Imaqarniliaq

Ileqquusumik ataatsimiinneq siulleq

Nuummi Najukkami Ataatsimiititaliaq

 

Imaqarniliaq

 

Marlunngornermi oktobarip 30-ani 2018 nal. 16.30

 

 

Ilaasortat

Nivi Katrine Christensen

Arnarissoq Fleischer

Moses Masik Marcussen-Mølgaard

Ujammiugaq Engell

Poul Petersen

Finn Meinel

Aviaq Brandt

Nadia Aviaq Olsen

”Ari” Hansine P. Rasmussen

Naleraq Eugenius

 

Ataatsimeeqataasinnaanani nalunaarneq

”Ari” Hansine P. Rasmussen

 

Aggersarneqarpoq

Christina Tønder Bell (sinniisussaq siulleq)

 

 

 

 

 

 

 

 

Oqaluuserisassat

 

Indhold

1. Oqaluuserisassat akuerineqarnerat 3

2. Nalunaarutit/ Ilisimatitsissutit 3

2A: Sammisaqartitsinermit eqikkaaneq. 3

3. Immikkoortut aalajangiiffigisassat 4

3A: Siunnersuut – Luminous Nuuk. 4

3B: Siunnersuut – Aqqusinermi angallanneq isumannaanerusoq. 6

3C: Siunnersuut – Inussivimmik atorluaaneruneq. 6

3D: Siunnersuut – Oqaluttuarisaanermut attuumassuteqartunut allagartalersuineq. 7

3E: Siunnersuut – Nuummi Apummik Ilusilersuineq 2019 (suliniummik aallarnissaaneq) 8

3F: Siunnersuut – Illup isuanik pinnersaaneq. 9

3G: Siunnersuut– Utoqqaat illuinni TVimi kanalit, internet iPadillu. 10

3H: Siunnersuut – Angerlarsimaffeqanngitsunut oqaloqatiginnittartoq. 10

3I: Siunnersuut – meeqqanut qilaatersorneq. 11

3J: Siunnersuut – Qinngutsinni arsaattarfiup qullisorneqarnissaa, ungalulerneqarnissaa nutaanillu mål-lerneqarnissaa. 11

3K: Siunnersuut – Nuutoqqami sauna. 12

3L: Siunnersuut – Ilinniartut illussaanik pilersitsineq. 13

3M: Siunnersuut – Nuummi Parki 14

3N: Siunnersuut- Innuttaasunut tamanut timersorneq/ ilaqutariinnut timersorneq. 14

3O: 2018-mut nalinginnaasumik aningaasaliissutinik agguaassineq. 15

4. Allat taasariaqartut 15

5. Imaqarniliap akuerineqarnera. 15

 

 

 

  1. Oqaluuserisassat akuerineqarnerat

 

  1. Nalunaarutit/ Ilisimatitsissutit

 

2A: Sammisaqartitsinermit eqikkaaneq.

Marlulnngornermi oktobarip 23-ani Nuummi Najukkami Ataatsimiititaliami ilaasortanut Najukkami Ataatsimiititaliami suliassanut aallartisarnissamut sammisaqartitsisoqarpoq.

 

Sammisaqartitsinermi ilaatigut ataatsimut anguniagassanik erseqqissaaneq qitiutinneqarpoq, piumasaqaatinik aningaasanillu agguaanissamut malittarisassat eqqartorneqarlutik.

 

Najukkami Ataatsimiititaliap siunertaa (Eqimattakkaarluni suliaqarnermi oqaaseeqqat pingaarnersiorneri)

Qanimut oqartussaaqataaneq, inuttaasut oqartussaasullu akornanni ataqatigiissitsisoq, najukkami innuttaasut oqartussallu akornanni attaveqatigiinnermik ajornaallisaaneq, najukkamut tunngasunik ilisimasanik atuineq najukkamilu pissutsinut ajornartorsiutinullu paasissutissiineq, sunniuteqaqataaneq aalajangeeqataanerlu, innuttaasunik peqataatitsineq sinniisuunerlu, isumassarsianut kissaatinullu iliuuseqarneq, sukkanerusumik pisariinnerusumillu iliuuseqarneq,sulisunik aningaasanillu atorluaaneq,tusarniaasussaq/nakkutilliisoq, attaveqaataasoq, iluarsiissutissanik paasisimasalik siunnersuuteqartartorlu.

 

Aningaasanik agguaassinermi piumasaqaatit/malittarisassallu (katersuunnermi isummersoqatigiinneq)

  • Sumiiffiit: Silamiinneq, kulturi, timersorneq, sumiiffiit tamanit orninneqarsinnaasut, peqqinneq.

  • Najukkami Ataatsimiititaliap nammineq suliniutaasa innuttaasunullu siunnersuutaasa oqimaaqqatigiinnissaat.

  • Inaarutaasumik inerniliinnerit inerniliippallattariaqarnerit.

  • Sammisat: meeqqat, inuusuttut, utoqqaat, ilinniartut – Nuummi innuttaasut tamarmik.

