Innuttaasunut

Aaqqeeqataanissamut peqataagit

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Borgmester Charlotte Ludvigsenimit

Siumumi ilaasortaq Inga Dóra G. Markussen, pisarneq malillugu ullumikkut uannut isornartorsiuivoq, pisarneq malilluguttaaq isornartorsiuinera politikkimut tunnganngilaq, kommunip aningaasaqarneranut tunnganngilaq imaluunniit innuttaasunut periarfissarititaasut pillugit isornartorsiuinerunatik. Aammaarluni kommunimi ingerlatseriaaseq illuatungiliuttuniit puffaammissutigineqarpoq. Oqaluuserisassaq ammasuussava imaluunniit matoqqasuussava, aamma oqaluuserisassaq matoqqasoq kikkunnit eqqartorneqarsinnaava? Tassa illuatungiliuttut isornartorsiuinerisa qiterisaa.

Soorunami aamma maannakkut kommuninik ingerlatsinermut inatsimmik unioqqutitsinangalu suliamik suliaqarnermi pissuserinnissamik avaqquttaarisimanngilanga. Iliuuserisimasakka tassaapput, aalajangiinerit aammalu paasissutissat aalajangerninnut attuumassutissuteqartut sukkanerpaamik innuttaasunut paasissutissiissutiginissai, iliuutsit isumanni Siumumiit tapersersorneqarsinnaasut.

Tunngavilersorluakkanik politikkikkut oqallilluarnissaq nuannarisuuara, politikkikkut isummat eqqartorneqaleraangata aammalu aaqqiissutissatut siunnersuutigineqartut misilittarneqaleraangata. Ajoraluartumik piffissami sivitsortumi kommunalbestyrelsemi taamatut oqallinneq misigisimanngilara. Allaffisorluni ingerlatsinermut tunngasunik suarsuit pillugit illuatungiliuttut akornusersuiniarnerannut piffissamik atueqqinnianngilanga, taamaammat tamakkununnga akuleruteqqinniarnanga aalajangerpunga.

Illuatungaanili politikkikkut oqallinnissamut aaqqiissutaasinnaasunillu eqqartuinissamut piareersimajuaannarpunga, aamma Inga Dora G. Markussen pitsaanerusunik siunnersuutinik saqqummiussisinnaappat, taava siunnersuutaanut tusarnaarluaqqissaarumaarpunga. Tassami uanga qineqqusaarnissara aatsaat ukiut marluk qaangiuppata aallartinnissaa eqqarsaatigaara.