Sermersooq meeqqat pillugit suliniutit annertuumik pitsanngorsaavigai

Meeqqanut Ilaqutariinnullu immikkoortumi sullissineq 360 graderinik mumisillugulusooq misissuiffigineqassaaq, aamma suleriutsit nalilersuiffigineqassallutik.

Aaqqissuussaasumik suliniarnissaq pilersaarutigineqarpoq, Kommuneqarfik Sermersooq ukiuni tulliuttuni pingasuni annertuumik siuarsaanissamik pilersaarusiornermini meeqqanik, inuusuttunik ilaqutariinnillu kommunimi suliaqarnerit tamarluinnaasa misissuiffigeqqissaarneqassapput.

Meeqqanut Ilaqutariinnullu tunngasunik siuarsaanissamik pilersaarusiaa nutaaq Inuit Ataqatigiit, Demokratit aamma Atassutip akornanni suleqatigiinnissamik isumaqatigiissusiaanik aallaaveqarpoq, tassani naqissuserneqarami meeqqanut inuusuttunullu tunngasunik suliniutit pitsanngorsarneqarnissaat qitiutinneqarluinnassasoq. Peqatigitillugulu suliniutit pitsanngorsaavigineqarnissaat nutaamillu suleriuseqarnissaq pisariaqarluinnarneri paasinarsilluinnarpoq, kommune Namminersorlutik Oqaartussat Nakkutilliisuinit nalunaarusiami juunimi marlutsigut isornartorsiorneqarmat.

– Nakkutilliinermi nalunaarusiami qulaarneqarpoq, maannamut suliniutaareersut amigarsimasut, taamaammat nuannaarutigilluinnarpara annertuumik suliniuteqarnissamut ikiortissarsiorneq maanna piareerlugu iluatsissimasoq, Uju Petersen, Meeqqanut Ilaqutariinnullu Ataatsimiititami siulittaasuusoq oqarpoq.

Pitsanngorsaanermi pilersaarummi nutaami alloriarneq siulleq tassaavoq immikkoortumi sullissinerup annertuutigut misissorneqarnissaa, taamaalilluni kommune nukinnik pitsaanerpaamik atuisinnaanera aallaavigalugu qulakkeerinnittoqarsinnaaqqullugu. Pitsanngorsaanissamut periarfissat kisissaanngiusarput, taamaattumillu eqqortumik pingaarnersiuinissaq aalajangiisuussaaq.

Tamatuma aamma kinguneralugu, 2017-imut pitsanngorsaanissamik pilersaarut sukumiilluinnartuunera, pilersaarutilli annertunersaa aappaagumut suli ammavoq, sullissinerummi misissuiffigineqarnerani avataaniik nassuiaat apeqqutaassaaq.

 

Immikkoortoq sapinngisamik annertuumik qitiutinneqarsinnaaqqullugu kommunalbestyrelse aamma aalajangersimavoq, immikkoortup aaqqissuuteqqinneqassasoq aqutsinerlu pitsanngorsarneqassasoq. Immikkoortoq namminerisamik pisortaqalerpoq, marlunngorlugulu avinneratigut marlunnik fagchefeqalerluni. .  Suliassaqarfiit killiliigaanerisigut kingunerissavaa, pisortaq killiliussaliornissamut periarfissaqalissasoq immikkoortumilu ingerlanermut malinnaasinnaassalluni. Fagchefit aamma immikkoortuni aqutsisunik ikorfartuinissamut periarfissagissaarnerulissapput, tamannalu aaqqissuussaanermut iluaqutaaniartussaassaaq. Tamanna aqutsisut siuuttuunerminni sulisunik ikiuunnerusinnaalernerannik kinguneqassaaq , tamannattaaq innuttaasunut pitsaasumik kinguneqartitsissaaq.

– Taamaalilluta neriuutigaarput, immikkoortumi pitsaanerumik aqutsinissaq qulakkeerneqassasoq, tamannalumi angusaqarluarfiusussaassallunilu meeqqanut inuusuttunullu atugarliuutilinnut pitsaanerusumik atugassaqartitsilissaaq, Uju Petersen, Meeqqanut Ilaqutariinnullu Ataatsimiititami siulittaasuusoq oqarpoq.

 

Taakku saniatigut pilersaarummi siunertaavoq, sulisut imaajaaqatigiittarnissaannut annertusaasoqarnissaa. Immikkoortumi sulisut suliat naalaattakkat kingunerisaanik eqqarsaatitigut annertuumik ilungersunartorsiortinneqartarput, tassanilu sulisut illersorniarlugit nanertuutillu annertusisoornerini imaajaaqatigiittarneq sakkussaalluartuuvoq.

 

Pilersaarummi aamma qitiulluinnartut ilagaat arlalinnik nutaanik aaqqissuussinikkut periusissaliornikkullu suliamik suliaqartarnerup pitsanngorsarneqarnissaa. Assersuutigalugu Signs of Safety, taanna meeraq pillugu suliamik suliaqarnermi tamakkiisumik isiginninneruvoq, sullissisup maluginiarsinnaallugu ilaqutariit sutigut ajornartorsiornersut aammali sutigut nammineersinnaassuseqarnersut.

 

Kiisalu paasinarpoq, pitsanngorsaanissamik pilersaarut taama annertutigisoq Kommuneqarfik Sermersuup kisimiilluni naammassisinnaanngimmagu. Tamannalu pillugu kommune pisortaqarfiit suliffeqarfiinut arlalinnut saaffiginnereerpoq, soorlu politiinut aamma Namminersorlutik Oqartussanut NGO-nullu assigiinngitsunut, tassani suleqatigiinneq pitsanngorsarniarlugu sutigullu ikioqatigiittoqarsinnaanera nassuiarniarlugu.

 

– Suleqatigiinnerunissaq pisariaqarpoq, tamatumalu pinissaa qilanaaralugu utaqqivara, Uju Petersen, Meeqqanut Ilaqutariinnullu Ataatsimiititami siulittaasuusoq oqarpoq.