  • Innuttaasunik tamanik ataqatigiissitsiniarluni sammisassaqartitsinerit/suliniuteqarnerit.

  • Pioreersunik pitsanngorsaanerit nutaanillu ineriartortitsinerit.

  • Suliniut arlalinnut ataasiakkaanulluunniit suliniutaava?

  • Atuineq– aningaasat qanoq naleqarpat ? Akilersinnaava?

  • Najukkami Ataatsimiititaliaq suliniutinik toqqaasarnerminut tunngavilersuisinnaasariaqarpoq. Suliniutigineqartariaqarpa?

 

  1. agguaassinermi piumasaqaatit malittarisassalluunniit pingaarnerit aalajangernissaat sulissutigineqarallassaaq.

 

2018-imut aningaasanik atuinissamut Najukkami Ataatsimiititaliamut ilaasortat 25-inik siunnersuusioreerput taakkulu iluminni eqqartorpaat isumasioqatigiillutillu.

 

Inassuteqaat

Inassuteqaatigineqarpoq:

  • ilisimatitsissut tusaatissatut tiguneqassasoq

 

 

  1. Immikkoortut aalajangiiffigisassat

 

3A: Siunnersuut – Luminous Nuuk

 

Suliassamik eqikkaaneq

Najukkami Ataatsimiititaliami ilaasortaq Naleraq Eugenius oktobarip 23-ani 2018, suliniutissatut siunnersuummik Lumnious Nuuk-mik taaguteqartumik nassiussivoq.

Suliniummi Kalaallit Nunaanni pinngortitap inissiarsuillu tunuliaqutigalugit Nuummi innuttaasunut takujuminarsaaneq siunertarineqarpoq. Takorluulaarsiuk, inissiarsuit qaqortut, pinngortitarlu kusanartoq qaqqallu innarlinngikkaluarlugit qalipaatilersorlugit ilusilersukkanillu kusassarsimasut. Meeqqanut ilaqutariinnullu misigisassaqarfissatut periarfissaq.
 

LUMINOUS NUUK-mi periarfissat annerit ilaagaat, Kalaallit Nunaani sumiluunniit qaammaqqusersuisinnaaneq, aaqqissuussinerni minnerumaani qaammaqqusersukkanik tunuliaquteqarnissamik periarfissaqartoqarsinnaalluni aamma. Qaammaqqusersuutit taakkua sumiluunniit atorsinnaasunngortikkusuppakka, Nuummi kulturimut tunngasunik aaqqissuussinerni atorneqarsinnaasunngorlugit. Immaqa aamma silami isiginnaartitsinerni tusarnaartitsinerniluunniit atorneqarsinnaapput, tamakkuami maani Nuummi takussaavallaanngillat.

Nuummi inissiarsuit ukiumi takullugit qiimmassaataavallaarneq ajorput. Ukiuvut sivisusarput assullu tarrajuttarlutik, kisiat aput inissiarsuillu qaqortuupput qaammarneqarnermilu assut inngianartarlutik. Taakkunani qaammaqqusersuutit LED-it assigiinngitsunik qalipaatillit atorneqarsinnaapput, qalipaataasa allanngorarnerat aqunneqarsinnaavoq ukiorlu malillugu allanngortinneqarsinnaallutik. Silami ukiumi issittorsuarmi atorneqarsinnaasunik LED-inik qaammaqquteqarpoq taakkua inissiarsuit qaqortut qulaanut ikkunneqarsinnaapput. Isumassarsiaq Colorful Nuuk-mut ajornaquteqanngitsumik atorneqarsinnaavoq. Illoqarfipput qalipaatigissartigu, ingammik ukiuvut taamak takitigisut.

 

Qaammaqqusersuutit silami issittumut atorneqarnissaminut tulluarsarsimasut, sivisuumillu atasinnaasut pisiarineqarsinnaapput. Qaammaqqusersuutit tamarmik kommunimit pigineqassapput.

 

Luminous Nuuk-mut missingersuutit:

Qaammaqqusersuutinik pisinermi aningaasartuutit saniatigut ikkunneqarneranut, nassiunneqarneranut pilersaarusiorneranullu aningaasartuuteqartoqassaaq. Ataatsimut missingersuutit 500.000 koruunit missaaniipput.

 

Unnuk kulturisiorfimmut pilersaarusioqqaarneq.

Suliniutip mikinermik misiliutigiumallugu Naleraq Eugeniusip Nuummi Unnuk Kulturisiorfimmi januaarip 19-ani 2018 inissiarsuaq ataaseq marlunniluunniit saqqaasa qaammaqqusersorneqassasut siunnersuutigaa. Tassunga atatillugu qaammaqqusersuutit LED-isut siulliit 2-4 pisiarineqarsinnaapput misilittarneqarlutillu. Uani naqqani Unnuk Kulturisiorfimmi qaammaqqusersuinissamut akissaritinneqartoq naatsorsorneqarpoq.

 

Amerlassusaat

Allaaserinera

Aki

Sisamat

Qaammaqqusersiat LED-iusut (ataaseq 23.000 koruuneqarpoq)

92.000kr.

