Ukiup qaammataanni siullerni arfineq-pingasuni Kommuneqarfik Sermersuumit saviminikut 900 tonsingajaat Danmarkimut nassiunneqarput. Taakkunannga amerlanerpaat 100 procentimik atoqqinneqassapput.
Eqqakkanik isumaginnittoqarfiup qaammatikkuutaartumik Kommuneqarfik Sermersuumi innuttaasunut nalunaarutaa atuarpat. Nalunaarummi matumani aggustimi pisut allaaserineqarput.
Julip qaammataani nalunaarut atuaruk
Kommuneqarfik Sermersuumi Eqqakkanik Isumaginnittoqarfiup aggusti qaammataa ilanngullugu eqqakkat ikuallanneqartussat aamma Nuummi Eqqakkanik tigooraaviup immikkoortortaani assigiinngitsuni suliarineqartussat 12.950 tonsit tigusimavai. Taakkunannga 7 procentit atoqqinneqartussatut nalilerneqarput – assigaa eqqakkat 900 tonsit missaat.
Eqqakkat atoqqinneqartussaasut – soorlu taaneqarnerisa ilisarnarsisereeraa – allatut atoqqinneqarsinnaapput. Taakkua ilaatigut tassaapput kilisannermi atortut aamma qassutit, pappiararsuit aamma saviminikut.
Saviminikut suuppat?
Saviminikut tassaapput savimerngit suulluunniit – soorlu saffiugassat, aluminium, kannissak aamma saffiugassat erlinnartut. Saffiugassat erlinnartut qaqutiguinnaq Eqqakkanik tigooraavimmut pisarput.
Saviminikut amerlanerpaartaat Eqqakkanik tigooraavimmut aggiuttakkatit allallu aggiuttagaat, savimminissap pinngoqqaataanit suliaapput saffiugassanik assigiinngitsunik akuukkat – aamma akuukkat taaneqartarput legering – imaluunniit aluminiuupput.
Eqqakkanik tigooraavimmi saviminikoq sunaluunniit tiguneqartarpoq – assersuutigalugu sikkilikut, qillertuusat innuttaasunit atorneqarsimasut, innaallagissamik kiassarnermit ruujorikut aamma suliffeqarfinnit ruujorit qajannaallisaanermi atorneqartartut.
Sooq savimerngit saffiugassallu Eqqakkanik tigooraavimmut tunniunneqassappat?
Saviminissaq pinngortitami nassaassaavoq aamma aatsitassarsiorfinni nunamit qallorneqartarpoq. Saviminissaq aamma saffiugassat allat pinngortitamut ulorianartuunngillat, aatsitassanut oqimaatsunut soorlu aqerlumut aamma kviksølvimut assingusumik. Aqerloq aamma kviksølv pinngortitamut, uumasunut inunnullu ulorianartuupput.
Taamaattoq saviminikut aamma saffiugassat pinngortitamut qimaannagassanngilat. Tassunga arlalinnik pissutissaqarpoq:
Sodavandip puukua nalinginnaasoq aluminiumimik sanaaq pinngortitami ukiut 500-t missaanni arrorniartarpoq. Sikkili ukiut 100 sinnerlugit pinngoritami suujunnaariartortarpoq.
Eqqakkanik tigooraavimmut saviminikunik atoqqitassanik tunniussiguit, aatsitassarsiorfinni saviminissamik qalluinerup pisariaqartinneqarnerata annikinnerulerneranut ilapittuutaassaatit.
Taamatuttaaq saviminikut eqqakkallu allat pinngortitami uninngaannannginnissaannut ikiuutissaatit, eqqakkat asimi sineriammi, qaqqani, kuunnilu misigisassanut akornusersuutaasarmata.
Kommuneqarfik Sermersuumit saviminikut ima atoqqinneqartarput
Eqqakkanik isumaginnittoqarfimmi Eqqakkanik tigooraavimmit saviminikut pissarsiarineqarsimasut ima amerlatigileraangata, containerersuarnut poortuunneqartarput Danmarkimilu tigooraavimmut nassiunneqarlutik.
Kommuneqarfik Sermersuumit januaarip aallaqqaataanit aggustip aallaqqaataanut saviminikoq 891 tons Danmarkimut atoqqitassatut nassiuppaa. Nassiussat tassaapput biilit aserortikkat ilaat, savimerngit, vaajarit aamma ruujorit kannissammik suliaasut. Amerlanerpaartaat 100 procentimik atoqqinneqassapput.
Eqqakkat Danmarkimut nassiunneqartut annerpaartaat saviminissamik aamma saffiugassanik akuugaapput. Akuukkat toqqaannartumik atoqqinneqarsinnaaneq ajorput. Taamaattulli atoqqitsinnagit mikisukkuutaarlutik aggorneqaqqaartarput.
Taamannak suliaqarneq shredderimi imaluunniit millisaavimmi ingerlanneqartarpoq, tassani saviminikut mikisunnguanngorlugit aggorneqartaramik. Kingorna saviup kajungerisaa angisoorsuaq atorlugu savimerngit immikkoortiterneqartarput. Savimerngit kuisanik saviminiliorfimmut toqqaannartumik nassiunneqartarput tamaani savimertut tunisassiassat nutaat sananeqartarput. Saffiugassat allat aamma immikkoortiterneqartarput taakkua Sverigemi saffiugassiorfinnut nassiussuunneqartarput.
Shredderimit sinneruttarput – assersuutigalugu biilit issiavittaasa immikkoortualui imaluunniit qisumerngit. Sinneruttut immikkoortiterivik alla aammaarlutik aqqusaartarpaat, tassani sinneruttut assigiinngitsunut nutaanut marlunnut aggulunneqartarput. Agguataaqqitat aappaat ikuallaavinni nukissiornermi atortussianngortarpoq immikkoortup aappaa qaqugorsuarmut toqqortassanngorluni toqqorsivimmiilersarpoq.
Ukioq manna Kommuneqarfik Sermersuup saviminikut 891 tonsit Danmarkimut nassiussaasa ilaannit 82 procentii saviminissatut imaluunniit saffiugassatut toqqaannartumik atoqqinneqarput, allat 5 procentit ikuallanneqartussanngortut. Kingulliit 13 procentit toqqorsivinnut pisinneqassapput, taakkua qaqugu atoqqinneqarsinnaaffissaannik nassaartoqarnissaa tikillugu. Sinnikunik ikuallaaneq aamma toqqorsivinniititsineq Danmarkimi pisarpoq.
Saviminikuutitit saffiugassallu igitassatit ima pissavatit
Eqqakkanik tigooraavik Nuummi Eqqakkanik isumaginnittoqarfimmiittoq sapaatip-akunnerata ulluini tamaginni ammasarpoq:
Ataasinngornermit tallimanngornermut nal. 7.00 -17.30, arfininngorneq nal. 9.00 – 14.00 aamma sapaammi nal. 11.00 – 16.00.
Eqqagassat pillugit apeqqutissaqaruit Eqqakkanik isumaginnittoqarfik ulluinnarni saaffigisinnaavat oqar. 36 74 11 aqqutigalugu (nal. 10-12 ajunnginnerpaajuvoq) imaluunniit uunga allallutit affald@sermersooq.gl.