Vittus Tasiilaq pillugu qasusuilluni sulisimavoq

Vittus Mikaelsen

Eqqaaniut, Vittus Maaru Mikaelsen

Ammassallup Kommunerisimasaani borgmesteriusimasoq sivisuumik napparsimareerluni pingasunngorneq, 9. aggusti toqukkut qimaguppoq. 66-inik ukioqarpoq.

Vittus Maaru Mikaelsen Isertumi inunngorpoq, kingusinnerusukkulli Tasiilamut nuulluni ukiorpassuit najugaqarfigalugu. Ammassallup Kommunerisimasaani Siumut sinnerlugu politikkikkut eqeersimaarluni kommunalbestyrelsimut ilaasortaavoq. Kommunalbestyrelsimut ilaasortatut siullermik 1979-1983-imi qinigaavoq, qinigaaqqipporlu 1993-1997-imi. 1997-imiit 2008-mut borgmesteriuvoq taamaalillunilu Ammassallup Kommunia 2009-mi Kommuneqarfik Sermersuumut ilanngunnissaa sioqqullugu kingullersaalluni borgmesteriulluni.  Ikaarsaariarnermut Ataatsimiititaliamut 2008-mi qinigaavoq qinigaaffiusunilu marlunni 2017-imi apriilip tungaanut kommunalbestyrelsimut ilaasortaalluni.

Vittus Maaru Mikaelsenittaaq Siumut sinnerlugu qinigaaffinni arlalinni Inatsisartunut ilaasortaavoq. Siullermik 1999-imi qinigaavoq.

Vittus Maaru Mikaelsen Tasiilaq eqqaalu pillugit qasusuilluni sulisimavoq kommunalbestyrelsimullu kommunip kangiani pissutsit pitsanngorsarnissaannik siunnersuuteqartuartarluni, minnerunngitsumik politikkikkut anguniagaani suliaqarneranilu Tasiilap illoqarfia pingaarutilittut aallaaveqartumik ineriartorsimalluni. Maarup sulinerata nalaani takornariaqarnerup ineriartortinneqarnissaanut tunngavissaq pilersinneqarpoq. Piniartutut ileqquusumik inuuniuteqarnerup takornariaqarnerullu inerisarneqarnissaata ataqatigiinnissaat sulinermini assut pingaartissimavai. Politikeriusimavoq ataatsimut isiginnilluni pingaartitsisoq. Aamma Nuummi nutaamik mittarfiliornissaq illersugarisimavaa, Kommuneqarfik Sermersuullu illoqarfiit pingaarnersaat pillugu periusissaq illersugarisimallugu.

”Vittus Maaru Mikaelsen politikeriusimavoq suliani uummateqarfigalugu uangalu nuannaarutigeqisannik 1999-imiilli ilisarisimasarilerpara suleqatigalugulu, siullermik Inatsisartunut ilaasortatut kingornalu 2008-imiit ukioq manna apriilip tungaanut. Maarup isummani qununani annittarpai, sakkortuumillu oqallissaarisuusarluni. Naak partiivut assigiinngitsuugaluartut, ataqqeqatigiinnitsigut suleqatigiittarpugut. Maaru inuusimavoq assut ataqqineqartoq. Vittus Maaru Mikaelsen puigunngisaannassavara suleqatitut pitsaasutut ataqqineqartutullu aamma pingaartinneqarluartutut, kikkunnit tamanit maqaasineqassaqaaq, minnerunngitsumik uannit”, taama oqarpoq borgmesteri, Asii Chemnitz Narup.

 

Vittus Maaru Mikaelsen qasusueqaluni sulisimavoq sulianilu uummateqarfigalugit politikkikkut anguniakkani angorusuttarlugit. Aamma naak kræftimik nappaateqarnermini qinnguartartilluni peqqissartikkaluarluni, kommunalbestyrelsimi sulinini qasusuilluni ingerlatiinnarpaa.

Vittus Maaru Mikaelsen piniartutut perorsarneqarsimallunilu ilinniartinneqarsimavoq. Inuussutissarsiutigisani nuannarisimaqaa, tulluusimaarutigalugu pinngortitamillu nalorninarsinnaaqisumik ilisimaarinnilluarluni. Piniagassat qanilligaangamigit ajorsaatigineq ajorpai, piniaraangamilu angerlarsimasutut ittarpoq.

Vittus Maaru Mikaelsenip qimagarai nuliani, meeqqani sisamat ernuttanilu arfineq marluk. Ilaqutai tamaasa eqqarsaatitsigut najorpavut, uiusoq, ataataq aataalu nukittooq annaaneqarmat qamannga pisumik misiginneqataaqaagut.

Eqqaaneqarnera ataqqinartuuli.