Qinngasaarisarneq naameerlugu ikinngutiginneq angerlugu

Eqqumiitsuliat arfinillit Paamiuni meeqqat atuarfianni Tuiisami ullaaq tallimanngornermi saqqummersinneqarneri borgmester Asii Chemnitz Narupimit ammarneqarpoq. Eqqumiitsuliat qinngasaarisarnermut ikinngutigiinnermullu tunngasuupput.

Borgmester Asii Chemnitz Narupip Tuiisamilu pisortap, Marius Jeremiassen-Jakobsenip, eqqumiitsuliat assilisat katitikkat arfinillit saqqummersinneqarneranni ammaammata, meeqqat atuartorpassuit 100-nik ikinnerunngitsut klassiniit atuarfiup katersuuttarfiannut ingerlaarrapput. Eqqumiitsuliat taakku atuarfiup qiterpiaani ersareqalutik nivigapput.

Eqqumiitsuliat suliarineqarput eqqumiitsuliortumit Nuummi najugaqartumit, Ivínguak´ Stork Høeghimit, suliaallutillu assilisanik assinillu katitikkanik.

” Qinngasaarneqarnermi misigisat qanoq ittuunersut eqqumiitsulianni takutikkusuppara. Qinngasaarneqartarneq assut qamuuna annernartarpoq. Taamaattumik eqqumiitsulianni kammalaatigiinneq qanoq nuannertigisarnersoq ilanngullu aamma takutikkusuppara. Tassami kikkut tamarmik kammalaateqarnissamik pisariaqartitsipput,” , Ivínguak´ Stork Høegh oqarpoq.

Qinngasaarisarneq eqqumiitsuliallu
Tuiisami aturtut erinarsorlutillu nipilersulinnginneranni borgmester Asii Chemnitz Narupip oqalugiarnermini eqqartorppaa qinngasaarisarnerup eqqumiitsuliallu qanoq imminnut ataqatigiinnerat:

”Qinngasaarisarneq nuannarinngilluinnarpara. Inuit qinngasaarneqartilluta qamuuna assut annersinneqartarpugut nikallugalersarlutalu. Qinngasaarneqarneq inummut sequtserutaasarpoq – aamma ajattugaanermik misigilersitsisarluni,” borgmesteri oqarpoq eqqumiitsuliallu pillugit ima nangilluni oqarluni:

”Eqqumiitsuliat immikkorluinnaq uangutsinnut oqariartuuteqartarput – eqqumiitsuliat oqaasiupput atuarfinni ilinniarneqarsinnaanngitsut inuunermili ilinniarneqartarlutik. Eqqumiitsuliat paaserusullutigit isiginnaarutsigit taava taakku ataqatigiissilersinnaavaatigut. Taamaattumik nuannaarutigaara eqqumiitsuliat uku arfinillit kusanarluinnartut atuarfimmi maani nuannaarutigilesinnaagatsigit, tassami taakku oqaluttuuppaatigullusooq eqqaasillutalu qinngasaarinngikkutta ikinngutigiinneq qanoq pingaaruteqartigisartoq.”

Eqqumiitsuliat arfinillit atuarfinni arfineq pingasuni
Eqqumiitsuliat aallaavigalugit ikinngutigiinneq aamma qinngasaarisarneq pillugit kommunip aturfiini sammineqartassapput ilaatigut pinnguarneq atorlugu. Eqqumiitsuliat taakkulu aallaavigalugit atuartitsinermut atortussat aamma atorlugit qinngasaarisarneq aamma qinngasaartittarneq qimallugit oqaloqatigiissinnaaneq paaseqatigiissinnaaneq ilinniartitsissutigineqartassapput.

Kommuneqarfik Sermersuumi aturfiit arfineq pingasuusut tamarmik eqqumiitsulianik arfinilinnik nivinngaaffigineqassapput. Aturfik Tuiisaq Paamiuniittoq tassa siullersaavoq tullinnguutissalluni Nuummi Atuarfik Samule Kleinschmidt (ASK).