Nalunaarutit

<p>2A. Borgmesterimit nalunaarutit</p>

<p>2B. Ataatsimiititanit ataavartunit</p>

2A. Borgmesterimiit.

Ulloq 10. oktobari Saammaateqatigiinnissamut Isumalioqatigiissitamut ilisimatitsilluni ataatsimiinnermut Nunatsinni borgmesterit tamarmik qaaqqusaapput. Isumalioqatigiissitap nalunaarusiaa ukiup naannginerani saqqummersinneqassaaq, taanna ilaatigut kommuninut inassuteqaatinik imaqassaaq.

Ulloq 10. oktobari Aningaasaateqarfik Sermimit aningaasat Kulturi pillugu siunnersuisooqatigiinnit agguaanneqarput.

Ulluni 13-15. oktobari Arctic Circle Assembly Reykjavik-imi ingerlanneqarpoq. Siullermeertumik Kommuneqarfik Sermersooq assembly-mi peqataavoq, tassanilu borgmesteri ataatsimiinnerni marlunni saqqummiisutut kiisalu panel-imi peqataasutut peqataavoq. Ataatsimiinnerni piujuartitsilluni ineriartortitsineq kiisalu najugaq eqqarsaatigalugu (tassa kommunimit isigalugu) issittumi periusissat qitiutinneqarput, issittumittaaq borgmesterit, soorlu Bodø-mit, Akureyri-mit, Longyearbyen-imi Iqaluit-niillu, peqataapput.

Sap. ak. 42: Nunat Avannarliit Nuummi kulturisioqatigiinnerat ingerlanneqarpoq.

Ulloq 17. oktobari Naalakkersuinikkut Ataqatigiissaarisartoqatigiit ataatsimiipput. Ataatsimiinnermi "Ineqarnermut tunngasut" qulequtarineqarput – Kommuneqarfik Sermersuumit oqaluuserisassat pingasut nassiunneqarput.

Ulloq 18. oktobari Nunat Avannarliit Nuummi Kulturisioqatigiinnerannut atatillugu kulturi pillugu politikkikkut oqallittoqarpoq. Panel-imi peqataapput borgmesteri Asii Chemnitz Narup, Gitte Wille (Region Skåne-mit Kulturi pillugu pisortaq), Turið Horn (Byrådimi kulturi pillugu ataatsimiititami siulittaasup tullia, Tórshavn Kommune), Jan de Vroede (nipilersortartoq aamma aaqqissuussisoq), Doris J. Jensen (Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq) aamma Lisbeth Poulsen (eqqumiitsuliortoq). Aaqqissuussaq innuttaasunut tamanut ammasuuvoq.

Ulloq 24. oktobari borgmesterip Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig ataatsimeeqatigaa.

Ulloq 26. oktobari inuusuttut suliffeqarfinnut pulaaqattaarnerannut atatillugu borgmesteri Kammagiinnit pulaartoqarpoq inuusuttut suliffeqarfinnut pulaaqattaarnerannut atatillugu.

Ulloq 27. oktobari Inatsisartut Sanaartornermut Ataatsimiititaliaat kommunimut pulaarpoq. Kommunimit pilersaarut pillugu ilisimatitsissut; ”Nuuk City Development” ilisimatitsissutigineqarpoq, ilisimatitsissuteqannginnermilu ataatsimiititaliaq illoqarfiup immikkoortuata nutaartaata tungaanut angallassisulerlutik bussinik kaajallaasinneqarput.

Ulloq 3. novembari borgmesteri Odense kommunianit Odensemilu Kalaallit Illuanit aallartitanit borgmesteri ataatsimeeqatiserineqarpoq. Kalaallit Illuata / Odense Kommuneata Kommuneqarfik Sermersuullu akornanni suut suleqatigiissutigineqarsinnaanersut pillugit aallartitat oqaloqatigiinnissamik kissaateqarput. Borgmesterip saniatigut Isumaginninnermut Suliffeqarnermullu Ataatsimiititami siulittaasoq, Charlotte Ludvigsen, ataatsimiinnermi peqataavoq.

