Charlotte Bech stabschefitut atorfinitsinneqarpoq

Meeqqanut, Ilaqutariinnut Atuarfeqarnermullu ingerlatsivimmi stabschefitut, Charlotte Bech atorfinitsinneqarpoq. Charlotte Nuummi ullumikkut najugaqartoq Tunumi nunaqarfimmi Kulusummi inunngorpoq, stabschefitullu atorfinitsinneqarnermini Tunumi Kitaanilu pissutsinik qanimut ilisimasaqarluarnini annertuumik iluaqutigissallugu oqaatigalugu.

Charlotte Bechip suliassaasa pingaarnersaraat allaffissornikkut aqutsinermi sulisut siuttuuffiginissai, tassa taakku politikkikkut ataatsimiititat aamma innuttat pingaarnertut sullinneqarnissaannik isumaginnittuusut aamma suliassaralugu ingerlatsiviit ingerlatsisuisa pisortallu suliaannik ikorfartuinissaq.

”Meeqqat inuusututtullu siunissami pitsaasumik atugaqalernissaannik annertuumik suliaqartut inuit ilagilernissaat assorsuaq qilanaaraara,” stabschefitaaq oqarpoq imalu nangilluni:

”Ingerlatsiviup pingaarnertut suliassaasa aningaasalersorneqarnerannut tunngasut sulisunit ikorfartorneqarluarnissaat anguniassavara. Neriuppungalu sulininni iluaqusiijumaarlunga – aallartinnissaralu assorsuaq pissanngatigaara,” Charlotte Bech oqarpoq.

Meeqqanut, Ilaqutariinnut Atuarfeqarnermullu ingerlatsivimmi pisortaq, Helene Broberg Berthelsen, ingerlatsiviit fagchefii aamma Paamiuni Tasiilamilu immikkoortortaqarfiit, Charlotte Bechip qanimut suleqatigissavai.