Peqqinnarnerusumik inuuneqalernissaq pillugu atsioqatigiinneq

Kommunimi innuttaasut peqqinnarnerusumik eqeersimaarnerusumillu inuuneqalernissaannut periarfissiinissaq isumaqatigiissutikkut anguniagaavoq.

Isumaqatigiissut atsiorneqarpoq kommunalbestyrelsep ataatsimiittarfiani Nuummi, atsiortuullutik Meeqqanut, Ilaqutariinnut Atuarfeqarnermullu ataatsimiititaliap siulittaasua, Poul Hansen (D) aamma Kalaallit Nunaanni Timersortartut Kattuffiata siulittaasuata tullia, Finn Meinel.

Kommuneqarfik Sermersuumi Kommunalbestyrelse kingullermik ataatsimiinnermini Kalaallit Nunaanni Timersoqatigiiffiit Kattuffianik (GIF) suleqatigiinnissamut isumaqatigiissut akuersissutigaa. Taamalu isumaqatigiissuteqarneq ataatsimiititaliap siulittaasuata, Poul Hansenip nuannaarutigaa:

“GIFilu suleqatigiinnissaq inuiaqatigiit iluanni peqqinnerusumik inuuneqalernissamut nukinnik katersinissamut periarfissaavoq immikkuullarissoq. Kommunitsinni innuttaasut meeraanermiit utoqqanngornermut pitsaanerpaamik inuuneqarnissaannut, pitsaasunik periarfissiinissamut peqatigiilluta eqeersimaartumik peqqissumillu inuuneqarnissaq anguniagaraarput” Meeqqanut, Ilaqutariinnut Atuarfeqarnermullu Ataatsimiititami siulittaasoq Poul Hansen (D) oqarpoq.

Suleqatigiinnissamut isumaqatigiissummi GIFip Kommuneqarfik Sermersuullu suleqatigiissutigisinnaasaanni immikkoortut suliassallu nassuiarneqassapput, immikkoortullu uku sisamaasut aallaavigineqassallutik:

  • Kommuneqarfik Sermersooq (KS) aamma GIF peqatigiiffinnik piginnaasatigut ineriartortitsinissamut periarfissanik ataqatigiissaarisuussapput.
  • KS aamma GIF  ataatsimoorlutik nunat tamalaat akornanni timersornermut aaqqissuussat annertuut amerlanerusut Kommuneqarfik Sermersuumi ingerlanneqartarnissaat sulissutigissavaat.
  • KSimit GIFimillu suliniutit assigiinngitsut aqqutigalugit meeqqat atuarfianni peqqinneq aalanissarlu qitiutinneqassasut.
  • KS aamma GIF, peqatigiiffiit ataatsimut ilaasortanik nalunaarsuiffeqarnerisigut, timersornermut tunngasuni nammineq kajumissuseq aallaavigalugu suliaqartunut attuumassuteqartut pitsaanerulersinniarlugit suleqatigiissasut.

Kommuneqarfik Sermersuup aamma Kalaallit Nunaanni Timesoqatigiit Kattuffiata isumaqatigiissutaat pillugu annertunersumik paasisaqarusukkaanni tamanna ataani atuarneqarsinnaavoq.

Kommuneqarfik Sermersuup aamma Kalaallit Nunaanni Timersoqatigiiffiit Kattuffiata akornanni suleqatigiinnissamut isumaqatigiissut