Atuarfeqarnermut politikki: Meeqqat atuarfiat ataatsimoorullugu

Kommuneqarfik Sermersuumi meeqqat atuarfiisa qanoq ineriartortinneqarnissaat aamma atuartut pitsaanerusumik atuartinneqartarnissaat pillugit takorluukkat qitiulluinnartut tallimat siunnerfiussapput.

Kommuneqarfik Sermersuup atuarfeqarnermut politikkiata nutaap ima qulequtaqartup ’Meeqqat atuarfiat ataatsimoorullugu – ataatsimoorluta siunissaq pilersissavarput’ oqariartuutigaa, meeqqat atuarfiisa siunissaat ataatsimoorussinikkut suliarineqassasoq. Taama politikkeqalernissap kommunalbestyrelsimit akuerineqarneranut tunngaviulluinnarpoq, meeqqat atuarnerminni pikkorissartuarnissaannik periarfissaasa pitsaanerpaanissaat aamma atuareernerminni ilinniagaqalernissaat.

”Atuagarsornerup tungaatigut meeqqat toqqissisimasumik ineriartortinneqassapput aamma atuarfinni iluarusunnermik misigisaqassallutik. Atuagarsornikkut ineriartornermi  piumasaqaataassaaq, ilinniartitsinerup ineriartuutaasumik pinissaa aamma atuartitsinerup naleqqussartuarneqarnissaa meeqqat ataasiakkaat pisinnaasaat aallavigineqarlutik. Tamanna aatsaat anguneqarsinnaavoq ilinniartitsisut pimoorussillutik sulippata aamma suliffimminnik nuannarinnippata. Pingaarnerpaavorli  meeqqat atuarfiisa ataatsimoorussinikkut ineriartortinneqarnissaat. Angajoqqaat, atuartut, ilnniartitsisut, atuarfiit pisortaat, ingerlatsiviit aamma uangut kommunalbestyrelsimi ilaasortaasugut akisussaassuseqarluta atuarfimmik pitsaasumik atuartitsinermillu pitsaasumik ineriartortitsigutta tamanna anguneqarsinnaalluni,” borgmester, Asii Chemnitz Narup (IA) oqarpoq.

Atuarfeqarnermut politikki tallimanik imaattunik siunnerfeqarpoq:

  • Meeqqat atuarfiat ammasoq aamma peqataatitsisoq, ataat­simut kivitseqatigiilluta
  • Atuartut kalaallit piorsarsimassusaannik aallaaveqartumik nunarsuarmioqataa-sinnaanissaat
  • Meeqqat atuarfiat atuartunik tamanik ilinniarnissamik sulisinnaanermillu piginnaanngorsaasoq
  • Suliffiup avatangiisii pitsaasut – ataatsimoorussamik akisussaaffik
  • Kikkut tamarmik toqqissisimasutut, pingaartinneqartutut naleqartutullu ulluinnarni misigisimanissaat

”Atuartut atuartarnerisa meeqqallu atuarfiisa pitsaanerulernissaat kissaatigalugu tallimanik qulequttanik siunnerfeqarpugut. Taakkulu siunnerfiliussagut atorlugit atuarfinnut ataasiakkaanut naleqquttut suliniutit aamma periaatsit sorliit atorneqassanersut atuarfinnit aamma ingerlatsivinnit suliarineqarnissaat aalajangerneqassapput,” Asii Chemnitz Narup naggasiivoq.

Atuarfeqarnermut politikki kommunalbestyrelsip novembarimi 2016-imi ataatsimiinnerminni akuersissutigaat. Tamatumalu kingorna atuarfeqarnermut politikkissap pilersaarusiorneqarnera kommunip atuarfiini pisortat allalli soqutigisaqaqatigiit suleqatigalugit Meeqqanut, Ilaqutariinnut aamma Atuarfeqarnermut ingerlatsivik suliaqalerpoq. Pilersaarut tamanna kommunalbestyrelsip ataatsimiinneranni kingullermi, tassa martsip 7-anni oqaluuserineqarmat iliuusissap pilersaarusiorallarneqarnera atuarfeqarnermullu politikkip atortussanngortinneqarnera akuersissutigineqarpoq. Pilersaarut aamma siuenrtaqarpoq sumiiffinni ataasiakkaani suliffeqarfiit atuarfiillu suleqatigiinnerisa nukittorsarneqarnissaa. Suliniullu tamanna Paamiuni Atuarfik Tuiisami misiliutitut ingerlanneqarpoq. Tamassuma saniatigut suliniutit allat arfineq pingasut inerisarneqarneri ingerlanneqarlutik.

Atuarfeqarnermut politikkip siunnerfii tallimaasut taakkulu qanoq Kommuneqarfik Sermersuumit piviusunngortinneqarnissaat uani atuarneqarsinnaapput