Ataaseq

Ikkussinissamut aningaasartuutit

11.662kr

Ataaseq

Pilersaarusiornissaanut ikkunneqarnissaanullu aningaasartuutit.

20.000kr.

Ataaseq

Qaammaqqusersuutinik nassiussineq.

10.000kr.

Tamakkerlugit

 

133.662kr

 

 

Inassuteqaat

Inassuteqaatigineqarpoq:

  • Lunimous Nuuk-mut siunnersuut eqqartorneqassasoq suliniummullu aningaasaliisoqarnissaanik aalajangiisoqassasoq.

  • Siunnersuut Unnuk Kulturisiorfimmi suliniummut aallartisaatitut siunnersuut oqaluuserineqassasoq tassungalu aningaasaliisoqarnissamut aalajangiisoqassasoq.

     

     

 

 

3B: Siunnersuut – Aqqusinermi angallanneq isumannaanerusoq

 

Oktobarip 24-ani 2018 Najukkami Ataatsimiititaliami siulittaasup Poul Petersenip, Najukkami Ataatsimiititaliap aqqusinermi angallannerup isumannaanerulernissaanik qulakkeerinninnissamik suliniuteqarnissaanik siunnersuummik nassiussivoq.

 

Aqqusernermi angallannerup isumannaannerulernissaa ikiorsiissutinik atuinikkut (allagartalersuineq) aamma/imaluunniit immikkut suliniuteqarnikkut qulakkeerneqassaaq. Aqqusernermi angallannerup isumannaannerulernissaanut qulakkeerinninniarnermi politiit angallannermullu ataatsimiititaliaq suleqatigineqarsinnaanerat siunertarineqarpoq.

 

Sammineqartut meeqqat (atuarfiit) – sikkilertut – pisuinnaat.

 

Uani innuttaasunik peqataatitsineq ilaatigullu atuarfinnik, pisiniarfinnik, suliffeqarfiit sillimasiinermik suliaqartut tassungalu attuumassuteqartut allat peqatigalugit suleqateqarnissaq periarfissaavoq.

 

Missingersuutit:

100.000 kr.

 

Inassuteqaat

Inassuteqaatigineqarpoq:

  • Aqqusinermi angallannermut isumannaannerusumut siunnersuut oqallisigineqassasoq suliniummullu aningaasaliisoqarnissaanik aalajangiisoqassasoq.

 

 

3C: Siunnersuut – Inussivimmik atorluaaneruneq.

 

Oktobarip 25-ani Najukkami Ataatsimiititaliami ilaasortaq Finn Meinel, Inussivimmik, ilaatigut timersortarfinnik piffissat annertuumik pakkersimaarneqarnerini oqilisaassiffigineqarnissaanik noqqaasoqarnera, atorluarneqarnerunissaanik siunnersuummik nassiussivoq.

 

Illorsuup pioreersup silataani atortuusivissamik sanasoqarneratigut illorsuup iluani timersorfiusinnaasumik nutaamik sanasoqarsinnaaneranik inissaqartitsisoqalissaaq. Massakkut Inussivimmi marlunnik pioreersunik timersorfissaqarunnaarluni pingasunik timersorfissaqarsinnaalissagaluarpoq.
 

Timersortarfinnik atorluaanissaq piffissanilu annertuumik pakkersimaarisoqarneranik oqilisaaffiginninnissaq siunertarineqarpoq. Sanaartornermi teknikkikkut siunnersorneqarnikkut pilersaarummik suliassamik aallartitsinissamut atugassamik ataasiarluni aningaasaliisoqarnissaanik kissaateqartoqarpoq. Aningaasaliissutit sanaartugassap titartartinneranut pilersaarummillu suliaqarnissamut assigisaannillu matussusiissapput, kingorna aningaasaliisoqaqqinnissaanut aningaasaliisussanik fondinut assigisaanullu qinnuteqarnissamut tunngavigineqartussat.

 

Atuarfinni eqaarsaartarfinnut timersortarfinnullu atuisunut tamarmik uani sullinniarneqarput.

 

Missingersuutit:

200.000 kr.

 

Inassuteqaat

Inassuteqaatigineqarpoq:

  • Inussivimmik atorluaanerunissamik siunnersuut oqaluuserineqassasoq pilersaarummullu aningaasaliisoqarnissaanik aalajangertoqassasoq.

     

 

3D: Siunnersuut – Oqaluttuarisaanermut attuumassuteqartunut allagartalersuineq.

 

Oktobarip 24-ani Najukkami Ataatsimiititaliamut ilaasortaq Nivi Christensen, Nuummi oqaluttuarisaanermut attuumassuteqartunut allagartalersuinissamut siunnersuummik nassiussivoq.

