Ileqquusumik pingajussaanik ataatsimiinneq

Nuummi Najukkami Ataatsimiititaliaq

 

Imaqarniliaq

 

Marlunngorneq ulloq 4. decembari 2018 nal. 16.30 – 18-30.

 

 

 

Ilaasortat

Nivi Katrine Christensen

Arnarissoq Fleischer

Moses Masik Marcussen-Mølgaard

Ujammiugaq Engell

Poul Petersen

Finn Meinel

Aviaq Brandt

Nadia Aviaq Olsen

”Ari” Hansine P Rasmussen

Naleraq Eugenius

 

Ataatsimeeqataasinnaanani nalunaartoq

Arnarissoq Fleischer

Finn Meinel

 

Aggersarneqarput

Esmar Bergstrøm

Jutho Maline Sofie Wilche

 

 

 

Ullormut oqaluuserisassat

 

Imarisai

1. Oqaluuserisassat akuerineqarnerat 3

2. Nalunaarutit/ Ilisimatitsissutit 3

2A: Suliassat pilersaarutaasut killiffiat 2018-mullu naligiissaarineq. 3

3. Immikkoortut aalajangiiffigisassat 5

3A: Qinnuteqaat: Hans Egedep Oqaluffiani juullimut tusarnaartitsineq. 5

3B: Qinnuteqaat: Kaassassuk – qinngasaarisarmik pinaveersaartitsineq. 5

3C: Qinnuteqaat: Karsit eqqaamasanik imallit – meeqqat tamarmik angerlarsimaffeqarnissaminnik piginnaatitaaffeqarput 6

3D: Qinnuteqaat: Nordisk Koncertkor – Ukiortaami tusarnaartitsineq. 8

3E: Siunnersuut – Ippiarsummi sammisassaqartitsivimmut tapiissuteqarnissaq. 10

3F: Qinnuteqarneq – Røde Kors, juullimut ikiorsiinissaq. 11

4 Taasariaqartut allat 11

5 Imaqarniliap akuerineqarnera. 11

 

 

 

1. Oqaluuserisassat akuerineqarnerat

Oqaluuserisassanut ilanngussaq: Røde Korsip qinnuteqaataa imm 03F-itut ilanngutissaaq.

Oqaluuserisassat ilanngussartalerlugit akuersissutigineqarput.

 

1. Nalunaarutit/ Ilisimatitsissutit

 

Siulittaasoq:

• Sinniisussat marluk tikilluaqquneqarput Esmar Bergstrøm aamma Jutho Maline Sofie Wilche, taakku ullumikkut ataatsimeeqataapput Arnarissoq Fleischer aamma Finn Meinel ataatsimeeqataasinnaanngimmata sinnerlugit.

• Innuttaasunit saaffiginnissutit assigiinngitsut innuttaasunillu oqaloqateqartarsimanerit pillugit paasissutissiisoqarpoq.

• Arnajaraq Joelsen Qinikkanut Allatseqarfimmeersoq imaqarniliussaaq aammalu Jill Hellesen sinnerlugu kommune sinnerlugu maaniissalluni.

 

2A: Suliassat pilersaarutaasut killiffiat 2018-mullu naligiissaarineq

 

Ukioq 2018-mut aningaasaliissutaasut kr 992.500 – ipput. Aningaasanik atuineq 4. decembari ima isikkoqarpoq:

 

Aningaasartuutit	Aningaasartaat/kr
Ataatsimiinnermi sutugassat 2018	3790
Workshop (aaqqissuussineq + sutugassat)	10.010
Nuuk Ugeavisimi nalunaarutit	2500
Nuummi Apummik Ilusilersuineq festival (domæneregistrering/nittartagaq)	299
Innuttaasumit qinnuteqaat: utoqqaat tamaasa Juullimut kaageeraliunnissaannik	20.000
Inngertartur – meeqqanut qilaatinik pisineq	5.000
Katillugit	41.599 koruunit

 

 

Aningaasat atorsinnaasat:	Atuisimaneq:	Killiffik:
kr. 992.500	41.599	kr. 950.901

 

 

 

Ataani takuneqarsinnaapput 2018-imi suliassat pilersaarutaasut killiffii

 

