Tasiilami piterarnerata kingorna saliineq

Tasiilami maaji aallartilaartoq piterarnerata kingorna illoqarfimmi igitassat teqqarlutik sumi tamaaniilersimasut, illoqarfimmiut 373-it namminneq piumassusertik aallaavigalugu igitat sumi tamaaniittut 4 tonsit missaanniittut pingasunngornermi maajip 12-ianni, nalunaaquttap akunneri marluinnaat atorlugit katersorpaat, tamanna pilluni Najukkami ataatsimiititami ilaasortat Kommuneqarfik Sermersuumilu sulisut aaqqissuisoralugit.

”Tasiilami maaji aallartilaartoq piterarnerata kignorna igitassarpassuit illoqarfimmi sumi tamaani takussaalersut katersorneqarnissaaq pillugu innuttaasut saaffigaagut ikiutsiaqqulluta. Ullut marluinnaat ingerlaneranni Tasiilami innuttaasut 373-it saaffiginnipput saleeqataarusullutik. Tassalu saliineq aallartimmat nalunaaquttap akunneri marluinnaat qaangiuttut illoqarfik tamarluinnarmi salinneqarpoq, igitallu kommunip eqqaavissuanut suliassanngorteqqillugit eqiterneqarlutik,” Najukkami ataatsimiititap siulittaasua, Adolf Kristiansen tulluusimaaqisoq oqarpoq.

Najukkaami ataatsimiititaq siornali aalajangiipput, Tasiilami ukioq manna pingasoriarluni saliisoqassasoq. Maajillu aallartilaarnerani anorersuaq piteraq Tasiilami nalliusimaarmat igitassarpassuit sumi tamaaniilersimasut katersorneqarnissaat iluatsiinnarneqarpoq.

”Nuannaarutigigaarparput Tasiilami innuttaasut taama amerlatigisut igitanik katersuerusullutik peqataaneri. Tamassuma takutiinnarpaa Tasiilami innuttaasunit illoqarfik qanoq asaneqartigaluni kusassarusunneqartigisoq,” Adolf Kristiansen oqarpoq.

Illoqarfimmi saliinissaq tulleq pissaaq juunip 21-anni inuiattut nalliuttorsiornissaq qanillippat.