigiinnermi peqataanissamut atatillugu, borgmesteri pisortaanerugallartoq peqatigalugu Københavnimiippoq. Isumasioqatigiinnermi peqataasut 40-t missaanniipput.

• Maajip ulluisa 22-anni Nunat Avannarliit Killiit illoqarfittut pingaarnersaasa aningaasaateqarfianni siulersuisut videokonferencekkut ataatsimiipput. Ataatsimiinnermi borgmesterip tullia siulleq, Nivi Olsen, borgmesterimut sinniisuulluni borgmesterimit pisinnaatinneqarnerata kingorna, ataatsimeeqataavoq

• Maajip ulluisa 23-anni Iserit A/S aamma Nuup Bussii A/S kommunalbestyrelsip ataatsimiittarfiani ataatsimeersuarput.

• Maajip ulluisa 26-anni Aalborgimi Kalaallit Ulloqartinneqarnissaanut qaaqqusissut Aningaasaqarnermut Inuussutissarsiornermullu Ataatsimiititamut ilaasortanut nassiunneqarpoq.

• Ulluni 30. aamma 31. maaji Kalaallit Nunaanni inoqarfiit minnerusut pillugit Naalakkersuisut ataatsimeersuartitsineranni borgmesteri, nunaqarfinni aqutsisut siulittaasui pisortaanerugallartorlu peqataapput. Maritha Eugenius, Borgmesterip Allatseqarfiani siunnersorti, nunaqarfinni kommunip suliniutai pillugit saqqummiivoq, matumani Kommuneqarfik Sermersuumi nunaqarfinni aqutsisut, nunaqarfinnut aningaasaliissutit, nunaqarfii pillugit immikkoortumut pilersaarut ilanngullugit.

• Maajip ulluisa 31-anni Politikkikkut Ataqatigiissaarisoqatigiit Nuummi ataatsimiipput.

• Juunip ulluisa aappaanni ilaqutariinnut najugaqatigiiffik katsorsarfiutigisoq: "Kuserneq" ataasiliivoq.

• Juunip ulluisa aappaanni Nunaqarfinni aqutsisuni siulittaasunngorlaat Borgmesterimit ataatsimeeqatigineqarput. Borgmesterip nunaqarfinnilu aqutsisut siulittaasuisa akornanni qaammatit pingasukkaarlugit ataatsimeeqatigiittarnissaat pillugu ataatsimiinnermi borgmesteri nunaqarfinnilu aqutsisut siulittaasui isumaqatigiissummik atsioqatigiipput. Kommunalbestyrelsip nunaqarfinnilu aqutsisut akornanni politikkikkut suleqatigiinnissamut isumaqatigiissut atsiorneqartinnagu kommunalbestyrelsimit oqaluuserineqaqqaassaaq.

• Ulluni 7. aamma 8. juuni KNAPK Nuummi ataatsimeersuarpoq. Borgmesteri aggersarneqarpoq KNAPK-llu ukiumoortumik nalunaarusiaata saqqummiunneqarnerani peqataalluni.

• Juunip ulluisa arfineq-pingajuanni borgmesterip Aatsitassanut Naalakkersuisoq, Múte B. Egede ataatsimeeqatigivaa. Ataatsimiinnermi Naalakkersuisup Aatsitassat uulialu pillugit periusissiaq saqqummiuppaa. Tamatuma saniatigut eqqagassanik passussineq aatsitassarsiorfeqatigiillu pillugit ajornartorsiutit borgmesterip kissaateqarneratigut eqqartorneqarput.

• Juunip ulluisa qulingiluaanni Sermersooq Business Council ileqquusumik siulersuisui ataatsimiipput.

• 12. juuni 2017-imi Atuagaq: ”Den østgrønlandske dragt / Tunumiut Assuutaat” kommunalbestyrelsip ataatsimiittarfiani saqqummersinneqassaaq.

• Juunip ulluisa 16-ianni ilaatigut borgmesteri pisortaanerugallartorlu, Nuna Advokater suleqatigalugit Horten Advokatpartnerselskabip aaqqissuussaanut illoqarfimmik inerisaaneq attaveqarnerlu pillugit Kalaallit Nunaata Københavnimi ataatsimeersuartitsineranut peqataassapput. Ataatsimeersuarnermi ilaatigut Nuuk City Development pillugu borgmesteri aamma Meeqqanut Atuarfeqarnermullu Pisortaq saqqummiissapput.

• Piffissami 17. juulimiit – 31. juulimut borgmesteri sulinngiffeqassaaq, tassanilu borgmesterip tulliata aappaa, Malene Lynge, piffissami pineqartumi borgmesteritut atuutissaaq.

• Pisortaanerugallartoq:

Siorarsiorfik

Ulluni 6. aamma 7. juunimi siunnersuisut suleqatigiit ataatsimut ataatsimeeqatigineqarput.

