Deloitte suliassanik meeqqanut tunngasunik nakkutilliisuussaaq

Kommuneqarfik Sermersuumi kukkunersiuisut Deloitte ukiuni sisamani tulliuttuni Kommuneqarfik Sermersuumi meeqqanut ilaqutariinnermullu tunngasunik suliaqarnermut ikorfartueqataassaaq.

Piffissami tassani Deloittep kommunimi suliassat meeqqanut tunngasut 2.200-t tamaasa misissussavai, peqatigitillugulu suliassaqarfimmit tassani ingerlatsivimmi kukkunersiuissalluni, pitsanngorsaataasussanillu misissuissalluni. Tamakku tamarmik kommunimi sulisut qanimut suleqatigalugit ingerlanneqarsinnaapput, paasissutissat katersorneqartut kommunimiiginnarnissaat isumannaarniarlugu.

”Suliassaatitta suleriaatsittalu ineriartortinneqarnissaannut pilersaarummi nutaamik isiginnilluni sulisut tamaasa peqataatillugit nalilersuiffigineqarnissaat pingaaruteqarpoq.  Suliassatsinnut pikkoriffeqalernissamut iluarsiissutigisassatuarput tassaavoq kukkussutsitta ilikkarfiginissaat ”, Meeqqanut Ilaqutariinnullu Ingerlatsivimmi pisortaagallartoq, Helene Horsbrugh oqarpoq.

Aamma Deloitte kommunip meeqqanut tunngasunut suliassaqarfianik ineriartortitsinissamut pilersaarutip naammassineqarnissaanut sulinermi ikorfartuissaaq. ”Meeqqanut Ilaqutarinnnermullu suliassaqarfik kommunalbestyrelsimit pingaarnerpaatinneqarpoq, taamaammallu pissusissamisoortumik suliassaqarfimmi ilisimannittunik peqarnissaq isumannaarneqartariaqarluni” Helene Horsbrugh oqarpoq. Assersuutigalugu ilinniartitsinertalimmik, suliamik ilisimannittumik aqutsisoqalernissaanut Deloittep Kommuneqarfik Sermersooq ikiussavaa.

”Ingerlatsivipput nutaajuvoq, atorfiillu pingaarutillit amerlasuut suli inuttalerneqanngillat. Taamaattumik uannut pingaaruteqarpoq, aqutsisunngortussat pisariaqartitaannik ikorfartorneqarnissaat, Helene Horsbrugh oqarpoq.

 

Ukiuni sisamani Deloittep sulinissaa katillugit 3,5 millioner koruuninik akeqassaaq, Helene Horsbrugh isumaqarpoq, taakku aningaasartuuterpassuusut pisariaqartinneqartulli.

“Taama iliunngitsoorsinnaanngilagut. Suliassaqarfimmi arlaleriarluni pisariaqartinneqartumik ineriartortitsiniartoqartarsimagaluarpoq, iluatsinngitsumilli. Avataaneersumik suleqateqarnissarput pisariaqartipparput, siunnerfitsinnik eqqortumik aqqutissiuunneqarnissatsinnut ikiuussinnaasumik”, oqarpoq.

Deloitte suliassarissavai siunnersuinerinnaq, aammalu suliassatigut isumaginninnermut aqutsinermullu tunngasunut aqqutissiuussinissaq. Suliassaqarfimmi tassani nangittumik Kommuneqarfik Sermersooq aalajangiisassaaq.