Nalunaarutit

2a. Siulittaasumit nalunaarutit

2b. Ataatsimiititanik ataavartunit nalunaarutit

2a.

  1. Juulip 27-anni borgmesterip Inuussutissarsiornermut Aatsitassanullu Naalakkersuisoq, Jens Frederik Nielsen ilisarititseqatigiinnertalimmik siullerpaamik ataatsimeeqatigaa. Ataatsimiinnermi naalakkersuisoqarfiup kommunillu akornanni suliat pillugit ilisimatitseqatigiittoqarpoq. Naalakkersuisup borgmesterit allat ilai aamma taamatut ataatsimeeqatigereerpai, naatsorsuutigalugulu tamakkerlugit ataatsimeeqatiginissaat. 
  2. Ulloq 28. aamma 29. juli  borgmesteri Arsummut tikeraarpoq. Arsummut tikinnginnermi Ivittuut Kangilinnguillu alakkarneqarput, taakkunanilu Issittumi Sakkutooqarfik nittarsaassisuuvoq. Arsummut tikeraarnerup siunertaraa innuttaasunik oqaloqatigiinnertalimmik ataatsimeeqateqarnissaq, taakku peqataatinnissaat siunertaralugu, ilaatigullu innuttaasut Arsuk Ivittullu pillugit kissaatigisaannik tusarniaaffiginissaat. Aaqqissuussinermut takkuttut amerlalaavipput. Arsummi tikeraarnermut atatillugu Borgmesteri Nunaqarfimmi Aqutsisunik oqaloqatigiinnertalimmik ataatsimeeqateqarpoq. Innuttaasunik Nunaqarfimmilu Aqutsisunik oqaloqatigiinnertalimmik ataatsimiinnerup saniatigut borgmesterip ilaatigut takuniarpai meeqqerivik, atuarfik, aalisakkerivik utoqqaallu illuat matunikoq.

  3. Aggustip pingajuanni Suliffeqarnermut Isumaginninnermullu Ingerlatsivimmi pisortanngortoq sulilluni aallartippoq.

  4. Ulluni 5. aamma 6. aggusti borgmesteri Qeqertarsuatsiaanut tikeraarpoq. Tikeraarnermi siunertarineqarpoq innuttaasut “Qeqertarsuatsiaat – maannakkut siunissamilu” pillugit oqaloqatigiinnertalimmik ataatsimeeqateqarnissaq. Tuttunniarneq aallartereeraluartoq aasaaneranilu sulinngiffeqartoqaraluartoq takkuttut amerlangaatsiarput, innuttaasullu nunaqarfitsik ullumikkut siunissamilu pillugu eqqarsaatiminnik saqqummiussinissaminnut periarfissinneqarput. Qeqertarsuatsiaanut tikeraarnermi Borgmesteri Nunaqarfimmi Aqutsisunik oqaloqatigiinnertalimmik ataatsimeeqatiserineqarpoq, ataatsimiinnerillu saniatigut atuarfik, atuareernerup kingorna ornittagaq (AKO), meeqqerivik, utoqqaat illuat, Ammitsialak, umiatsianik iluarsaasarfik Ujaqqerivillu pulaarneqarput kiisalu Utoqqallammut kaffisoriartorluni.

  5. Aggustip 14-ianni inuussutissarsiornermut siunnersuisooqatigiit ataatsimeersuarput.  Sermersuumi Inuussutissarsiornermut immikkoortortaq Tunumi, Paamiuni Nuummilu Inuussutissarsiornermut Siunnersuisooqatigiinnik Aningaasaqarnermut Inuussutissarsiornermullu Ataatsimiititamik ataatsimeeqateqartitsivoq. Ataatsimiinnerni oqaloqatigiittoqarluarpoq inuussutissarsiornermullu siunnersuisooqatigiit 2021-mut inuussutissarsiornermut pilersaarummut kissaatigisaminnik amerlasuunik saqqummiussipput, ilaatigut kissaatigineqarluni inuussutissarsiornermi ineriartortitsinissamut periusissianik nutaanik suliaqartoqarnissaa. Ataatsimiinnerit qarasaasiakkut telefonikkullu ingerlanneqarput.

