Peqqissuseq pillugu Qeqertarsuatsiaani ataatsimiinneq

Peqqissuseq, atornerluineq, inuussutissarsiutit aamma ilinniagaqarneq pillugit Qeqertarsuatsiaani ulluni februaarip 18-ianni aamma 19-ianni 2017-imi ataatsimiinnermi sammineqartussat ilaannaraat.

Pissutsit nunaqarfimmi ullimmikkut qanoq ippat, qanoq iliuuseqartoqarsimava, suut iluaqutaasimappat aamma siunissamut pilersaarutit qanoq ittuuppat? Taakku qulequttat ulluni marlunni isumasioqatigiinnermi eqqartugassanut ilaapput, ilaatigut peqqinnissaqarfimmi sulisut, politiit, kommunimi politikerit aamma nunaqarfimmi Qeqertarsuatsiaani innuttaasunit saqqummiunneqassallutik tamatumalu kingorna innuttaasunut peqqinnarnerusoq anguniarlugu qanoq ingerlariaqqittoqarnissaa oqallisigineqassalluni.

Ataatsimiinnissaq Kommuneqarfik Sermersuumi Isumaginninnermut, Suliffeqarnermut Inuussutissarsiornermullu ingerlatsiviup aamma ilaquttariinnut taamatullu tarnikkut peqqissaasup, Henriette Berthelsenip aaqqissuussaraat.

”Qeqertarsuatsiaani innuttaasunit siunissami peqqinneq, atornerluineq, inuussutissarsiutit taamatullu ilinniartitaanermut tunngasut qanoq iliuuseqarfigineqarsinnaaneri tusarfiginissaat qilanaaraarput taamatullu ataatsimiinnermi anguneqarumaartussat neriulluarfigalutigit,” Isumaginninnermut, Suliffeqarnermut Inuussutissarsiornermullu ataatsimiititaliap siulittaasua, Charlotte Ludvigsen (IA) oqarpoq.