Ulloq 7. novembari Kommuneqarfik Sermersooq Danmarkip avannaani EU-p allaffia peqatigalugu, EU-mit aningaasanik qinnuteqarnissamut kommunip periarfissai pillugit, kommunimi sulisullu angerlannginnermi ataatsimeeqatigiipput. Ataatsimiinneq Kommunalbestyrelsip Ataatsimiittarfiani ingerlanneqarpoq. Tamanna Ineriartortitsinermut Piujuartitsinissamullu Allatseqarfimmit aaqqissuussaavoq.

Ulloq 10. novembari borgmesteri kommunaldirektørilu Århusimi Københavnimilu suliffissanik nittarsaassinissamut peqataajartorlutik Danmarkimiipput. Borgmesteri kommunaldirektørilu ”Nuuk City Development” pillugu saqqummiipput. Tamatuma saniatigut allaffeqarfimmit nalinginnaasumik peqataasoqarpoq. Suliffissanik nittarsaassineq Namminersorlutik Oqartussanit aaqqissuussaavoq Århusimi Københavnimilu ulluni 11. aamma 12. novembari ingerlanneqassallutik.

Ulloq 16. novembari borgmesteri Nuussuup Atuarfini 10. klassit kommunalbestyrelsip sulerisarneranik oqaluttuukkiartorpai.

Ulloq 16. novembari kommunimi innuttaasunut aaqqissuussaq ”Kommune ammasoq” ingerlanneqarpoq. Tamatumani sammineqartoq tassaavoq ”Nuuk City Development”.

Ulloq 17. novembari AHL-imi AKO Miniklubbi borgmesterimit pisortatigoortumik ammaanersiorneqarpoq.

Ulloq 22. novembari ”Kommune ammasoq” innuttaasunik sullissivimmi innuttaasunut aaqqissuunneqarpoq. Tamatumani sammineqartoq tassaavoq ”2018-imut missingersuutit”.

Ulloq 23. novembari kommunimi maani allanut iluaqutaasumik innuttaasunut immikkut suliniuteqarsimasunut ilungersuussilluartunut Kommuneqarfik Sermersooq nersornaasiissaaq. Ukioq manna nersornaasiineq Nuuk Centerimi pissaaq. Ilungersuussilluartutut nersornaaserneqarniartoq illoqarfimmi, nunaqarfimmi, kommunimiluunniit immikkut iliuuserisaa tamanut sunniuteqarsimassaaq. Ilungersuussilluarsimanermik iliuuseqarneq inuussutissarsiornermut, kulturikkut imaluunniit inunnik sullissinermut tunngasinnaavoq.

Ulloq 24. novembari eqqumiitsuliorneq kulturilu pillugit suleqatigiinnissamut isumaqatigiissutigisassatut periarfissat eqqartorniarlugit, borgmesterip Islandip generalsekretæria ataatsimeeqatigissavaa.

Ulloq 24. novembari Martha Lund Olsen Meeqqanut Ilaqutariinnullu Ingerlatsivimmi pisortatut tikilluaqquneqassaaq.

Ulloq 27. novembari Tunumi inuussutissarsiutitigut periarfissat pillugit borgmesterip Inuussutissarsiornermut Naalakkersuisoq, Hans Enoksen, ataatsimeeqatigissavaa.

Ulloq 29. novembari Pinngortitalerinermik Ilinniartunut aamma Kalaallit Nunaanni Peqqissaanermik Ilisimatusarfimmut illu nutaaq atoqqaarfissiorneqassaaq.

Ulloq 1. decembari International High-level Conference-imi “The Sustainable Development Goals in the Arctic: Local and Global Perspectives” Københavnimi ingerlanneqartussami borgmesteri peqataassaaq.

