Missingersuutinik malitseqartitsineq ulloq 30/9 2021

Inassuteqaat amerlanerussuteqartunit akuersissutigineqarpoq, Siumuimit ikinnerussuteqartutut oqaaseqaatitalerlugu: 

“30/9-2021-mi Missingersuutinik malitseqartitsineq"-mi imm. 24-mut tunngatillugu oqaaseqaat

Suliassanut inatsisitigut pituttorsimasunut 28 mio.-nik ilassutitut aningaasaliineq Siumumit akuerineqarpoq, kisianni inissiamut akiliutinut nalimmassaatissanik 11 mio.-nik ilassutitut aningaasaliinissamik qinnuteqarneq itigartinneqarpoq. Nakkutilliisoqarfiup novembarip ulluisa 9-anni Inissiat pillugit suliamik taaneqartumi inernileereerneratigut, kommunitta inuussutissarsiuteqartunik inissianik attartortitsinissaq siunertaralugu  isumaqatigiissuteqarnera aamma kommunip suliami iliuuseqarnera pillugu sakkortuumik isornartorsiuteqarnermi, Nakkutilliisut ilaatigut oqaaseqarput ”inissianik appasinnerusumik akiliilluni attartorneq, kommunip piginnittumut akiliutissatut pisussaaffigisaanit, allanut attartortitsinermi innuttaasunik ataasiakkaanik iluaqusiineq, kommunip piginnaatitaaneranik unioqqutitsinerusoq”

Siumup aaqqissuussineq ilassutissatut aningaasaliissutinik 11,0 mio. kr.-nik akuersinermigut  akuerisinnaanngilaa, qinnuteqaat pillugu qup. 14-imi naatsumik paasissutissiissutigineqartoq kingornalu Aningaasaqarnermut Inuussutissarsiornermullu Ataatsimiititami ataatsimiinnermi oqaatsit atorlugit paasissutissat saqqummiunneqarput tamanna kommunip ingerlatsinermut aningaasartuutinik 7 mio. kr.-nik  ilanngussisimannginneranik kiisalu aserfallatsaaliuinermut inissiallu inoqannginnerinut 4 mio. kr.-nik annaasaqarnermik pissuteqartoq.

Aaqqissuussinerup aningaasaqarnikkut aningaasartuutaanerunissaa 2019-imut missingersuusiornermi saqqummiunneqarmalli Siumut sakkortuumik isornartorsiuivoq mianersoqqusillunilu aaqqissussaq 2019-imi missingersuutini 8,3 mio., 2020-mi 13.2 mio., 2021-mi 13,4 mio., 2022-mi 17,0 mio. kiisalu 2023-mi 14,0 mio. kr.-nik naleqartussaanera pillugu. 2020-mut missingersuutit isumaqatiginninniutigineqarneranni aningaasat 2022-mi 13, 7 mio., 2023-mi 14,0 mio., 2024-mi 14,3 mio., 2025-mi 14, 5 mio., 2026-mi 14,8 mio., 2027-mi 15, 0 mio. aamma 2028-mi 15, 2 mio.-koruuniupput.

Ukiumut 2022-mut 2021-mi missingersuutinik isumaqatiginninniarnermi aningaasat taakkua ukiuni tulliuttuni missingersuusiorfiusuni 2030-p tungaanut 17,0 mio.-nut qaffassimapput. Ilassutissatut 11,0 mio.-nik aningaasaliissutinik qinnuteqaateqarneq ilanngullugu – ataatsimut ukiumut  28 mio.-nik qaffariaateqassaaq. Saqqummiunneqartoq iluamik paasisitsissutigineqanngitsutut Siumumit isigineqarpoq.

Siumup attartortut kiggigunneqarsimanerat paasisinnaalluarpaa, takusinnaagatsigu attartortut ilaannut kommune attartortitsinerit ilaannut  ukiuni 10-niit 15-inut pituttorneqarsimasoq. Taamaattumik attartortitsinernut 17 mio. kr.-inik nalimmaasaanissaq akuerivarput.

Kisianni inissiat pillugit suliamut suli 11 mio. kr.-nik akuersissuteqarnissaq Siumup akuerisinnaaNNGILAA, aaqqissuussineq kommunip pisinnaatitaaneranik unioqqutitsimmat.