Sunngiffimmi piniarnermut allagartap 1. maaji sioqqullugu 2017-imi akilereersimassaaq

APN-ip eqqaassissutigissavaa Aalisarnermut Piniarnermullu Naalakkersuisup aalajangernikuummagu aasakkut ukiakkullu tuttunniarnissamut umimmanniarnissamullu akuersissutinik qinnuteqarsinnaanissamut sunngiffimmi piniarnermut allagartap tuttut umimmaallu pillugit nalunaarutit atuuttut malillugit 1. Maaji sioqqullugu 2017-imi akilereerneqarsimanissaat. Tamanna 23. februaarimi 2017-imi tusagassiorfinnut nalunaarutigineqarpoq. Tassani tunngavigineqarpoq piniarfinni amerlanerpaani ukiuni arlaqartuni tuttunik umimmannillu kisitsisoqarnikuunnginnera tamannalu pillugu biologinit nutaamik siunnersuuteqartoqannginnera.

Tamanna pillugu 1. Maajimi kingusinnerusukkulluunniit sunngiffimmi piniarnermut allagartamut akiliisimasut 2017-imi aasakkut ukiakkullu tuttunniarnissamut umimmanniarnissamullu akuersissutinik tunineqarsinnaassanngillat. APN-ip ilisimatitsissutigisinnaavaa 2017-imut sunngiffimmi piniarnermut allagartat 4547-it sananeqarsimasut nassiunneqarlutillu taakkuninngalu 3111-it maannamut akilerneqarsimallutik. Sunngiffimmi piniarnermut allagartat sananeqarsimasut nassiunneqartullu 1436-it taamaalillutik suli akilerneqarsimanngillat. Ataasinngorpat 1. Maaji 2017 nallertussaavoq taamaattumillu sunngiffimmi piniarnermut allagartat kingusinnerpaamik tallimanngorpat 28. April 2017-imi akilerneqareersimasussaapput piffissaq eqqorlugu akiliiniaraanni.

APN-ip ukiuni kingullerni paasisimavaa tuttunniarnissamut umimmanniarnissamullu akuersissutit tunniunneqartartut pingajorarterutaat inorlugu utertinneqartartut. Akuersissutit pisanillu nalunaaruteqarneq inatsisit malillugit piniarnerup naammassineqarnerata kingornatigut kingusinnerpaamik sapaatip akunnerisa marluk qaanngiunnerani utertinneqartussaapput tamannalu pisaqarsimanngikkaluaraanniluunniit aamma atuuppoq. Akuersissutit pisanik iluamik immersorneqartannginnerat utertinneqartannginnerallu pissutigalugu tuttoqatigiit umimmaqatigiillu qanoq innerat nalileruminaappoq.

Erseqqinnerusumik paasisaqarusukkussi uunga saaffiginnissinnaavusi, Immikkoortortami pisortaq Amalie Jessen, amalie@nanoq.gl, Tlf. 34 53 04