Sanaartugassap nutaap aappaagu naammassinissaata tungaanut blokkit marluk inuerunnikut utaqqisaasumik angerlarsimaffeqanngitsunit unnuisarfittut atorneqassapput.
Nuummi angerlarsimaffeqanngitsunik ajornartorsiuteqarneq ataavartumik ataatsimoortumillu aaqqiissuteqarfigineqassapput. Tamanna aallartissallugu Kommuneqarfik Sermersuumi kommunalbestyrelsip sisamanngorneq 2. juuli ataatsimiinnerani isumaqatigiissutigineqarpoq. Aaqqiissut tassaassaaq angerlarsimaffeqanngitsunut ornittagaq nutaaq, tassa unnuisarfik angutinut arnanullu immikkut immikkoortortalik inissiaaqqallu angerlarsimaffeqanngitsunut tunniunneqarsinnaasut.
Kommuneqarfik Sermersuumi illoqarfiup ineriartortinnissaanut ingerlatseqatigiiffia Nuuk City Development angerlarsimaffeqanngitsunut inissanut nutaanut pilersaarusiortuussaaq. Inissanut sanaartornissamut neqeroortitsineq ukioq manna ingerlanneqassaaq, aappaagulu ukiup qiteqqunnerani iserterfigineqarnissaannut piareersimassapput.
”Aalajangerneq assut nuannaarutigaara. Angerlarsimaffeqanngitsut uummateqarfigaakka, inuunerminnilu ingerlariaqqinnissaannut ikiorniarlugit inissialiornissatsinnut politikkikkut angusagut assut tulluusimaarutigaakka”, Kommuneqarfik Sermersuumi borgmesteri Charlotte Ludvigsen taama oqarpoq.
Maannakkut kommunip angerlarsimaffeqanngitsunut neqeroorutaanik atuisut 120-nik amerlassuseqarput. Marsimi COVID-19-imik tunillatsinnissamut aarlerinartorsiornermut atatillugu angerlarsimaffeqanngitsunut tupeqarfilioreernerup kingorna atuisut 50 procentingajannik amerleriaateqarpoq. Taakku inuit aappaagu angerlarsimaffeqanngitsunut ornittakkap nutaap atulersinneqarnissaata tungaanut inissaqartariaqarput. Taamaattumillu angerlarsimaffeqanngitsunut ornittakkap atorneqalernissaata tungaanut kommunalbestyrelse containerinik inissianik arlalinnik pisiniarluni kiisalu illoqarfiup qeqqani blokkit marluk inuerunnikut angerlarsimaffeqanngitsut inissiaatut utaqqiisaasumik atulerniarlugit aalajangerpoq.
Inaarutaasumillu angerlarsimaffeqanngitsunut tupeqarfimmut pioreersumut attartornissamut isumaqatigiissut septembarip aallaqqaataata tungaanut sivitsornissaa pisariaqarsimavoq. Utaqqiisaasumik suliniutaagallartut katillugit 4,6 millioninik akeqarput.
”Coronamik aarlerinartorsiorneq suli qaangiutinngilaq, angerlarsimaffeqanngitsullu toqqissisimasumik unnuiffissaqarnissaat qulakkeertariaqarparput. Taamaattumik utaqqiisaasumik aaqqiissutissanut aningaasaliinerput assut nuannaarutigaara”, Charlotte Ludvigsen oqarpoq.
Kommunalbestyrelsip tamarmiusup suliniutissat tamaasa akuersissutigai, Siumukkut minillugit, taakku kissaatigaat ingerlaannaq angerlarsimaffeqanngitsunut tupeqarfik matussasoq utaqqiisaasumillu suliniutit piareernissaata tungaanut ammatinneqarnani.