2B. Ataatsimiititanit ataavartunit

Malene Lynge (IA), Sanarfinermut Avatangiisinullu Ataatsimiititami siulittaasoq

1. Kommunemi teknikkilerisuni pisortaq, Christian Dyrbjerg Andersen aamma Sarnarfinermut Avatangiisinullu Ingerlatsivimmi Pisortaq Mike J. Kristiansen, Christian ukiuni 6nni Mikelu ukiuni 4ni kommunemi sulilluareerlutik, kommunep illoqarfimmik ineriartortitsinermi selskabianut (NCD) atorfinipput. Suliffeqarfimmiit suliffeqarfimmut sulisunik nuutsitsineq aqqutigalugu atorfinitsinneqarput (virksomhedsoverdragelse). Ingerlatsiviup Pisortaa Mike J. Kristiansen taamaatinneranut atatillugu novembarip 15-ani kommunep ataatsimiittarfiani qaaqqusaasunut inuulluaqqusinninniartoqarpoq.

2. Sanarfinermut avatangiisinullu ingerlatsivimmi atorfillit pisortaat Hans Henrik W. Johannsen nutaamik pisortamik atorfinitsitsisinnaanissatta tungaanut ingerlatsivimmi pisortaagallarpoq.

3. Sanaartornermut sulianik sullissisut kommunimi pingasuusuni, marluk Danmarkimi piginnanngorsarneqarput. Piginnanngorsaanerit Snekkerstenimi, “brandteknisk byggesagsbehandling”mik taaguuteqartillugu novembarip naangajallugu, ingerlanneqarput. Pikkorissarneq piffisami sivikitsumi ingerlasartoq annertuunik ilikkagassaqarpoq – sapaatip akunnerata ataatsimillu praktikkerfissaqarlunilu. Tassuunga atatillugu Helsingørip kommuneata peqataalluarlutik suleqataalluarput.

4. Upalungaarsimallutik sulisut kommunitsinniittut tamarmik ilinniagaq tunngavissaq naammassisimavaat, tamannalu ukiorpassuarni naammassiniarneqarsimasoq kiisami iluatsippoq, toqqissiallannarlunilu nuannaajallannarpoq.

5. Sanaartornermut sulianik sullissisut kommunimi pingasuusuni, marluk Danmarkimi piginnanngorsarneqarput. Piginnanngorsaanerit Snekkerstenimi, “brandteknisk byggesagsbehandling”mik taaguuteqartillugu novembarip naangajallugu, ingerlanneqarput. Pikkorissarneq piffisami sivikitsumi ingerlasartoq annertuunik ilikkagassaqarpoq – sapaatip akunnerata ataatsimillu praktikkerfissaqarlunilu. Tassuunga atatillugu Helsingørip kommuneata peqataalluarlutik suleqataalluarput.

6. Kommunimi sanaartornerit tamaasa ajunngitsumik ingerlasut oqaartigineqartariaqarpoq. Sanaartornermullu tungatillugu ukioq 2017 maannamut rekordiliiffiusussatut nalilersoneqartariaqarportaaq – sanaartornerit ukioq manna ataatsimut isigalugit 255 mio. Koruunit tungaanut atorneqartussaammata rekordiliissussanngorpugut.

7. Oktobarip 10-niit novemberip 5-ata tungaanut napparsimanera peqqutigalugu sulinngiffeqarpunga piffissamilu tassani Siulittaasup tullia, Justus Hansen ataatsimiititami aquut tigummiarpaa. Nuannaarutigalugu nalunaarutigisinnaavara suliaritinnera iluatsilluarmat ajunngitusmillu inernilerneqarluni. Uannut tapersiillutik peqqissilluarnissannik kissaateqartut tamaasa uummammik pisumik qujaffigerusuppakka – piffissami pikkunartorsiorfimmi tuppallernaqaluni isumalerujussuuvoq.

Uju Petersen (IA) Meeqqanut Ilaqutariinnullu Ataatsimiititami siulittaasoq.

1. 2017-miit 2020-mut Ineriartortitsisissamut pilersaarut ingerlalluarpoq. Misissuinerit tassuunga aamma atassutillit ingerlalluarput.