Suliassaq/suliniut	Killiffia	Aningaasat akuerisat koruuninngorlugit
Lumnious nuuk – aallarnissaatitut suliassaq. Unnuk Kulturisiorfik	Naleraq Eugenius tamassuminnga suliaqarpoq.	120.000
Inussiviup pitsaanerusumik atorneqarnissaa	Allatseqarfik Timersortarfimmi siulersuisunut allakkamik nassitsisimavoq akissutissaalu utaqqivaa.	200.000
Oqaluttuarisaaneq pillugu allagartalersuutit	Suleqatigiissitaliortoqareerpoq	100.000
Apummik ilusilersuineq.	Suleqatigiissitaliortoqareerpoq suliamillu ingerlatsisussaq atorfinitsinneqareerluni.	149.701 (katillugit 150.000 koruuninit 299 koruunit missingi atorneqarput)
Arsaattarfiup eqqaani qullilersuineq	Maannakkut Nukissiorfit, teknikkimut ingerlatsivik susassaqartitsinermullu ingerlatsivik oqaloqatigineqaqattaarput. Teknikkimut Ingerlatsivik qinnuigineqarpoq qullilersornissaanut ungalulernissaanullu tunngatillugu entreprenørimit neqeroorummik pissarsiniaqqullugu . Ingerlatsiviit marluk arsaattarfiup qullileqarneranut ataavartumik ingerlatsinermut aningaasartuutissat paasilluaqqaassavaat.	100.000
Katillugit		669.701 koruunit

 

Aningaasat qulaani pineqartut tamarmik atugassanngortinneqassappata, 2018-imi suli 281.200 koruunit sinnerutissapput.

 

 

Inassuteqaat:

Inassuteqaatigineqarpoq:

– ilisimatitsissut tusaatissatut tiguneqassasoq

 

Aalajangiineq

Ilisimatitsissut tusaatissatut tiguneqarpoq.

 

 

 

 

 

1. Immikkoortut aalajangiiffigisassat

 

 

3A: Qinnuteqaat: Hans Egedep Oqaluffiani juullimut tusarnaartitsineq

 

Najukkami Ataatsimiititaliaq novembarip 21-ani Hans Egedep Oqaluffiani decembarip 21-ani nal 19.30 tusarnaartitsinissamut aningaasatigut tapiiffigineqarnissamik qinnuteqaammik tigusaqarpoq. Tusarnaartitsineq Nuummi innuttaasunut akeqanngilaq

Katillugit 20.000 koruunit qinnuteqaatigineqarput nipilersortut sisamat erinarsoqatigiillu akissarsiassaannut atugassat.

 

”Ukiuni arlaqalersumi ileqquulersimavoq Nuummi ulloq Ullukinnermi Hans Egedep Oqaluffiani tusarnaartitsineq ingerlattarlugu. Tamannalu aamma ukioq manna ingerlanneqassaaq aningaasaliisoqarpat. Ileqqoq nuannersoq Nuummiut qilanaaralugu tusarnaartitsinissaq pilerigisartagaat akeqanngitsumik tusarnaariarsinnaallutik aammalu tamanut ammasumik tusarnaariarfigineqarsinnaasoq tamanullu naleqquttoq meeqqaniit utoqqarnut periarfissiisoq. Tusarnaartitsinermi Juullisiutit pop-klassiskerpalaartut operaniillu atuisoqassaaq".

 

Inassuteqaat

Inassuteqaatigineqarpoq

• Najukkami Ataatsimiititaliap aalajangissagaa siunertamut aningaasatigut tapiissuteqartoqassanersoq

 

Aalajangiineq

• Aalajangerneqarpoq, Hans Egedep Oqaluffiani juullimut tusarnaartitsinissamut 20.000 kr.-nik tapiissuteqartoqassasoq.

 

Ilanngussat

1. Innuttaasumit qinnuteqaat

2. Missingersuutit

 

 

 

 

3B: Qinnuteqaat: Kaassassuk – qinngasaarisarmik pinaveersaartitsineq

 

Najukkami Ataatsimiititaliaq novembarip 27-anni Red Barnet-imit aningaasatigut tapiiffigineqarnissamik qinnuteqaammik tigusaqarpoq januaarip 19-anni 2019 qinngasaaruttarnermik pinaveersaartitsinissaq pillugu aaqqissuussinissamut atugassanik. Tassani ualikkut Nunatta Atuagaateqarfiani ilaqutariinni ikiortarialinni meeqqanut 20-t missaannut atuffassisoqarnissaa pineqarpoq.

Katillugit qinnutigineqarput 15.000 kr.

 

"Suliassaq tassaavoq qinngasaaruttarneq pillugu periusissiap annertuup ilaa annikinnerusoq, tassanilu pingaarnertut Nuummi meeqqat inuusuttullu akornanni qinngasaaruttarnerup, ajornartorsiutaaqisup pinaveersaartinneqarnissaa siunertarineqarpoq. Ajoraluartumik ilisimatusarnerup takutippaa, meeqqat, inuiaqatigiinni ikiortariaqarnerusut, aamma taakkuusarmata qinngasaarneqarnerpaajusartut.

