Franskinut attaveqarneq: Tasiilamiit Lyonimut

Frankrigimi meeqqat atuarfianni atuartut annerit ilaasa, Tasiilami Alivarpi ukioq manna tikeraarpaat. Tasiilamilu atuartut ilaat Frankrigimut aappaagu tikeraassamaalerput. Taama paarlaasseqatigiinnermi silap allanngoriartornera nunanullu taakku marluusut kulturii ilinniarneqarlutik.

Tasiilami atuartut 26-it, 7. klassimiit 9. Klassimut atuartut ilinniartitsisullu sisamat, aappaagu upernaakku aprilimi sapaatillu akunneranik ataatsimik sivisussuseqartussamik Frankrigiliassapput.

Frankrig pillugu Tasiilami atuartut upernaaq manna ilinniartinneqarput tamannalu nangissalluni ukiaru atuartut aallarteqqippata. Ilinniartitsinermi avatangiisit, oqaatsit aamma kulturimik paasinnittaaseq ilinniarneqarlutik.

”Nunarsuatsinni inuit amerliartorneri ilutigalugu silallu allanngoriartornera avatangiisillu mianerineqaratik atugaaneri paasilluarumallugit, Tasiilami atuartut Frankrigiliannginnerminni ilinniagassaraat. Tasiilami atuartut silap allanngoriartornera aamma nunarsuatta kissakkiartornera sammivaat. Taakkulu saniatigut kulturi, oqaluttuarisaaneq aamma ileqqut ilinniarneqarlutik,” Tasiilami Alivarpimmi ilinniartitsisoq, Mikael Franks oqarpoq.

Frankrigimi illoqarfimmi Lyonimi atuartut Tasiilamut tikeraarnerminni Tasiilami atuartut tuluttut oqaloqatigisarpaat. Franskit atuartut Tasiilami ilaqutariinni amerlanerpaat najugaqarput, tassalu Tasiilarmiut Frankrigiliarunik aamma ilaqutariinni najugaqarnissaat pilersaarutaallu. Taamaattumik atuartut Frankrigimi ilaqutariinnik maanna allaqarteqartalereerput.

Illoqarfik Lyon Frankrigip qatsissortaani qaqqartunersaaniippoq. Tassalu atuartut Tasiilamut tikeraat Lyonip eqqannguani atuartuullutik.

”Taama qatsitsigisumi najugaqarnerminni sila allanngoriartornerata kinguneri qanimut misigisarpaat. Tassalu Lyonimut tikeraarnitsinni qaqqani sermit aajuitsut ukiuni kingullerni qulini sunnigaasimaneri takuniagassatta ilagalugit,” Mikael Franks oqarpoq.

Tasiilami atuartut Lyonimt tikeraareernerminni illoqarfissuaq Paris takuniagassaannut ilaavoq. Ullunilu sivisuberpaamik sisamani Parisimiinnerminni takuniagassaasa ilagaat katersugaasivissuaq Louvre, oqaluffissuaq Notre Dame aamma Parisip ilisinnaataasa ilangilluiunnagaat Eiffeltårnet.

”Tasiilami atuartut taama periarfissinneqarnerat annertuumik nuannaarutissaavoq, tassami misigisassaat paasiniagassaallu pissaganartupilussuupput siunissamilu ilaatigut atorneqarluarsinnaallutik,” Mikael Franks oqarpoq.

Silap allanngoriartornerata paasiniarneqarnissaa kulturikkullu paarlaasseqatigiinneq EU-p aningaasaateqarfianit aningaasaliiffigineqarpoq.

Frankrigimi atuartut Tasiilamut marsimi tikeraarnerannit assit massuma ataani isiginnaarneqarsinnaapput.