Kommunimut pilersaarummut tapiliussassatut siunnersuut naammasseqqajaalerpoq aasaaneranilu sulinngiffeqareernerup kingorna politikerinut oqaluuserisassanngorlugu ingerlateqqinneqarumaartoq naatsorsuutigineqarluni.

19. juuni 2017-imi Københanvimi Siorarsiorfik pillugu pilersaarutip saqqummiunneqarnissaanut kommune Nuna Advokater aamma Hortenikkunnit aggersarneqarpoq.

Kommunalbestyrelsip ataatsimiinnissaanut tullermut atatillugu (Immikkut sammisaqarneq 4/9-17) Siorarsiorfik taassumalu immikkoortuisa ilai saqqummiunneqassapput – taamaalillutik kikkut tamarmik, aamma Kommunalbestyrelsimut ilaasortat, paasissutissiivigineqassammata.

2B. Ataatsimiititanit ataavartunit

Sanarfinermut Avatangiisinullu Ataatsimiititami siulittaasoq

Ingerlatsivimmi pisortaq Ataatsimiititamilu siulittaasoq ataatsimeeqatigiittarnissatik aallartereerpaat mannalu tikillugu aaatsimiititap suliassai pingaarnerit eqqartorneqarsimalereerput. Piffissami tullinnguuttumi suleqatigiilluarnissaq aallartilluartutut taaneqarsinnaavoq.

Innuttasunik sullissinermi suliassat annerpaat ilagaat nunaminertanik atugassiinermut qinnuteqatinik suliaqarneq, atuarfiit (annerusumik Nuummi) issusai aammalu illoqarfinni illoqarfimmik inerisaaneq taakkartorneqarput.

Ataatsimiititami siulittaasoq innuttaasunik arlalinnit saaffigineqartarsimavoq, ass. Nuussuarmi kalaaliaraq pillugu- saaffiginnissutit suleriuseq malillugu ingerlatsivimmut ingerlanneqartartut siulittaasup paasissutissiissutigaa.

Meeqqanut Ilaqutariinnullu Ataatsimiititami siulittaasoq

Innuttaasunik tallimariarluni saaffigineqarsimavoq: Saaffiginnissutini maluginiarsimavaa saaffiginnissutit tassaanerusartut suliat uninngaannartutut nipeqarsinnaasut. Saaffiginnissutit suleriuseq malillugu ingerlatsivimmut ingerlateqqinneqartarput.

Pisortaagallartussamik sulilersitsisoqarpoq. Sulilersinneqarluni Helene Horsbrugh. Ingerlatsiviup ilusilersorneranut tunngatillugu Jens Kaptajn suleqatigineqarpoq.

Isumaginninnermut Suliffeqarnermullu Ataatsimiititami siulittaasup tullia

Ataatsimiititap ataatsimiinnermini kingullermi Innarluutillit pillugit immikkoortumut pilersaarut oqaluuseraa, tassani pineqarluni Innarluutilinnut tunngasuni politikkikkut anguniakkat qanoq piviusunngortinneqarsinnaanersut.

Ataatsimiititap ataatsimiinnermini kingullermi Ingerlatsivimmi suliassanut allattorsimaffiit oqaluuserai. Innuttaasut immikkoortumi sullinneqarnermut qanoq naatsorsuuteqarsinnaanersut eqqarsaatigalugu suliassanut allattorsimaffimmi nassuiarneqarpoq

aamma sulisut qanoq kiffartuussisinnaanersut.

Kommunimi suliffissaaleqisut suli ikiliartorput, peqatigitillugulu sulisinnaassusillit amerliartorlutik. Nuummi suliffissaaleqisut suli ikiliartorput, aammali Paamiuni ikiliartorluarlutik inuttaasullu amerlasuut upernaaq sulilernikuupput.

Ingerlatsivik uani sapaatip akunnerani autisme pillugu aamma innuttaasoq autismeqartoq qanoq ikiorneqarsinnaanersoq aqutsinermullu tunngasunik pikkorissaavoq. Sulisunut aqutsisunullu pikkorissaaneruvoq

Ombudsmandi Ippiarsummi juulimi nakkutilliiartorlunilu misissuiartussaaq.

Meeqqanut Atuarfeqarnermullu Ataatsimiititami siulittaasoq

Ataatsimiititaq aallartilluartutut oqaatigineqarsinnaavoq. Kingullermik ataatsimiipput maajip 23-ani. Tassanilu ilaatigut 1. klassimiit tuluttoortalernissaq ilisimatitsissutigineqarpoq. Soraarummeertoqarneranut tunngatillugu ajuusaarnartumik pisoqarsimanera eqqaaneqarpoq.