Biilikorpassuit illoqarfimmi takussaajunnaassapput

Biilikut inuttaminnit pigineqarusukkunnaartut sumilu tamaani uninngatiinnarneqartut illoqarfimmi takussaajunnaassapput. Tamanna anguniarlugu biilikut, inatsisinik unioqqutitsinikkut sumi tamaaniisinneqartut, Kommuneqarfik Sermersuup Sanartornermut Avatangiisinullu ingerlatsiviata mannan qanoq iliuuseqarfiginialerpai.

”Illoqarfiup iluani biilikorpassuit takussunarluinnartut amerlaqaat. Illoqarfiulli iluaniinnaanngitsoq tamakku takussaapput aamma illoqarfik qimalaaginnarlugu tamakku inuttaminnik ilinnarneqartarput”, Ingerlatsinermut Avatangiisinullu immikkoortortaqarfiani ingerlatsisoq, Frank Rasmussen oqarpoq imalu nangilluni.

”Biilikut sumi tamaaniittut ajornartorsiutaasullu 100-t missaanniittut inuttaannut peeqqugaluarlutigit qisuariarfigineqanngimmata namminneerluta assartorlutigit manna taakku passuppagut,” Frank Rasmussen oqarpoq.

Biilikut assartorneri ulorianarunnaarsinneqarnerilu kommunimut akissaajaataapput. Tamannalu pillugu kommunimit biilit inuttaat maanna paasiniarneqalerlutik.

Piginnittut akiligassinneqassapput
”Biilikut sumut tamaannga iliinnarneqarlutik inuttaminnit qimanneqarsimasut inui kikkuunersut paasiniartarparput allagarsiinikkut. Inuttaat qisuarianngippata taava biilikut atorunnaarsimasutut nalileriarlugit igitassanngortittarpavut, tamatuma kingorna aserorterlugit ulorianarunnaarseriarlugit naqitsissussuarmik inikillisariarlugit Danmarkimut nassiuttarlutigit,” Frank Rasmussen oqarpoq.

Biilikut ulorianarunnaarsinneqarneranni isaterneqarnerannilu motooriisa normui nassaarineqartarput, biilillu allattorsimaffiannut paasiniarneqartarluni biili kimit pigineqarnersoq. Taakkulu iluaqutigalugit biilit inuttaat kommunimit saaffigineqarnissartik naatsorsuutigisinnaavaat.

”Biili atorsinnaajunnaarpat inuttaanut akikinnerussagaluarpoq namminneerlutik biilertik eqqakkanut tigooraavimmut tunniukkiartorunikku,” Frank Rasmussen oqarpoq.

Biilit qanoq avatangiisinut ulorianarunnaarsinneqarnissaat pillugu Eqqakkanik tigooraavik ilitsersuutinik peqarpoq, taamaalilluni biilip inuttaata nammineerluni ulorianarunnaarsinniarlugu suliarisinnaallugu imaluunniit illoqarfimmi biilinik suliaqartartunut tamanna imissutigisinnaallugu. Biilit ulorianarunnaasinneqarnerisa kingorna biilikut maleruagassat naapertorlugit Eqqakkanut Tigooraaviliaanneqarsinnaallutik.

Eqqakkanut Tigooraavimmit biilikut naliginnaasut kisiisa maanna sammineqarallarput, kingusinnerusukkulli biilik angisuut angallatikullu aamma passunneqartalissallutik.

”Usisaassuit, sanaartugassanik suliakkerneqartartut maskiinaassui angisuut umiatsiakullu atorunnaarnikut maleruagassallu malillugit ulorianarunnaasinneqarnissaannut tunniunneqarsimanngitsullu pillugit suliniutissarput maanna aaqqissuutileruttorparput. Taamaattumik tamakkuninnga piginnittut qinnuvigissavagut pikutik pillugit erngerlutik  Eqqakkanut Tigooraavimmut saaffiginnissasut, taamaalilluta ilitsersorsinnaagatsigit qanoq iliorunik pitsaanerussanersoq akikinnerussanersorlu,” Ingerlatsinermut Avatangiisinullu immikkoortortaqarfimmi ingerlatsisoq, Frank Rasmussen oqarpoq.