Blokkini – eqqumiitsuliornissamut qinnuteqaat

Blokkini – eqqumiitsuliornissamut qinnuteqaat

 

Ulloq 5. juli 2019, Nuummi Najukkami Ataatsimiititaliaq, Nunat Avannarliit Kulturikkut pikialaartitsinissaannut Nuummi pisussamut, eqqumiitsuliornermut tunngasortaanut atatillugu allaanerusumik immikkut takutsitsinissamut atasumik ininik saqqummersitsilluni atugassanik pilersitsinissamut aningaasatigut qinnuteqaammik tigusaqarpoq.

 

Qinnuteqaatigineqarput katillugit 93.000 koruunit.

 

Qinnuteqaammi ilaatigut ima allaqqavoq:

 

“Nuummi Eqqumiitsulianik Saqqummersitsiviup ininik saqqummersitsivissanik saqqummersitsinernillu Nuuk Nordisk Kulturfestival-imut atatillugu allaanerusumik saqqummersitsinissaq kissaatigaa uku suleqatigalugit Nuuk Nordisk, Disco Art Festival aamma Teater Freez Production.

 

Teater Freez Production aningaasaliiffigineqareerpoq, Nuuk Nordisk Kulturfestival-imut atatillugu isiginnaagassiaq Sletten i blokkene i Nuuk isiginnaartitsissutiginissaanut. Meeqqeriviusimasut marluk atorunnaartut attartussavaat, tassanili aamma mikinerusunik ininik peqarpoq, taakkulu eqqumiiginarsinnaasunik misileraataasumillu saqqummersitsiviussapput, inuit Nuummeersut takuniarsinnaasaat.

 

Sermeq pulje-mit tapiiffigineqarluni Bolatta Silis-Høegh Holmit Illuanni micro-mik saqqummersitsivoq ullut pingasut inerlanerinnaanni inunnit 250-nit allakkarneqartumik. Inunnut misigisarujussuusimavoq, tamassumalu pileritsatsippaatigut suli allaanerusumik ineeqqani saqqummersitsinissamik misileraanissatsinnut. Maannakkut blok 2-mi 6-milu eqqumiitsulianik inissiinissatsinnut akuerisaavugut, neriuutigaarpullu tamanna tapersissagissi.

 

Siullertut eqqumiitsuliortut inuusunnerusut inissaqartinnissaat kissaatigaarput. Århus Kunstakademimi naammasserlaaq Parma O Brandt, Inuuteq Storch, Ivinguak Storch Høegh isumaqatigiissuteqarfigigallareerpavut, taavalu eqqumiitsuliortoqatigiinnit LARM – Jacob Fælling-imit Kenneth Olsen-imillu HOME // HJEM // ANGERLARSIMAFFIGA saqqummersinneqassaaq. Aaqqissuussamut uiggiullugu Disco Arts Festival-imit eqqumiitsuliortut inini performance-mik takutitsinissaannut qaaqqorusuppavut. Taakkua Nuummut tikereersimassammata taamaallaat immikkut saqqummersitsinissamut atasumik akissarsitinnissaat pineqarpoq.”

 

Aningaasaqarnermut Allatseqarfimmit oqaaseqaatit

Nuummi Najukkami Ataatsimiititaliap 2019-mi Nuuk Nordisk Kulturfestival-imut atatillugu aningaasaliissutigineqartut ataani paasissutissiissutigivai:

 

– Nuuk Nordisk Kulturfestival (angerlarsimaffeqanngitsunut tajat akeqanngitsumik, aaqqissuussat meeqqanut inuusuttunullu sammitinneqartut): 300.000 kr.

 

– Teater Freez Productions (isiginnaartitsissut Sletten i blokkene): 200.000 kr.

 

– Nordisk Koncertkor: 34.000 kr.

 

Ukioq 2019-imi Nuuk Nordisk Kommuneqarfik Sermersuumit katillugit 800.000 koruuninik aningaasaliiffigineqarpoq.

Kommunip 2019-imut missingersuutaaniit 300.000 koruunit kiisalu Aningaasaateqarfik Sermeq aqqutigalugu 500.000 koruuninik immikkoortitsisoqarpoq.

 

Inuiaat piorsarsimassusaannut oqaluttuarisaanerannullu immikkoortortaq

Kulturimut Aaqqissuussinermullu immikkoortumit oqaatigineqarpoq saqqummersitsineq pissanganartuusoq init illoqannginnersallu pillugit inuit takorluueriaasaat unammillerneqartarmat. Aammattaaq suliniut illoqarfiit pingaarnersaattut anguniakkamut naapertuuppoq, tassalu illoqarfimmi eqqumiitsuliat takussaanerunissaat.

Inassuteqaat

Inassutigineqarpoq:

– suliniut aningaasatigut tapiiffigineqassanersoq Nuummi Najukkami Ataatsimiititaliamit aalajangiiffigineqassasoq

 

Ilanngussat

1. Qinnuteqaat

2. Missingersuut

Nivi Christensen suliamut attuumassuteqarnini pissutigalugu aalajangeeqataasinnaanani nalunaarpoq, inilu qimallugu.

 

Qinnuteqaat akuersissutigineqassasoq aalajangerneqarpoq, siunertamullu 93.000 koruuninik tapiissuteqartoqarluni.

2 taaseqataanngillat 7 akuersipput.