Nalunaarutit

2a. Siulittaasumit nalunaarutit

2b. Ataatsimiititanik ataavartunit nalunaarutit

2a

  1. Kommunalbestyrelsip immikkut sammisaqarnerani 26. aggusti 2019-imi Tasiilami siunissami suliniutissat pillugit, eqqartorneqarpoq, siunissami 0-3-nik ukiulinnut angajoqqaanut siusinaartumik iliuuseqarnermik pilersitsisoqarnissaa sulissutigineqassasoq, tamannalu immaqa pisinnaasoq Armarngivat-nik allannguinikkut. Armarngivat suliffeqarfiuvoq namminersortoq nammineq siulersuisoqartoq, siulersuisullu siunertamik allannguinissaq pitsaasumik isummerfigaat. Meeqqanut Ilaqutariinnullu Ingerlatsiviup Armarngivat anaanamut meeqqamullu katsorsaavittut angerlarsimaffinngorlugu allanngortinnissaa kissaatigaa. Anaanamut meeqqamullu angerlarsimaffimmik siunertaavoq, meeraaqqat inuunerisa pitsaasumik toqqissisimasumillu aallartinnissaata qulakkeerneqarnissaa, meeqqap angajoqqaavisa angajoqqaajunermi annertuumik tapersersuinermik aamma siunnersorneqarnermik qulakkeerinniffiginerisigut. Tamanna pissaaq peqqissaanermik, perorsaanermik aamma isumaginninnermik sulisunit, suliamik ilisimasaqartunik piginnaasaqartunillu qanimut malinnaavigineqarnerisigut tapersersorneqarnerisigullu.

  2. Coronap ajornartorsiutaanera pissutigalugu kommunimi Inuussutissarsiornermut immikkoortortap sulisut marluk Greenland Businessimut atukkiuppai, tassani Naalakkersuisut ikiorsiissutaanik suliaqarnissamut ikiortaanissaat siunertarineqarluni. Sulisut juunip tungaanut atukkiussimaneqassasut naatsorsuutigineqarpoq.

  3. Covid-19-ip killilersimatinniarneqarneranut atatillugu matusinermi suliffissaaleqineq pillugu. Suliffissaaleqisut amerliartorput amerliartornerilu malinnaaffigilluarneqarput. Suliffissaaleqisut amerleriarnerat inuttut kiisalu aningaasaqarnikkut suliffeqanngikkallarnermi tapiissutinik akiliisarneq pissutigalugu kinguneqaateqarsinnaapput. Kommunip inuussutissarsiuteqartut attaveqarfigilluartarpai, piffissami qaninnermi suliffissaaleqisut nutaamik suliffimmik nassaarnissaannut atatillugu.

  4. Ulloq 24. marsi Kulturimik siuarsaaneq pillugu siunnersuisooqatigiit Sermeq Puljemut qinnuteqaatit suliaraat. Siunnersuisooqatigiit katillugit qinnuteqaatinik 39-nik tigusaqarput, ataatsimiinnermilu aalajangerneqarpoq suliniutit qulit akuerereerneqassasut, taamaasillunilu katillugit 839.506 koruuninik tapersersuisoqassasoq.

  5. Ulloq 20. apriili borgmesterit tamarmiusut Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisumit allakkanik nassinneqarput, ukioq atuarfiusoq 2019-2020-mi Covid-19 peqqutigalugu inaarutaasumik misilitsittarnermut taartitut angusat tunngavigalugit karakteeriliisoqassasoq. Coronamik nalaataqarneq pillugu borgmesterit ulloq 7. apriili 2020 ataatsimeeqatiginerat nangillugu kingornalu atuarfeqarnermut tunngatillugu kommunini fagchefit ataatsimeeqateqarneq tunngavigalugu Naalakkersuisut covid-19 peqqutigalugu meeqqat atuarfianni inaarutaasumik misilitsittarnermut taartitut angusat tunngavigalugit karakteeriiliisarneq pillugu nalunaarummik saqqummiussiniarlutik allakkami allassimavoq. Ulloq 7. apriilimi borgmesterit oqaloqatigineqarneranni tunngavigalugit nalunaarutip imarisai aalajangiunneqarput, tassani eqqartueqatigiinnermi misilitsittarnernernut taartitut angusat tunngavigalugit karakteeriliinissaq pingaarnertut oqaluuserineqarput. Tamatuma saniatigut allaffissornikkut maleruagassat aalajangersarneqarneranni IMAK-ip naliliineri ilanngunneqarput. Taamaalilluni nalunaarummut siunnersuut soqutigisaqaqatigiit pingaarnerit innersuussutai malillugit suliarineqarpoq. Taamatuttaaq Naalakkersuisut nalunaarummi ersarissarpaat angusat tunngavigalugit inaarutaasumik nalilersuinerit ukiumi atuarfiusumi sapinngisamik kingusissukkut tunniunneqassasut, atuartut inaarutaasumik nalilerneqarnissaat qulakkeerniarlugu.