  6. Ulloq aggustip 21-ani 2020-mi Kalaallit Nunaanni meeqqat inuusuttullu aarlerinartorsiortut pillugit suliniutit patajaallisarneqarnissaat pillugit kalaallit qallunaallu oqartussaasoqarfiisa assigiinngitsunik suliallit akornanni suleqatigiissitap innersuussutai saqqummiunneqarput. Innersuussutit tamanut saqqummiunneqannginneranni Isumaginninnermut, Ilaqutariinnut Inatsisinillu Atuutsitsinermut Naalakkersuisup aamma Danskit Social- og Indenrigsministeriata borgmesterit tamakkerlugit ataatsimeeqatigiumallugit aggersarpaat. Aggustip 20-ani internetti atorlugu ataatsimiinneq ingerlanneqarpoq, ataatsimiinnermilu innersuussutit saqqummiunneqarput.

  7. Namminersorlutik Oqartussat kommunillu akornanni missingersuutit pillugit suleqatigiinnissamut isumaqatigiissut attuumassuteqartunit tamanit, tassa, Aningaasaqarnermut Naalakkersuisumit aamma borgmesterinit tamanit atsiorneqaqqammerpoq. Missingersuutit pillugit isumaqatigiissutip uuma isumaqatigiissut ulloq 22. januar 2014imeersoq taarserpaa. Suleqatigiinnermi Naalakkersuisut aningaasanut inatsisissatut siunnersuutaat, kiisalu Aningaasanut Inatsit Inatsisartunit akuersissutigineqartoq pingaarnertut sinaakkutaavoq. Kommunit missingersuutaat kommunalbestyrelsinit ataasiakkaanit kommunip isertitatut sinaakkutigisaasa iluanni aalajangersarneqartarput, tassani Aningaasanut Inatsimmi ataatsimoortumik tapiissutitut aalajangersarneqartut ilanngullugit. Attuumassuteqartup ataatsip arlallilluunniit kissaateqarnerisigut isumaqatigiissut isumaqatiginninniutigeqqinneqarsinnaavoq. Isumaqatigiissut pineqartoq namminersorlutik oqartussat nittartagaatigut avammut saqqummiunneqarnikuuvoq.

2b.

Uju Petersen, Meeqqanut Ilaqutariinnullu Ataatsimiititami siulittaasoq:

  1. Suliniutit assigiinngitsut, ilaatigut meeqqanut minnernut, aasap ingerlanerani ingerlatsivimmit aallartinneqarput.
  2. Angerlarsimaffiup avataanut inissinneqartut angajoqqaarsianut nussorneqarneri aallartipput amerlallutillu ilaatigullu ilungersunartoqarsinnaallutik. Ilaqutariinnut Sullissiviit innuttaasunut pilertortumik ikiuisarnertik peqqutigalugu ilungersunartorsiorput
  3. Astrid Kragh, qallunaat Isumaginninnermut Nunamullu Namminermut Ministeriat Naalakkersuisorlu Martha Abelsen suleqatigiinnissamut isumaqatigiissuteqarput, tassanilu ilaatigut meeqqanut inuusuttunullu ulloq unnuarlu angerlarsimaffimmik nutaamik pilersitsinissaq isumaqatigiissutigineqarluni.
  4. Ataatsimiititaq septembarip arfineq-pingajuaniit aqqarnata tungaanut Qeqqata Kommunianut paasisassarsiorluni angalassaaq.