 

Suliniummi siunertarineqarpoq ataatsimoornermik pitsaasumik pilersitsisoqarnissaa meeqqallu ikiortariaqartut pitsaasunik misigisaqartinnissaatNunatta Atuagaqaateqarfiani Nuummiittumik Kaassassuk pillugu ualikkut atuffassisoqarneratigut, taavalu meeqqat inuusuttullu qinngasaaruttarneq pillugu oqaloqatigineqassapput, qinngasaaruttarnerullu qanoq iliorluni unitsinneqarsinnaanera eqqartorneqassalluni. Sammineqartoq pillugu meeqqat eqqarsaataat titartagaallu Nuummi qinngasaaruttarneq pillugu meeqqat inuusuttullu sullinnerini siunissami atorluarsinnaavagut.

 

Aaqqissuussineq naammassippat, meeqqat tamarmik atuakkanik arlalinnik pingasunik-sisamani angerlaassissapput, taakkulu ilagissavaat ”Kaassassuk”, aamma aqerluusat qalipaatillit/tussit.”

 

 

Inassuteqaat

Inassuteqaatigineqarpoq

• Najukkami Ataatsimiititaliap aalajangissagaa siunertamut aningaasatigut tapiissuteqartoqassanersoq

 

Aalajangiineq

9-t akuersipput, Nadia Olsen-ili taaseqataanngimmat, taamaasilluni qinnuteqaatigineqartoq akuersissutigineqarpoq. Aalajangerneqarpoq, suliniut Kaassassuk 15.000 kr.-nik tapiissuteqarfigineqassasoq.

 

Ilanngussat

1 Qinnuteqaat missingersuutitalik

 

 

 

3C: Qinnuteqaat: Karsit eqqaamasanik imallit – meeqqat tamarmik angerlarsimaffeqarnissaminnik piginnaatitaaffeqarput

 

Najukkami Ataatsimiititaliaq novembarip 27–anni Red Barnet-imit aningaasatigut tapiiffigineqarnissamik qinnuteqaammik tigusaqaqqippoq, tassani pineqarlutik meeqqanut angajoqqaanullu decembari 2018-januaari 2019-imi sammisaqartitsinissamut atugassat, meeqqanullu peqataasunut karsiliortitsinissaq eqqaamasanut atugassaannik. Aningaasat 18.500 koruunit qinnuteqaatigineqarput.

 

”Suliniummi pingaarnertut sullinniarneqarputNuummi meeqqat angerlarsimaffiup avataanut inissinneqarsimasut ilaqutariinni paarsisartuni imaluunni ulloq unnuarlu najugaqarfimmiittut. Tassaapput meeqqat angajoqqaatut annivigisaminnik attaveqartartut, angajoqqaatullu annivigisaminnik ataavartumik attaveqartarnissaminnik pisariaqartitsisut.

 

Suliniummi siunertarineqarpoq meeqqat pitsaasunik angajoqqaatik annivigisatik peqatigalugit misigisaqartinnissaat pitsaasumik attaveqalernissaat anguniarlugu. Suliniummi inersimasumik pitsaasumik attaveqarnissaq qitiutinneqassaaq meeqqat silarsuarmut tatiginninnerat nukittorsarniarlugu isumassortiminnullu attaveqarluarnerulernissaat annertusarniarlugu. Suliniummi qularnaatsumik attaveqartarnerisa ajornannginnerulersinnissaat siunertarineqarpoq.

 

Akuttunngitsunik sammisaqartoqartassaaq, ullut 14-ikkaarlugit, aammalu meeqqat, angajoqqaat/isumassortillu biilinik aaneqarlutillu angerlaanneqartassapput.

 

Suliniummi meeqqat tamarmik karsiliussapput eqqaamasaminnik toqqorterisarfissaminnik, meeqqat suliniutip ingerlanerani misigisaannik nuannersunik qitiutitsilluni. Karsimi eqqaamasanik imaqartussami ilaatigut toqqorneqarsinnaasut tassaassapput, sammisaqarnerni atorneqarsinnaasut, immaqalu assit, sammineqartartuni misigisat amerliortortillugit arriitsunnguamik amerliartortinneqarsinnaasut.”

 

Allatseqarfimmit oqaaseqaatit:

Red Barnet Meeqqanut Ilaqutariinnullu Ingerlatsivimmut suleqatigiinnissamik isumaqatigiissuteqarsimavoq, kommunimiilli tapiissutisineq ajorluni.