 

Najukkami Ataatsimiititaliap illunik, eqqaassutissanik aqqusinernillu oqaluttuarisaanermut attuumassuteqartunik illoqarfimmilu ilusilersukkanik kusanartunik allagartuilersuinissamut suliniummik aallartisaanissaa siunnersuutigineqarpoq. Massakkut assersuutigalu Hans Egedep Illuata silataani Nuutoqqamilu napparsimavitoqqap silataani, illoqarfiup iluani ilusilersukkanik eqqumiitsuliortut ilusilersukkanullu tunuliaqutigineqartut pillugit allagartaliisoqarsimanngilaq. Illoqarfik oqaluttuassartanik ulikkaarpoq suli oqaluttuarineqanngitsunik, oqaluttuarineqarnissaminullu utaqqiinnartunik.

 

Nammineq illoqarfigisamut ilisimasaqarnerulernissaq Nuummilu takusassanit pioreersunik naleqartitsinerulernermut suliniuteqarnissaq siunertarineqarpoq. Najukkamut tulluusimaarnermik illoqarfimmullu ilisimasaqarnerulernermik pilersitseqataasaaq. Saniatigut aamma takornarianut illoqarfimmik ilisimasaqarnerulernermik sunneeqataassaaq.

 

Nalinginnaasumik illoqarfimmi innuttaasut, oqaluttuassartaanik ilisimasaqarpianngimmata taakkua sullinniarneqarput. Immikkut illoqarfimmut nooqqammersut angerlarsimasutut misiginerulernissaat takornariallu illoqarfimmut ilisimasaqarnerulernermikkut Nuummut ataatsimuussusermik misiginerulertussat eqqaaneqarsinnaapput.

 

Innuttaasunut peqataatitsinermut tunngatillugu, innuttaasut sumiiffiit oqaluttuallu suliniummut ilaatinneqartussat pillugit kissaataat paasiniarlugit ammasumik allakkiorneq naleqqutissaaq.

 

Missingersuutit:

Suliniummi qassit suleqataassanersut apeqqutaatillugit naleqqussarneqarsinnaavoq kisianni 2018-imi 100.000 koruunit aallarniutaalluarsinnaapput.

 

Inassuteqaat

Inassuteqaatigineqarpoq:

  • Allagartalersuinissamut siunnersuut eqqartorneqassasoq suliniummullu aningaasaliisoqarnissaanik aalajangiisoqassasoq.

 

 

 

 

3E: Siunnersuut – Nuummi Apummik Ilusilersuineq 2019 (suliniummik aallarnissaaneq)

 

Oktobarip 24-ani Najukkami Ataatsimiititaliamut ilaasortaq Nivi Christensen, Nuummi Apummik Ilusilersuisoqarnissaanik siunnersuummik nassiussivoq.

 

Najukkami Ataatsimiititaliap marsimi 2019-imi Nuummi Ilusilersuisarnerup ingerlanneqaqqinnissaanut aallarnisaasuunissaa siunnersuutigaa. Apummik Ilusilersuititsineq illoqarfimmut nuannaarutaallunilu qiimmassaataasaaq takornarianillu ukiuunerani takusassiissalluni. Eqqarsaatigineqarportaaq apummik ilusilersuititsinermi assigiinngitsunik ukiulinnit kajumissutsiminik sulisoqarsinnaanera. Apummik ilusilersuititsineq SIKUKI-mi talittarfitoqqap eqqaaniinnissaa siunnersuutigineqarpoq.

 

Suleqatigiikkuutaat 30-it sisamanik inuttallit peqataanissaat neriuutigineqarpoq. Suliniummi suleqatigiit pingasut ilinniartuunissaat, Nunani Avannarlerniit suleqatigiit marluunissaat suleqatigiillu kingulliit Tunumit Nunattalu Avannaanniit Kujataaniillu peqataaffigineqarnissaat eqqarsaatigineqarpoq. Suleqatigiit sinneruttut Nuummeersuussussat innuttaasut akornanneersuullutillu suliffeqarfinninngaaneersuussallutillu. Apummik Ilusilersuisarnermik aaqqissuussineq ukiut tamaasa ingerlanneqartalernissaa neriuutigineqarpoq, 2019-illu kingorna aningaasaateqarfinnit aningaasaliisoqarnikkut ingerlasinnaalluni taamaattorli aallartisarneqartariaqarpoq. Najukkami Ataatsimiititaliap Nuummi Apummik Ilusilersuinermik ingerlatsisooqqaarnissaa neriuutigineqarpoq.

 

2019-imiit Apummik Ilusilersuineq 350.000 koruunit sinnerlugit aningaasaliiffigineqarnissaa takorloorneqarpoq taamaattumik suliniutip piaarnerpaamik aallartisarnissaa pingaaruteqarpoq.

 

Sullinniakkat:

  • Peqataasut, soorlu DHL Staffettitulli, pilersitseqataanermi immikkuullarittumik ataqatigiinnermik misigissapput. Pingaarnertut inuit 18-ileereersimasuusapput ilusilersuinermi timimik annertuumik atuiffiussammat.

  • Apummik Ilusilersuinermi alakkaasut. Uani atuartut ilinniartullu initussusilerinermi ilusilersuinermilu suliaqassapput, illoqarfimmiusullu tamarmik ilusilersukkanik takorannersunik pissanganartunillu takusaqarnissaminut periarfissaqassapput.

