Utoqqaat Illuat nutaamik aqutsisortaarpoq

Nuummi Utoqqaat Illuat nutaamik aqutsisortaarpoq. Atorfinitsinermut suleqatigiissitap isumaqatigiissup, Ivalu Reimer juunip aallaqqaataa 2017 aallarnerfigalugu atorfinitsippaat.

Peqqissaasutut ilinniagalik Ivalu Reimer Utoqqaat Illuanni 2012-imili peqqissaasutut atorfeqartoq, 2014-imi 1. assistentitut atorfeqarpoq februaarimi 2017-ip tungaanut, taamanili tassa aqutsisuugallartutut juunip aallartinnerata tungaanut atorfeqarluni.

”Utoqqaat Illuata ingerlanneqarnissaa Ivalumut akisussaaffigitilernera toqqissisimanartutut isigalugu nuannaarutigaara, neriullungalu Utoqqaat Illuanni sulisunit taamatullu kommunimi tamanit aamma nuannaarutaajumaartoq. Ivalu Utoqqaat Illuanni aqutsisuugallartutut sulinermini akisussaassuseqarluarluni tamanna ingerlappaa aammattaaq sulisut aqunneqarnera, allaffissorneq taamatullu illup ingerlanneqarnera pitsaasumik ingerlallugu,” Kommuneqarfik Sermersuup Utoqqarnut Sullissinermut ingerlatsisua, Birtha Bianco oqarpoq.

Utoqqaat Illuanni aqutsisup atorfinitsineqarneranut ataatsimiititaq ingerlatsisumit, Birtha Biancomit sulisunillu pingasunik inuttaqarpoq.