 

Inassuteqaat

Inassuteqaatigineqarpoq

• Najukkami Ataatsimiititaliap aalajangissagaa siunertamut aningaasatigut tapiissuteqartoqassanersoq

 

Aalajangiineq

9-t akuersipput, taavalu Nadia Olsen taaseqataanngimmat, taamaasilluni qinnuteqaatigineqartoq akuersissutigineqarpoq. Aalajangerneqarpoq, suliniut Karsit eqqaamasanik imallit 18.500 kr.-nik tapiissuteqarfigineqassasut.

 

Ilanngussat

1 Qinnuteqaat missingersuutitalik

2 Kommuneqarfik Sermersuumik suleqateqarnissamik isumaqatigiissut

 

 

 

3D: Qinnuteqaat: Nordisk Koncertkor – Ukiortaami tusarnaartitsineq

Najukkami Ataatsimiititaliaq novembarip 23-anni Nordisk Koncertkorimit Hans Egedep Oqaluffiani Ukiortaami Nuummi innuttaasunut tusarnaartitsinissarsuarmut aningaasatigut tapiiffigeqqulluni qinnuteqaammik tigusaqarpoq. Qinnuteqaatigineqarput 19.020 koruunit.

 

Siunertarineqartoq:
”Erinarsoqatigiit aammalu illoqarfimmi Nipilersornermik Ilinniarfiup suleqatigiinnerisa nukittorsarnissaat qaninnerulersinnissaallu:

• Nipilersornermik Ilinniarfimmi meeqqat erinarsoqatigiittartui tusarnaartitsinermi marloriarlutik-pingasoriarlutik peqataassapput, taamaasillutillu tusarnaartitsinermi sungiussisimasunik suleqateqarnermik misigisaqartinneqarlutik. – aamma erinarsoqatigiit Nipilersornermik Ilinniarfiup juullimut tusarnaartitsinerani peqataassapput.

• Nordisk Koncertkorimi siulersorti Bente Colding-Jørgensen, Nuummiinnermini Nipilersornermik Ilinniarfimmi ilinniartitsisut ilinniaqqinnissaannik neqerooruteqarniarpoq.

• illoqarfimmi innuttaasut utoqqaanerusut aamma nipilersornerup nuannersuanik misigitinnissaasa qulakkeerneqarnissaa. Erinarsoqatigiit Nuup Busiinik suleqateqarlutik tusarnaartitsinissamut illoqarfimmi utoqqarnik aallerlutillu angerlaassisarniarput.

Tusarnaartitsinermi ilaatigut klassiskimik nipilersukkat Bach, Gade aamma Fauré erinarsoqatigiinnut, pattagiarsuarmut aamma obo atorlugu nipilersuutinut naleqqussakkat atorneqassapput. Nordisk Koncertkorip pattagiarsuarsortartoq Aeji Choi aamma obo-tartoq Joakim Dam Thomsen tusarnaartitsinermi peqataajartoqqullugit Kalaallit Nunaannut qaaqqusimavai. Nipilersuutit ilaat tusarnaartitsinermut akuutinneqartussat kalaallinut tusarnaartussanut aatsaat siullermeerutaasumik tusarnaartitsissutaassapput.”

Allatseqarfimmit oqaaseqaatit:

Kommuneqarfik Sermersuumi Kulturimik Siuarsaanissamut Siunnersuisooqatigiit Nordisk Koncert Korip qinnuteqaataanik itigartitsissuteqarsimapput. Taamaasillutik Nordisk koncertkor kommunimit aningaasatigut tapiiffigineqassanngillat.

 

Inassuteqaat

Inassuteqaatigineqarpoq

• Najukkami Ataatsimiititaliap aalajangissagaa siunertamut aningaasatigut tapiissuteqartoqassanersoq

 

Aalajangiineq

Ujammiugaq Engell inimit ataatsimiiffiusumit anigallarpoq, suliamut attuumassuteqarnini nalunaarutigalugu. Aalajangerneqarpoq, Nordisk Koncertkorip Ukiortaami tusarnaartitsinissaanut ilaannakortumik 100.000 kr.-nik tapiissuteqartoqassasoq.

 

Ilanngussat

1. Qinnuteqaat

2. Missingersuutit

3. Suliassap allaaserineqarnera

3E: Siunnersuut – Ippiarsummi sammisassaqartitsivimmut tapiissuteqarnissaq

Najukkami Ataatsimiititaliami ilaasortaq Arnarissoq Fleischer novembarip 23-anni 2018 Ippiarsummi sammisassaqartitsivimmut tapiissuteqartoqarnissaanik siunnersuummik nassiussaqarpoqutoqqarnik sammisassaqartitsisarnissaq ulluinnarnilu inuunerannik imaqarnerulersitsinissaq siunertaralugu. Siunnersuutigineqarpoq siunertamut 150.000 koruuninik tapiissuteqartoqassasoq.