     

Innuttaasunik peqataatitsineq

  • Suleqatigiinnik pilersitsisoqassaaq, suliniut kajumissutsiminnik suliniuteqartunit pingaarnertut ingerlanneqassammat. Apummik Ilusilersuititsinerup ingerlarnganik malinnaanissaq periarfissaassaaq.

 

Missingersuutit.

  • 650.000 koruuninik ataatsimut akeqarnissaa missingersuutigineqarpoq Ilaatigut Nunanit Avannarlernit Kalaallit Nunaaniillu qaaqqusinissaq, siunnersuutigineqarporli Najukkami Ataatsimiititaliap 2018-imi piareersarnissamut 100.000 koruunit aamma 2019-imi ingerlatseqqiinnermi 180.000 koruunit atussagaat. Missingersuut sukumiinerusoq ataatsimiinnermi saqqummiunneqassaaq.

     

Inassuteqaat

Inassuteqaatigineqarpoq:

 

  • Nuummi Apummik Ilusilersuinerup ingerlanneqaqqinnissaanut siunnersuut eqqartorneqassasoq suliniummullu aningaasaliisoqarnissaanik aalajangiisoqassasoq.

 

 

3F: Siunnersuut – Illup isuanik pinnersaaneq.

 

Oktobarip 24-ani Najukkami Ataatsimiititaliamut ilaasortaq Nivi Christensen, Nuummi illup isuanik pinnersaanissamut aningaasaliisoqarnissaanik siunnersuummik nassiussivoq.

 

Eqqumiitsuliortoq Gukki Nuka ukioq kingulleq Kalaallit Nunaani kinguaassiutitigut atornerluisarneq akiorniarlugu nittarsaassisuuvoq aniguisimasutullu saqqummerluni. kinguaassiutitigut atornerlunneqarnermik nalaataqarsimasunut ataatsimuussusermik takutitsisumik imaluunniit maannakkorpiaq aqqusaagaqartunut ilisarnaammik sanasoqarnissaa kissaatigaarput. Illoqarfiup qeqqani kinguaassiutitigut atornerlunneqarsimasunit qanigisaasuniillu nukittorsaataasinnaasumik nukittussusermut ilisarnaat tamatsinnullu akiuiniarnermut pingaaruteqartumut takussutissaq.

 

Uumasuunissaa pilersaarutaavoq (soorlu tulugaq) plexiglasimit bronzemillunniit qiperugaq blok 4-ami illup isuani inissisimasinnaavoq. Suliaq illoqarfimmi ilusilersugaannaasinnaavoq kusassaataasoq uummarsaataasorlu – ilisarnaataanera isiginianngikkaani ilusilersorluarnera takorannequtaasinnaavoq.

 

Illoqarfimmi innuttaasunut tamanut eqqumiitsuliamik nuannaarutaasussamik pilersitsineq eqqumiitsulialli itinerusumik oqariartuuteqarnissaa siunertarineqarpoq.

 

Kinguaassiutitigut atornerlunneqarsimasut qanigisaasullu immikkut sullinniarneqarput, saniatigullu Nuummi najugaqartunut takornariartunullu eqqumiitsuliaassaaq kusanartoq alakkarneqarsinnaasorlu.

 

Missingersuut

2018-imi 100.000 koruunit missaat.

 

Inassuteqaat

Inassuteqaatigineqarpoq:

  • Illup isuanik pinnersaanissamut siunnersuut oqallisigineqassasoq suliniummullu aningaasaliisoqarnissaanik aalajangiisoqassasoq.

 

 

 

 

3G: Siunnersuut– Utoqqaat illuinni TVimi kanalit, internet iPadillu.

 

Oktobarip 24-ani Najukkami Ataatsimiititaliami ilaasortaq “Ari” P Rasmussen, innuttaasut utoqqaat illuiniittut ineeqqaminni tv-mi kanalinik, internetimik iPadinillu peqalernissaanik aningaassaliisoqarnissaanik siunnersuumminik nassiussivoq.

 

Utoqqaat illuinni najugaqartut nammineq ineeqqaminni tv-kkut kanalinik assigiinngitsunik isiginnaarnissaminnik periarfissaqartariaqarput. Arlallit illoqarfinni allani najugalinnik takorpiarneq ajukkaminnik ilaqutaqarput meeraqarlutillu. iPadi atorlugu ungasissumut sianersinnaapput videokkulluunniit facetime skypeluunniit atorlugit sianerlutik.

 

Missingersuutit
Qanoq suliassartaqartiginera, qassiunissaat aningaasaliissutissallu oqallisigineqarsinnaapput.

 

Inassuteqaat

Inassuteqaatigineqarpoq:

 

  • Tv-mi kanalit, internet iPadinullu siunnersuut oqallisigineqassasoq suliniummullu aningaasaliisoqarnissaanik aalajangiisoqassasoq.

