Kommuneqarfik Sermersuumi aaqqissuussineq nutaaq: Allaffissornikkut aaqqissuussinerit takukkit

Kommuneqarfik Sermersuup ingerlanneqarnera nutaamik aaqqissuunneqarpoq. Taamaaliornermi meeqqat inuuniarnermikkut ajornartorsiuteqartut atugaasa pitsanngorsarneqarneri nukittorsarneqassalluni. Suut aaqqissuunneqarnersut uani atuarneqarsinnaapput.

Aaqqissuussinermi allannguutit annerpaat tassaassapput Meeqqanut, Ilaqutariinnermut Atuarfeqarnermullu ingerlatsiviup allaffissornikkut aaqqissuussaanera. Ingerlatsivik taanna maanna marlunnit avinneqarpoq imaalerluni: Meeqqanut Atuarfeqarnermullu Ingerlatsivik aamma Meeqqanut Ilaqutariinnullu Ingerlatsivik.

Ingerlatsiviit aaqqissuunneqarneri nutaat uani atuarneqarsinnaapput

Ingerlatsiviit aaqqissuuteqqinneqarneranni Nuummi Nuullu avataani suliffinnik ikililerisoqassanngilaq atorunnaarsitsisoqaranilu.

Tamanut Sullissivik ingerlatsivittut atorunnaassaaq. Peqqissutsimut Sunngimmilu susassaqartitsiviup immikkoortortaqarfia Tamanut Sullissivimmiikkunnaarluni Meeqqanut Atuarfeqarnermullu Ingerlatsivimmut nuunneqassaaq, Pitsaaliuinermut immikkoortortaqarfik Tamanut Sullissivimmit Meeqqanut Ilaqutariinnullu Ingerlatsivimmut nuunneqassalluni. Immikkoortortaqarfiit Attaveqaqatigiinneq, Kulturi, Innuttaasunut Sullissivik, Betjentit aamma Borgmesterip allaffeqarfia Tamanut Sullissiviup ataaniissimasut kommunip pisortaanerata ataaniilissapput.

Kommuneqarfik Sermersuumi maanna siunnersortit qullersaat, Helene Horsbrugh, Meeqqanut Ilaqutariinnullu Ingerlatsivimmi pisortaanerugallartutut atorfinitsinneqarpoq. Ingerlatsivimmi tassani pisortamik sulisussarsiorneq qanittukkut aallartinneqassaaq naatsorsuutigineqarluni 2017-imi ukiaru pisortamik atorfinitsitsisoqareersimassasoq.

”Suliffeqarfinni aaqqissuussinerit allanngortinneqaraangata tamanna isumaliutersuutinik arlalinnik aamma eqqasuuteqalernernik pilersitsisarpoq. Taamaattumik Meeqqanut Atuarfeqarnermullu Ingerlatsiviup pisortaa, Helene Broberg Berthelsen aamma Meeqqanut Ilaqutariinnullu Ingerlatsiviup pisortariligallagaa, Helene Horsbrugh peqatigalugit, Nuummi sulisut allannguinermullu attugaasaut katersuutillugit paasissutissinneqarput, Lars Møller-Sørensen oqarpoq imalu nangilluni:

”Aqqissuussineq nutaaq iluarisimaarlugulu isumalluarfigaara. Aaqqissuusseqqinnermi meeqqat inuuniarnermikkut ajornartorsiuteqartut atugarisaa politikkikkut nukittorsarneqarnissaannik kissaatigineqarnera taamaalilluni aaqqiivigineqassasoq isumaqarpunga,” Kommuneqarfik Sermersuup pisortaanerigallangaa, Lars Møller-Sørensen oqarpoq.

Kommuneqarfik Sermersuumi ataatsimiititat nutaat marluk aamma pilersinneqarput. Tassa Meeqqanut, Ilaqutariinnut atuarfeqarnermullu ataatsimiititaq atorunnaarluni Meeqqanut Atuarfeqanermullu ataatsimiititaq aamma Meeqqanut Ilaqutariinnullu ataatsimiititaq pilersinneqarput.

Politikkikkut aaqqissuussineq tamanna uani takuneqarsinnaavoq