Kommuneqarfik Sermersuumi illiuaraliornissannut eqqarsaatigisassat, inissitassat, malittarisassallu ersarissut amerlapput. Nunaminertanulli Oqartussaqarfik ingerlariaatsimut ikiuinissaminut apeqqutissatillu tamaasa akinissaanut piareersimavoq.
Illuaraliornissavit pilersaarusiunnginnerani Nunaminertanut Oqartussaqarfik attavigeqqaarnissaa pitsaanerpaajuaannarpoq. Sanaartulinnginnermi malittarisassat tamaasa, ingerlariaaseq, allaffissornermilu aqqusaagassat oqaluttuarisinnaavaat.
”Innuttaasut amerlasuut isumaqartarput, umiatsiarlutik illuarassap inissaanik nassaaginnariarlutik sapaatip akunnerata naanerata tulliani illuaraliorlutik aallartissinnaassallutik. Ajoraluartumik taamaanngilaq. Allaffissorneq annertungaatsiarpoq, sanaartulinnginnermilu tamanut tusarniaassutigineqaqqaagassaqartarluni.” Nunaminertanut Oqartussaqarfimmi sullissisoq Gerth Lyberth oqarpoq.
Immikkoortoq illuaraqarfiua?
Illuaraliornissannut nunaminertamik piukkussaqalereersimaguit, immikkoortortami illuaraliortoqarsinnaanersoq nammineq takusinnaavat. Kommunimut pilersaarummi https://kp.sermersooq.gl/ -imi takusinnaavat
Sullissineq qaammatip aappaata affaa sinnerlugu sivisussuseqartarpoq
Nunaminertamik kommunip illuaraliorfissatut immikkoortuiniittumi inissamik nassaaruit, nunaminertamik atugassinneqarlutit sanaartornissannut akuersissummik qinnuteqassaatit. Nittartakkatigut www.nunagis.gl -ikkut nammineerlutit nunaminertamik atugassiinissamut qinnuteqarsinnaavutit imaluunniit Nunaminertanut Oqartussaqarfimmi sulisunut, qinnuteqaatinnut siunnersuerusuttorujussuarnut, attaveqarlutit. Naatsorsuutigiinnassavalli qinnuteqaatinnut sullinneqarnerit qaammatip aappaata affaanik qaammatinilluunniit marlunnik sivisussuseqarsinnaammat, sapaatit akunneri pingasut qinnutigineqartup tamanut tusarniaassutigineqarnissaa peqqutaasunut ilaavoq.
Ikiuerusuppugut
Qinnuteqaasiornermi immikkoortoqarfiup ikiuinissamut neqeroorutaata atorluarnissaa Gerth Lyberthip kajumissaarutigaa: ”Nalunngilarput suleriaaseq ilisimanngikkaanni ingerlariaaseq paasiuminaassinnaasoq. Taamaammat illuaraatitaarniartumut ilitsersuerusuttorujussuullutalu nunaminertassamut qinnuteqarneranut ikiuerusuppugut. Taamaaliornikkut kukkunerit piumasarineqartullu naammassineqanngitsut, naammattuukulasakkavut, peqqutaallutik qinnuteqaat arlaleriarlutit nassiuttariaqassanngilat.”
Nunaminertanut Oqartussaqarfik: sai@sermersooq.gl -ikkut attavigineqarsinnaavoq.