     

 

3H: Siunnersuut – Angerlarsimaffeqanngitsunut oqaloqatiginnittartoq

 

Oktobarip ulluisa 24-t Najukkami Ataatsimiititaliami ilaasortaq “Ari” P Rasmussen, angerlarsimaffeqanngitsunut Frelsens Hær-mut Kofoeds Skole-mullu orniguttartunut oqaloqatiginnittartussamik aningaasaliisoqarnissaa pillugu siunnersuummik nassitsivoq.

 

Angerlarsimaffeqanngitsutut inuuneq sorsugassartaqaqaaq ataasiakkaanullu nukippassuarnik atuuffiuvoq. Ulloq "oqilisinniarlugu" oqaloqatigisartagassamik pisariaqartitsipput.

 

2018-imut Missingersuut
: sap.ak.6 á 4 tiimit = 24 tiimit x 700 kr = katillugit 16.800 kr.

 

Inassuteqaat

Inassuteqaatigineqarpoq:

 

  • Angerlarsimaffeqanngitsunut oqaloqatiginnittarnissaq pillugu siunnersuut oqallisigineqassasoq pilersitsiniarnermullu aningaasaliisoqassanersoq aalajangiiffigineqassasoq.

 

 

 

3I: Siunnersuut – meeqqanut qilaatersorneq

 

Oktobarip ulluisa 24-t Najukkami Ataatsimiititaliami ilaasortaq “Ari” P Rasmussen, meeqqanut qilaatinik pisinissaq pillugu siunnersuummik nassitsivoq.

 

Qilaatersortartut peqatigiiffiata kissaatigaa ileqquusup teknikkiatalu inuusukaanut ingerlateqqinnissaa.

Taamaattumik peqatigiiffiup meeqqanut atuartitsineq aallarnisarusuppaa tassungalu atatillugu qilaatinik amigaateqarput.

 

Missingersuut

Qilaatit mikisut qulit á 500 kr = 5000 kr.

 

Inassuteqaat

Inassuteqaatigineqarpoq:

 

  • Meeqqanut qilaatinik pisinissamut siunnersuut eqqartorneqassasoq pilersitsiniarnermullu aningaasaliiffigineqassanersoq aalajangiiffigineqarluni.

 

3J: Siunnersuut – Qinngutsinni arsaattarfiup qullisorneqarnissaa, ungalulerneqarnissaa nutaanillu mål-lerneqarnissaa

 

Oktobarip ulluisa 24-t Najukkami Ataatsimiititaliami ilaasortaq Arnarissoq Fleischer, AHL eqqaani arsaattarfimmi qullilersuisoqassasoq. Tassunga atatillugu siunnersuutigineqarpoq ungalulersuinissaq aamma qajannaatsunik containerinik eqqaaviliinissaq kiisalu nutaanik qassutaasalinnik målilersuinissaq.

 

Qinngutsinni meeqqat inuusuttullu najugallit pinnguarfissaaleqisuupput sammisassaaleqillutillu. Pingaarnertut arsaattarfimmi katerisimaartarput kisianni tassa ukialeraangat taarsiaartalerlunilu arsaattarfimmi arsaassinnaajunnaartarput. Maanna måliusut naammagittaaliutaasarput saviminernik sanaajunerat pillugu, arsap målit ikaarutaa sinaakkutaaluunniit tutsillugu sakkortuumik utersaartarnera meeqqanut tukkaangat annerfigisarmassuk.

 

Arsaattarfik ungaloqanngilaq, arsaattarfimmiit arsaq ungasissumut pisinnaavoq aamma aasakkut arsaattarfiup eqqaa masarlulunilu isortarmat. Eqqaaviit ammaannartut taarsertariaqarput, eqqaavinnik kusanartunik aalajangikkanik tulukkat eqqakkanik siammartitserisarnerat pillugu.

 

Eqqartorneqareersut pitsanngorsarneranut atatillugu atuartut anginerit peqataatinneqarsinnaapput aperalugit ataavartumik tamanna nakkutigisinnaaneraat. Assersuutigalugu nakkutilliisinnaapput arsaattarfik eqqaalu aserfallatsaaliorlugu, akissarsialerlugit klassit anginerit paasisassarsiorlutik angalanissaminnut katersugassanik.

 

Missingersuut

Neqeroorutinik ujartuisoqassaaq missingersuusiortoqassallunilu.

 

Inassuteqaat

Inassuteqaatigineqarpoq:

  • Qinngutsinni arsaattarfiup eqqaata pitsanngorsaavigineqarnissaa eqqartorneqassasoq pilersitsiniarnermullu aningaasaliisoqarnissaa aalajangiiffigineqassasoq

 

 

3K: Siunnersuut – Nuutoqqami sauna

 

Oktobarip ulluisa 24-t sinniisoq Christina Tønder Bell Nuutoqqami saunaliornissaq pillugu siunnersuummik nassitsivoq. Christina Tønder Bell oktobarip ulluisa 30 2018 sinniisussatut aggersarneqarpoq.

 

Kissaatigineqarpoq Nuummi Katersugaasiviup tunuani saunamik angallattakkamik pilersitsisoqassasoq.