Inge Olsvig Brandt, Suliffeqarnermut Isumaginninnermullu Ataatsimiititami siulittaasoq:

  1. Suliffeqarnermut Isumaginninnermullu Ingerlatsivimmi pisortaq nutaaq, Ejner Grønvold, sulilerpoq aggustip aallaqqaataanni  2020
  2. Pingasunngorneq aggustip 12-ianni innuttaasut angerlarsimaffeqanngitsut Nuuk Imeq tunuani tupeqarfiugallartumit Nuup illoqarfiata qeqqanut Blok C-mut aamma D-mut nuupput. Angerlarsimaffeqanngitsunik 80-it missaannik amerlassusilinnik Blok C-mut aamma D-mut inissiineq utaqqiisaasumik aaqqiineruvoq angerlarsimaffeqanngitsunut ornittakkap nutaap pilersinneqarnissaata tungaanut.
    Taamatuttaaq Qeqertani inissiani katitertakkani aserfallassimasuni ineqartut inissianut katitertakkanut nutaanut septembarip aallartinnerani nuussapput.
    Sisamanngorneq aggustip 20-anni ingerlatsivimmeersut unnukkut inissanut katitertakkanut pulaarput nuunnissarlu pillugu ilisimatitsillutik.
  3. Aggustip 11-anni Suliffeqarnermut Isumaginninnermullu Ingerlatsivimmit soqutigisallit assigiinngitsut ataatsimeeqatigineqarput, angerlarsimaffeqanngitsunut periusissiaq nutaaq aammalu angerlarsimaffeqanngitsunut ornittakkap nutaap pilersinneqarnissaanut tunngasup oqaluuserineqarnissaa pillugu. Ataatsimiinnermi Kofoeds Skolemit, Frelsens Hærimit, NOINI-mit kiisalu naalakkersuisoqarfimmit Sømandshjemmet-imit sinniisut peqataapput.
    Ataatsimiinnermi oqaloqatigiinneq pitsaasumik ingerlavoq, malitseqartitsillunilu ataatsimiinneq aggustip 20-anni ingerlanneqarpoq.
    Gruppe isumassarsianik saqqummeeqatigiittarnissaq pillugu kiisalu angerlarsimaffeqanngitsuuneq pillugu suliniutit pillugit oqaloqatigiittarnissamut aalajangersimasumik ataatsimeeqatigiittarnissaat isumaqatigiissutigineqarpoq.

Michael Rosing, Meeqqanut Atuarfeqarnermullu Ataatsimiititami siulittaasoq:

  1.  Ukioq atuarfiusoq aallartereerpoq.

Justus Hansen, Sanarfinermut Avatangiisinullu ataatsimiititami siulittaasoq:

 

  1. Ukiuni makkunani kommunip upalungaarsimasuisa orniguttarneri ikiuiartortarneri amerleriaateqarsimapput. 2018-imi Nuummi ikiuiartornerit 146-niit 2019-imi 203-nut amerlisimapput. Nalinginnaasumik pikkorissunik suliaminnik ilisimaarinnilluartunik upalungaarsimasoqarpugut – suliaminnillu ilisimaarinnittuunissaat qulakkeerniarlugu ilinniaqqinnissamut suliniut angisooq ukioq kingulleq aallartinneqarpoq.
  2. Marlunngorninngortoq unnuakkut Paamiuni inissiamik ikuallattoqarpoq, ajoraluartumillu inuit pingasut ajunaarput. Upalungaarsimasut pisortaat qatserisartut upalungaarsimasullu pisortaata tullersortaa atorfinerlaaq ikioriartorlugit Paamiunut aallarpoq. Tamatumunnga peqatigitillugu pisariaqartitsisoqassappat ikiuigasuartut piareersimatinneqarput.
  3. Nuummi illup misileraataasup DTU-mit aningaasalersorneqartup iserterfigineqarnissaa piareerpoq. Nuummi "ilaqutariit misileraataasussat" illumut isertereerput ukiunilu tulliuttuni marlunni illu najussavaat. Tamatuma kingorna illu Kommuneqarfik Sermersuumut tunniunneqassaaq.