Meeqqat atuarfiini atuareernermilu paaqqinnittarfinni nerisat peqqinnartut

Atuarfinni atuareernerullu kingorna paaqqinnittarfinni meeqqat arfinilinniik 16-it tikillugit ukiullit nerisaat pillugit Kommuneqarfik Sermersooq politikkeqalerpoq.

Taama politikkeqalernermi isumannaarniarneqarluni, meeqqat atuarfimmiitillutik paaqqinnittarfinniitillutillu allanngorartunik peqqinnartunillu nerisaqartarneri angajoqqaanit naatsorsuutigineqarnissaa.

Kommunimi meeqqat inuusuttuaqqallu ornittagaanni nerisassat ullormut pingaaruteqarnerit neriffiillu akornanni tamulugassat eqqarsaatigalugit nerisaqarneq pillugu politikki innersuussuteqarpoq. Taakku tassaallutik ullut tamaasa naatitartortitsisarnerit paarnartortitsisarnerillu, karrinik aserorterneqanngitsunik iffiukkat atorneqarnerunissaat, orsut akuugaanermikkut naammatsissimanngitsut atorneqarnissaat aamma sapaatip akunneranut minnerpaamik ataasiarluni aalisagartortarnissaq.

”Meeqqat ullup ilarujussua atorlugu paaqqinnittarfinniittarput, taamaattumillu pingaaruteqarluinnarluni kommunip atuarfiini paaqqinnittarfiinilu inuussutissanik peqqinnartunik allanngorartunillu meeqqat nerisaqartinneqarnissaat. Ullup ingerlanerani meeqqap inuussutissanik peqqinnartunik nerisaqarnissaa angajoqqaanit, kommunimit aamma atuarfinnit akisussaaffigineqarpoq. Tassalu tamanna akisussaaffik toqqammavigalugu nerisaqarnermut politikki pilersinneqarluni,” Meeqqanut, Ilaqutariinnut Atuarfeqarnermullu ataatsimiititaliap siulittaasua, Poul Hansen (D) oqarpoq.

Ullormut pingaarnerpaamik nerisarnissaq meeqqanut atuartunut neqoroorutigineqartassaaq. Aamma iffiat, pastat, qaqorteqqasut imaluunniit naatsiiat tamakkulu saniatigut naatitanik paarnanillu aamma nerisaqarnissaq nerisat pillugit politikkimi anguniagaallutik. Politikkimi aamma innersuussutigineqarluni pingaartinneqarpoq neqit, timmissat, aalisakkat orsoqarpianngitsut nerineqartarnissaat taakkununnga aamma ilaallutik manniit immussuillu orsoqarpianngitsut.

Nerisitsisarnermi sinaakkutissat
Nerisat pillugit politikki nerinerinnarmut imigaqarnermullu kisimi attuumassuteqanngilaq. Aamma nerisitsinermi sinaakkutassat eqqarsaatigineqarput. Tassa ilinniartitsisunit perorsaasunillu meeqqat nereqatigineqartarnissaat pingaaruteqartutut anguniagaavoq, taamaaliornermi takutinneqassalluni nereqatigiinnerup qanoq pingaaruteqassusia.

”Meeqqat eqqiluisaarnermut, ataatsimoorluni nerinissamut meeqqat tamarmiullutik piareersaasarnissaannut, nerinerup nalaani iluasaarnissamut, sassaalliinermut atoriikkanillu piiaanermut ilinniartitsisut perorsaasullu takutitsilluartarnissaat pingaaruteqarluinnarpoq. Pingaaruteqarportaaq nerinerup piffissaqarfigilluarnissaa. Aamma pingaaruteqarluni meeqqat nererusussusiat eqqarsaatigalugit nerisoqartarnissaa nerinerullu toqqissisimanartumik ingerlanneqarnissaa pingaaruteqarlunissaaq. Tamakku tamaasa eqqarsaatigalugit kommunalbestyrelse sinnerlugu nuannaarutigaara nerisat peqqinnartut allanngorartullu taamatullu nerisitsisarnermi sinaakkutinik nerisat pillugit politikki innersuussimmat,” Poul Hansen oqarpoq.

Atuarfinni atuareernerullu kingorna paaqqinnittarfinni (arfinilinniik 16-it ukiullit eqqarsaatigalugit) nerisat pillugit politikki pilersinneqartoq nerisat pillugit politikkip aappassaraa. Siulleq pilersinneqartoq tassaavoq Kommuneqarfik Sermersuumi meeraaqqerivinni meeqqerivinnilu (ukioqanngitsuniik arfinillit tikillugit ukiulinnut) nerisaqarnermi politikki ukiup massuma aallartinnerani aalajangiunneqartoq.

Inuusuttuaqqat inersimasullu 17-it sinnerlugit ukiullit eqqarsaatigalugit taakku kommunip timersortarfiini naluttarfimmilu nerisaqartarneri pillugit politikkissaq maanna suliarineqaleruttorpoq.

Atuarfinni atuareernerullu kingorna paaqqinnittarfinni kommunip nerisaqarneq pillugu politikkia Kommuneqarfik Sermersuup nittartagaani atuarneqarsinnaavoq