 

Ukiukkut nalunneq arlalitsigut peqqinnartuusoq uppernarsarneqartarpoq aammalu nunarsuaq tamakkerlugu nuannarineqaqaluni minnerunngitsumik Nuummi, Sanatoqqap eqqaani sapaatit tamaasa ukiukkut naluttartut naapittarput.

 

Ukiukkut naluttartut saunaqarnera pillugu immami nalunneq ajornannginnerulersissavaa immikkullu pinngortitarsuatta ilaa ilorrisimaarfigineqarsinnaalluni – imaq.

Ukiorpaalunngulersut Sisimiuni angallattakkamik saunateqarput, assut nuannarineqartumik.

 

Sauna atorlugu takornariat immikkuullarissumik misigisassaanik neqeroorfigisinnaavavut ukiukkut ukiuvimmi sikullu akornini nalussinnaanissaannik. Nuuk takornarianit ornigarluarneqarnissaanut nittarsaassinissamut iluaqutaalluassaaq.

 

Utaqqiisaagallartumik nunaminertamik tunniussinerussaaq Niuertoqarfimmi uumarissaasutut atorneqassalluni. Sumiiffik akunnittarfiliorfissaavoq kisianni sanaartortoqannginnerani utaqqiisaasumik sammisassanut atorneqarnissaa periarfissaavoq.

 

Suleqatigiinni suliniut suliaralugu aallarnisalereerput saunassamullu titartagaq suliaralugu maannalu Sanarfinermut Avatangiisinullu Ingerlatsivik attaveqarfigivaat ingerlatsiviullu suliniut tapersersorpaa inissinneqarnissaanut isikkussaanullu isummersuiutigalutik.

 

 

Pineqartut

Nuummi Nuussuarmi Qinngutsinnilu innuttaasut soqutiginnittut tamarmik kiisalu takornariat.

Peqatigiiffittut ingerlanneqarsinnaavoq imaluunniit kommunip ingerlassinnaavaa.

 

Missingersuut

300.000 kr.

 

Inassuteqaat

Inassuteqaatigineqarpoq:

  • Nuutoqqami saunamik pilersitsisoqarnissaanut siunnersuut eqqartorneqassasoq suliniummullu aningaasaliisoqassanersoq aalajangiiffigineqarluni.

 

 

 

 

3L: Siunnersuut – Ilinniartut illussaanik pilersitsineq

 

Oktobarip ulluisa 23-t Najukkami Ataatsimiititaliami ilaasortaq Nadia Aviaq Olsen, Nuummi ilinniartut illussaannik pilersitsinissaq, ilinniarfinni tamani atorneqarsinnaasumik siunnersuummik nassitsivoq.

 

Nuuk tassaavoq ilinniarfeqarfik illoqarfimmilu ilinniartut tamarmik ataatsimoorfigisinnaasaminnik amigaateqarput tassani naapeqatigiissinnaapput inuttut ilinniakkatigullu attaveqatigiissinnaanngorlutik.

 

Iliuuserisassat:

  • Sumiinnissaa – illu

  • Atuakkerivik

  • Café / kantiina

  • Mentoreqartitsineq – soorlu mentorix / entreprenørskabi – inuusuttunut aqqutissiuineq.

 

Innuttaasunik peqataatitsineq

Ilinniartut illussaanik pilersitsiniarnermut atatillugu ingerlarnga, ilinniartut peqataanissaannut qaaqquneqassapput taamaalilluni atuisut pisariaqartitaat kissaataallu pioreersut naammassineqarniassammata.

 

Missingersuut

Missingersuusiorneq suliarineqaannassaaq. Tassunga atatillugu suliniut siunnersuutinut/pilersitsiniarnermut atatillugu ilanngunneqarsinnaanersoq aamma siunertamut inissaqarnissaq imaluunniit illussaqarnersoq ujartuiffigineqassaaq. Suleqatigineqarsinnaasut suliniummut tunngasuutillit aammalumi aningaasaliisinnaasoqarsinnaanersoq misissorneqassaaq.

 

Inassuteqaat

Inassuteqaatigineqarpoq:

  • Ilinniartut illussaannik pilersitsinissamik siunnersuut oqallisigineqassasoq suliniummullu aningaasaliisoqassanersoq aalajangiiffigineqarluni.

 

 

 

3M: Siunnersuut – Nuummi Parki

 

Oktobarip 23-ani Najukkami Ataatsimiititaliamut ilaasortaq Nadia Aviaq Olsen, Nuummi Parkiliornissaq pillugu aningaasaliisoqarnissaanik siunnersuummik nassiussivoq.

 

Suliniut Nuup eqqaani pinngortitarsuaq pitsaanerusumik atorneqarnissaa sammineqarpoq taamaalilluni innuttaasunut tamanut ukioq naallugu ilorrisimaarfigineqarsinnaalissammat.

 

Nuuk alliartorpoq illoqarfiullu ineriartorneranut eqqaamasassaraarput pinngortitarsuup inuuffiginissaa ulluinnarnilu qanimut atorluarsinnaanissaa qasuersaarfigisinnaanissaa ajornannginnerusumik pisinnaalissammat.

