Nivi tarnimigut innarluutilik: Igasunngorusuppunga

”Ilinniagaqarninni siullerpaamik allagartartassara prinsesse Mariep aqagu tunniuppagu naapinnissaa qilanaareqaara,” 27-nik ukiullip Nivip, Sanap nerisarfiani ippassaq naapikkakku taama oqarfigaanga. Nivi ilinniakkani pillugu ullumi sisamanngornermi siullerpaamik allagartartaarpoq.

Nivi Hansen Gotfredsen inuusuttut allat aqqaneq marluk peqatigalugit, Nuummi Open College Networkimi (OCN) ukiuni kingullerni pingasuni atuartinneqareerlutik ullumi allagartartaarput, kunngikkormiusut ataqqinassusillip prinsesse Mariemit aamma Kommuneqarfik Sermersuup borgmesterianit, Asii Chemnitz Narupimit (IA) allagartassaat tunniunneqarlutik.

Nivi Hansen Gotfredsen tarnikkut innarluuteqartoq OCN-imi atuarnerminut atatillugu, Dr. Ingridip Napparsimmavissuata igaffiani siorna aasami sulinermik misiliilluni sulisalerpoq maannalu Sanap nerisarfiani ullormut nalunaaquttap akunnerini sisamani sulisarluni ataasinngornermiit tallimanngorneq ilanngullugu.

”Nivi ullaat tamaasa suliartornermini suleqatiminik nuannaalersitsisarpoq. Ikiuukkumatuvoq, ajortussarsiortuunani aamma suliassarsiortuaannartuulluni,” Sanap igaffissuani nerisarfianilu pisortaq, Tina Lauridsen oqaluttuarpoq.

Nivi tarnimigut innarluuteqaraluartoq igaffimmi nerisarfimmilu sulilersimanera, pisortap nuannaarutigaa oqarlunilu sutigulluunniit innarluuteqaraluaraanni  suliffeqarnissaq pingaaruteqartoq.

”Tarnikkut innarluutilimmik Nivitut ittumik maani suleqateqarnerput inuiaqatigiinnut suliffeqarfinnullu allanut takutitsineruvoq kusanartoq aamma ullormut nalunaaquttap akunnialuinnannguaniluunniit sapinngisaallu naapertorlugit suliffeqarfiit innarluutilinnik sulisoqalernissaminnut tunuarsimaartariaqanngillat,” Tina Lauridsen oqarpoq Nivillu sulinermik misiliisutut sulisorilersimanera peqqissutigisimanngisaannarlugu oqarluni.

”Maani nerisarfimmi sulillunga nuannareqaara aamma suleqatikka nuannaralugit,” Nivi toastinik nerisarfimmi tuniniagassanik qallersuiitigaluni oqarpoq imalu nangilluni:

”Angusakka karakterit siunissami pitsanngorsariarlugit naammalerpata INUILI-mi igasunngorniarnissannut qinnuteqassaanga. Tassami ataatattut igasoorusukkama,” Nivi qungujulaarluni oqarpoq.

Inuusuttunut innarluutilinnut najugaqaqatigiiffimmi, Kommuneqarfik Sermersuumit qanittukkut Qinngutsinni ammarneqartumi, Nivi inuusottoqartini allat ilagalugit najugaqarpoq.

Nivip ikinngutaasalu inuusuttut allat ilinniagaqareernerminnut atatillugu, kunngikkormiusut ataqqinassusilimmit prinsesse Mariemit aamma borgmester Asii Chmnitz Narupimit allagartassaannik tunnineqarnerannit Katuamit assit ilaat massuma ataani isiginnaarneqarsinnaapput: Link