  6. Ulloq 23. apriili Katuap ukiumoortumik ataatsimiinnerani borgmesteri aamma Sanarfinermut Avatangiisinullu Ingerlatsiviup pisortaa peqataapput. Katuap ukiumoortumik ataatsimiinnerani Katuap siulersuisui, Katuami aqutsisut kiisalu tapiissuteqartartunut sinniissut, tassa Kommuneqarfik Sermersuumiit aamma Namminersorlutik Oqartussaniit, peqataapput. Borgmesteri Kommuneqarfik Sermersooq sinnerlugu peqataavoq. Ukioq 2020 tassaavoq Katuamut periusissiamut atuuttumut ukioq kingulleq. Tassa imaappoq, Katuami siulersuisut soqutigisaqaqatigiillu allat ukiuni taakkunani angusat misissussavaat 2021-miillu ukiuni tulliuttuni suut neqeroorutigineqassanersut aalajangiullugit. Taamatut suliaqarneq 2019-imi aallarnisamisaarneqarpoq, 2020-milu aallunneqassalluni. Periusissiornermi Kommuneqarfik Sermersuup peqataatinneqarnissani kissaatigalugu oqaatigaa.

  7. Ulloq 24. apriili 2020 borgmesterit tamarmiusut Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen ataatsimeeqatigaat, tassani kalaallit qallunaallu akornanni Kalaallit Nunaanni meeqqat inuusuttullu atugarliortut iliuuseqarfiginerat nukittorsarniarlugu suleqatigiinnerat oqaluuserineqarpoq. Piffissamut 2020-2023-mut 80,0 mio. koruunit, tassa imaappoq ukiuni sisamani agguaqatigiissillugu ukiumut 20 mio. koruunit, danskit aningaasanut inatsisaanni illuartinneqarnikuupput.  

  8. Ulloq 24. Apriili 2020 Kommuneqafik Sermersuup suliffeqarfiit piginneqataaffigisaanni (aktieselskab-it) ukuusuni ataatsimeersuarnerit ingerlanneqarput: Nuuk City Development, Nuup Bussii A/S aamma Iserit A/S.

2b

Uju Petersen, Meeqqanut Ilaqutariinnullu Ataatsimiititami siulittaasoq:

 

  1. Kommunalbestyrelsip aggusti 2019-imi Tasiilami siunissaq eqqarsaatigalugu suliniuteqarnissaq pillugu immikkut sammisaqarnermi Tasiilami meeqqat ukioqanngitsuniit pingasut tikillugit ukiullit angajoqqaavinik siusissukkut iliuuseqartarnissamik suliniuteqarnissaq immaqalu Armarngivat allanngortinneqarsinnaanera eqqartorneqarput. Suliaq tassunga tunngasoq iluatsittumik ingerlanneqarnikuuvoq.
  2. Nuummi meeqqat kinguaasiutitigut kanngutsaatsuliorfigineqarnerata kingorna iliuuseqartarnerup pitsanngorsarnissaa siunertaqarluni sulineq Corona peqqutigalugu suliaq uninngasimagaluarluni aallartisaqqinneqarpoq, akimut suleqatigiinneq aqqutigalugu.
  3. Nuummnngaanniik angerlarsimaffiup avataanut inissinneqarsimasut angajoqqaavi Danmarkimut nuussimasut 30-it missaaniipput, amerlammata ilisimatitsissutitut matumuuna ilisimatitsissutigaarput.

Inge Olsvig Brandt, Suliffeqarnermut Isumaginninnermullu Ataatsimiititami siulittaasoq:

 

Nalinginnaasut

  1. Piffissami kingullermi COVID 19 pissutigalugu suleriaatsit allanngortillugit ingerlatsinissaq pisariaqarsimavoq, najoqqutassat nutaat pisariaqarlutik aamma sulisut innuttaasullu akornanni naleqqussarsinnaassuseq atuulluni. Isumaginninnermut Suliffeqarnermullu Ingerlatsiviup piffissaq kingulleq anigorluarpaa aamma sulisut nalinginnaasumik annertoorujussuarmik suliniarnermik ingerlatsillutik. Upalungaarsimanissamut pilersaarutit, najoqqutassat aamma periusissat suliarineqarput, taamaattumik sulisunit ilisimaneqarpoq qanoq iliorluni tunillaassuisoqarsinnaaneranut pinaveersaartitsisoqassanersoq, aamma tunillatsittoqassappat qanoq iliortoqassanersoq.
  2. Covid 19 pissutigalugu suleriaatsit allanngortinnerisa nassataannik ilikkagassat nutaat pinngorput aamma suleriaatsit sulinermilu periutsit nalileqqinneqarnissaat pisariaqarpoq, taamatullu sunik ingerlatsinissani periaasissanik nutaanik takunnittariaqarneq pisariaqarluni, tamakkuninnga innuttaasunut ataasiakkaanut iluaqqutaasinnaasunik.