 

Suliassanut assersuutit:

  • Sioraaqqanik aqqusinniornissaq

    (soorlu assersuutigalugu pinngortitarsuaq aneerussivinnut, pitsorluttunut kørestolertunullu aqqutigiuminartunngortillugu).

  • Sanaartorfigissaaneq

  • Isikkivik

  • Perusuersartarfik

 

Inassuteqaat

Inassuteqaatigineqarpoq:

 

  • Siunnersuut oqallisigineqassasoq suliniummullu aningaasaliisoqarnissaanik aalajangiisoqassasoq.

 

 

3N: Siunnersuut- Innuttaasunut tamanut timersorneq/ ilaqutariinnut timersorneq

 

Oktobarip ulluisa 23-t Najukkami Ataatsimiititaliami ilaasortaq Nadia Aviaq Olsen, Nuummi ilaqutariit timersortarfissaanik pilersitsiniarneq pillugu siunnersuummik nassitsivoq.

 

Ullumikkut timersorniarutta ukiut timersuullu sunaanersoq apeqqutaasarput. Ilaqutariinnut timersoqatigiinniartunut soqanngilaq timersoqatigiinnissamut nuannaaqatigiinnissamullu periarfissaqannginnera patsisaalluni. Neqeroorutip innuttaasut qanorluunniit ukiullit ataatsimut timersoqatigiinnissaat periarfissarilissavaat, innuttaasut assigiinngitsut ukiuilu assigiinngikkuutaat ataatsimoornissaat periarfissarilerlugu. Neqeroorutip ulluinnarni timersornissamut periarfissiissaaq tassungalu atatillugu innuttaasut imminnut piffissaqarfigilissapput meeraagunik/inuusuttuugunik aammali inersimasuugunik/utoqqaagunilluunniit.

 

Iliuuserisassat:

  • Hallit pitsaanerusumik atornissaat

  • Inissaqartitsineq – ilaqutariinnut/innuttaasunut

 

Inassuteqaat

Inassuteqaatigineqarpoq:

  • Innuttaasunut timersorsinnaalernissaq pillugu siunnersuut eqqartorneqassasoq suliniummullu aningaasaliisoqassanersoq aalajangiiffigineqarluni.

 

3O: 2018-mut nalinginnaasumik aningaasaliissutinik agguaassineq

 

Suliassamik eqikkaaneq

Nuummi Najukkami Ataatsimiititaliamut aningaasaliissutit Kommunalbestyrelsimit ulloq 28. aggusti 2018 akuersissutigineqarput, tulliuttut tunngavigalugit naatsorsorneqarsimasut:

  1. amerlassusaat aallaavigalugit 223 koruunit naatsorsorneqassappat, Nuummi Najukkami Ataatsimiititaliamut aningaasaliissutit ukiumut 3.970.000 koruuniussapput. Tamatuma saniatigut inunnut qulinut qaammammut 2.124 koruuninik akissarsiaqartitsisoqassappat, ukiumut 255.000 koruuniussapput. Aningaasartuutit katillugit 2019-imiit ukiumut 4.225.000 koruuniussapput.

 

2018-imi Najukkami Ataatsimiititaliaq qaammatinut pingasunut (oktober-december) aningaasanik agguarneqassapput. Ajunngitsorsiassat ilanngaatereerlugit Najukkami Ataatsimiititaliap 2018-imi aningaasat katillugit 992.500 koruunit akisussaaffigilissavai.

 

Najukkami Aataatsimiititaliaq Nuummi innuttaasunut pitsanngorsaataasinnaasunik aningaasat atornissaannut pimoorussillutik suliniuteqarpoq aammalumi innuttaasunik Najukkamilu Ataatsimiititaliami ilaasortat namminneq siunnersuutaannik ingerlaavartumik suliaqartassallutik.

 

Oktobarip qeqqani tamanut tusarliussaavoq, innuttaasut tamarmik Najukkami ataatsimiititaliamut suliniutinut aningaasaliinissamut qinnuteqarsinnaasut. Qinnuteqaammut immersugassaq periusissarlu Najukkami Ataatsimiititaliap nittartagaani takuneqarsinnaavoq.

 

Ukioq 2018 qaangiutilermat Najukkami Ataatsimiititaliaq nalinginnaasumik 2018-imut aningaasanik agguaassinissaq piaarnerpaamik aalajangiiffigissavaat.

 

Missingersuutit

2018-imi Najukkami Ataatsimiititaliap ajunngitsorsiassat ilanngaatigereerlugit 992.500 kr akisussaaffigai.

 

Inassuteqaat

Inassuteqaatigineqarpoq:

  • Najukkami Ataatsimiititaliap oktobarip ulluisa 30-anni ileqquusumik ataatsimiinnermini 2018-imut aningaasanik agguaassinissamut nalunaarsuiffimmik suliaqassasoq nalinginnaassumilu aningaasanik agguaassisarnissamut atuisarnissamullu nalunaarsuiffik akuersissutigalugu.

 

4. Allat taasariaqartut

 

5. Imaqarniliap akuerineqarnera