 

Aningaasartuutissat ukununnga atussapput:

• Træningsbænk, manngertitsisarneq pinaveersaarniarlugu iluaqusiinissarlu anguniarlugu. Bænke akisungaatsiarpoq, pisiarinissaanullu akissaqartoqanngilaq.

• Radio nutaaq: Radioat aserorsimavoq, ulluinnarnilu aliikkutaasa pingaarnerit ilagivaat, taannalu atorlugu tallimanngornermi qitikkaangamik nipilersukkanik tusarnaarfigisarpaat.

• Brætspil: Sammisassaqartitsivik spilinik assigiinngitsunik amigaateqarpoq, spillertarfik, ludo assigisaallu.

• Asiarnerni sutugassat: Sammisassaqartitsiviup atuisuni upernaakkut aasakkullu pinngortitamut asiartittarpai. Ippiarsummi sammisassaqartitsivimmi atuisut ilaat illoqarfimmi najugaqartarmata nerisassarsiutissanut atortussarsiutissanullu allanut missingersuutitigut aningaasaliisoqarnikuunngilaq. Taamaattumik atuisut aningaasartuutissanut nammineq akiliuteqartinneqartarput. Sammisassaqartitsivik puisimik ilivitsumik, tikaagullimmik assigisaannilluunniit tapiiffigineqarsinnaagaluarpoq.

• Juullerpalaartitsineq/aliikkutassaqartitsineq: juullerpalaartitsinissamut tapiissuteqarnissaq, tassani sammisassaqartitsivik aliikkusersuisussanik avataaneersunik qaaqqusisinnaavoq. Sammisassaqartitsivik tamatumunnga aningaasaliissuteqarsinnaanngilaq, nalinginnaasumik ingerlatsinermut aningaasartuutissat avataaniimmat.

   

Allatseqarfimmiit oqaaseqaatit

Allatseqarfik Isumaginninnermut Ingerlatsivimmiit oqaaseqaatinik pissarsiniassaaq, taakkulu ataatsimiinnermi saqqummiullugit. Allatseqarfiup ataatsimiinnermi oqaatigaa, Isumaginninnermut Ingerlatsivik siunnersuummut oqaaseqaatissaqanngitsoq. Kisianni erseqqissaatigineqarpoq Nuummi utoqqaat illui marluummata. Utoqqaat Illuat sammisassaqartitsivimmik sanatitsilereerpoq, taannalu 2019-imi naammassissaaq.

 

Inassuteqaat

Inassuteqaatigineqarpoq:

• Najukkami Ataatsimiititaliap siunnersuut eqqartussagaa aalajangerlugulu siunertamut aningaasanik atuisoqassanersoq.

 

Aalajangiineq

Aalajangerneqarpoq, Ippiarsummi Sammisassaqartitsivik ilaannakortumik 20.000 kr-nik tapiiffigineqassasoq imaattumik tunngavilersuutitalerlugu:

Najukkami Ataatsimiititaliap qinnuteqaat taperserusukkaluarpaa, kisiannili missingersuutinik eqqortunik peqarnissaq kissaatigalugu, kaammattuutigalugulu nutaamik erseqqissumik missingersuutitalimmik qinnuteqaasiortoqassasoq. Qinnuteqaat juullerpalaartitsinissamut spillerfissanullu nalunaaqutserlugu ilaannakortumik 20.000 kr-nik aningaasartalerlugu akuersissutigaat.

 

Ilanngussat

Soqanngilaq

 

 

 

3F: Qinnuteqarneq – Røde Kors, juullimut ikiorsiinissaq

 

Røde Kors decembarip pingajuanni 2018 ilaqutariinnut pissaaleqisunut juullimut ikiorsiinissaminnut aningaasatigut tapiiffigeqqullutik qinnuteqaateqarput. 75.000 koruunit qinnuteqaatigineqarput.

 

 

Aalajangerneq:

Moses Masik Marcussen- Mølgaard suliamut attuumassuteqarnini nalunaarutigalugu inimit ataatsimiiffiusumit anillakkallarpoq.

9-t akuersipput, Nadia Olsen taaseqataanngilaq. 75.000 kr.-nik aningaasartalerlugu akuersissutigineqarpoq.

 

4 Taasariaqartut allat

 

5 Imaqarniliap akuerineqarnera.

 

Imaqarniliaq email-ikkut akuerisassanngorlugu ilaasortanut nassiunneqassaaq.