Suliffissaqartitsineq

  1. Suliffissaqartitsinermik suliassaqarfimmi suliffeqanngitsut amerlassusiisa allanngoriartornerat nakkutigeqqissaarneqarpoq aamma tassunga suliniutit naleqqussarneqarput. Suliffeqanngitsut nutaat sukkanerpaamik sulileqqinnissaat eqqumaffigineqarpoq, tamanna piffissami matumani iluatsittutut isikkoqarpoq. Inuussutissarsiornermik ingerlatsisut aamma sulisartut kattuffii pitsaasumik oqaloqatigineqarput.

Utoqqarnut suliassaqarfik

  1. Utoqqarnut suliassaqarfimmi sulisut napparsimallutik sulinngitsoortarnerat appartinniarlugu ukiumi qaangiuttumi immikkut ittumik ukkatarineqarpoq. Immikkoortortani ataasiakkaani suliniutit arlallit ingerlanneqarput. Ilaatigut sulisut ataatsimoorlutik naleqartitaminnik inissiipput aamma naleqartitat taakkua ulluinnarni sulinerminni sakkutut atugaraat. Taakkua saniatigut sulisut annermik peqataatinneqarnerat aqutsisunit pingaartillugu ingerlanneqarpoq. Suliffimmi atugassarititaasut nalinginnaasumik pitsaanerulerput aamma immikkoortortat tamarmik ineriartornermik pitsaasumik ingerlatsipput. Taakkua tamarmik ersiutaattut napparsimallutik sulinngitsoortartut ikiliartornerat takuneqarsinnaavoq.

Michael Rosing, Meeqqanut Atuarfeqarnermullu Ataatsimiititami siulittaasoq:

 

  1. Lone Nukaaraq Møller Meeqqanut Atuarfeqarnermullu Ingerlatsivimmi pisortanngorpoq.
  2. Meeqqanut Atuarfeqarnermullu tunngasuni tusagassiutitigut nalunaarutigineqareersut saniatigut nutaarsiassaqanngilaq. Atuarfinni meeqqerivinnilu paarineqartariaqartuinnaat kisiisa paarineqarput.
  3. Atuarfiit kingumut ammarput, upalungaarsimanermi pilersaarut naapertorlugu atuartitsineq marlunngorlugu avinneqarpoq, taamaalilluni ilaannut allaanerusumik periuseqarnissaq periarfissinneqarluni.
  4. Sulisorpassuit sulilluarnerat pillugu qutsavigerusuppavut, tulluusimaarutigaavullu.

Justus Hansen, Sanarfinermut Avatangiisinullu ataatsimiititami siulittaasoq:

  1. Sanarfinermut Avatangiisinullu Ingerlatsivimmi sulisut covid-19-imut atatillugu inuiaqatigiinni matusinermut atatillugu kommunimi ingerlatsiviit tamarmik akornanni kommunimi suliffeqarfimmut upalungaarsimanissamut sulisutut atorneqarput. Sanarfinermut Avatangiisinillu Ingerlatsivimmi sulisuinnaanngitsut aammali kommunimi sulisut sinneri tamarmik annertuumik pitsaalluinnartumillu suliaqarsimapput. Tamanna pillugu qujanaq.
  2. Covid-19-imik nalaataqarnermut atatillugu illuutitsinnik aserfallatsaaliuinermik sulineq annertusineqarsimavoq. Taamaalilluni atuarfinni meeqqerivinnilu aserfallatsaaliuinermik suliassat siuartinneqarsimapput.
  3. Covid-19 pissutaalluni sulisut pingaarnerit sulinermit tatisimaneqarnerat pillugu piffissami aalajangersimasumi sivisunerusumik sullissisoqarpoq. Maanna kinguaattoorutaasut angummaffiginiarlugit sulissutigineqarput.
  4. Ukioq manna nunaminertanut tunngatillugu makitsineq siulleq ingerlanneqareerpoq, qaammatillu tulliani arlallit makitsissutaassallutik. Makitsissutaareersunut tunngatillugu Qinngutsinni sanaartorfissat annertuut marluk Nuummilu ilaqutariinnut ataatsinut illu ataaseq matumani pineqarput. Qaammatip tulliani Nuummi Qeqertani inuussutissarsiuteqarfiit sanaartorfigineqarsinnaasut, C.P. Holbøllsvejimi ilaqutariinnut ataatsinut toqqavik ataaseq sanaartorfiusinnaasoq kiisalu Nuummi ujaqqeriviugallarsinnaasoq pillugit makitsisoqassaaq.