2. Ataatsimiititaq ulluni 25-29. november Paamiunut angalassapput, tassanilu innuttaasunik ataatsimiititsissallutik, suliassaqarfiillu aamma paasiniaavigineqassallutik.

3. 24. november 2017 Meeqqanut Ilaqutariinnullu Ingerlatsiviup pisortartaava Martha Lund Olsen pisortatigoortumik naapinneqassaaq.

4. 1. december 2017 Tasiilami qimarnguik nutaaq ammassaaq, tassungalu atatillugu qimarnguiviupatissaanik unammisitsisoqassaaq.

Charlotte Ludvigsen (IA), Isumaginninnermut Suliffeqarnermullu Ataatsimiititami siulittaasoq.

1. 6. november 2017 Qeqertarsuatsiaani Peqqinnissaq pillugu isumaqatigiissummi suliniutit pillugit Nunaqarfinni Aqutsisuni ilaasortat Mannarsinnguaq Noahsen aammalu Anda Nathanielsen naapippai, tassanilu ilaatigut eqqartorneqarput anguniagassat assigiinngitsut.

2. 15. november 2017 Folketinngimi ilaasortaq Aaja Chemnitz Larsen angerlarsimaffeqanngitsut pillugit innuttaasunik ataatsimiisitsivoq. Tassanilu ilaatigut naalakkersuisut Sara Olsvig aamma Erik Jensen, taavalu Peqatigiiffiit pisortanut attuumassuteqanngitsut (NGO), ilaatigut Frelsens Hær aamma Kofoeds Skole, ilaapput.

3. Isumaginninnermut Suliffeqarnermullu Ingerlatsiviup peqatigiiffiit pisortanut attuumassuteqanngitsut ataatsimeeqatigisimavai, tamakkunani ilaapput Røde Kors aammalu Lions Club.

4. Novemberip naanerani aamma decemberip aallartinnerani Paamiuni kommuunimi utoqqarni innarluutilinnilu sulisut ilaatigut attaveqatigiinneq pillugu pikkorissartinneqassapput.

5. Aalborg Kommunemiit aaqqissuussamik Ingerlatsivimmiit utoqqarnik sullissisunut pikkorissaatitsisoqassaaq, tassani ilaatigut sammineqassallutik innuttaasut utoqqanngortut qanoq peqqissusaanik nakkutiginninnermik/maluginiaanermik.

6. Novemberip ingerlanerani Piorsaavik matugallarneqarpoq, tassanilu peqqutaavoq Deloitte misissuisinneqarmat aningaasaqarnerup tungaatigut, tassungalu atatillugu 24. november 2017 ataatsimiititaq ataatsimiilerpat saqqummiussisoqassaaq.

Nivi Olsen Meeqqanut Atuarfeqarnermullu Ataatsimiititami siulittaasoq.

1. Meeqqanut Ilaqutariinnullu Ataatsimiititap Ittoqqortoormiunut angalanissaraluata unitsiinnarneqarnerata kingorna ataatsimeeqatigisassatut pilersaarutigineqarsimasut taarsiullugit videokonference atorlugu ataatsimeeqatigineqarput. Ilaatigut ataatsimeeqatigineqarlutik meeqqat atuarfiani pisortaq aammalu sunngiffimmi pisortaq. Tassani eqqartorneqartut ilagaat ullutsinni ajornartorsiutaasut aammalu suliniutit sorliit iluatsissututut oqaatigineqarsinnaanersut.

2. Meeqqat Atuarfiata Ukaliusap (USK) illutaani oquk nassaarineqartoq ajornatorsiutigineqarpoq. Misissuinerillu tassunga tunngasut ingerlanneqarput kingornatigullu ilisimatitsissutigineqarumaarlutik.

3. 11.-12. december Ataatsimiititap Kommuneqarfik Sermersuumi meeqqat atuarfiisa pisortarisai qaaqquneqarput ataatsimeersuaqatigineqassallutillu, tassanilu unamminartinneqartut eqqartorneqassallutik.