Inuusuttunut sullissivik Nuummiittoq nukittorsarneqassaaq

Inuusuttunut sullissivik illumut allamut nuunneqassaaq taamatullu nukittorsarneqassalluni. Tamanna aappaagumut missigersuutinit aningaasalerneqassasoq kommunalbestyrelsimit aalajangiunneqarpoq.

Inuusuttunut sullissivik maanna inissiat ilaanni kiilerimi sullissiveqartoq killeqaqisumik sullissisarpoq. Tassa kiilerip inaasa mikivallaarneri pissutigaluguit inuussuttunik oqaloqateqartarneq killeqartarluni soorluttaaq aamma inuusuttunut arlalinnut suliniutinik assigiinngitsunik, soorlu aalajangersimasunik sammisaqartitsineq paasissitsiniaanerillu ajornakusoortarlutik.

Inuusuttunut sullissivik Nuummi atuartut angerlarsimaffigisimasaannut aappaagu nuunneqassaaq.

Nuunneqarneranullu atatillugu inuusuttunut siunnersortit ataatsimik ilaneqassapput. Taakku ilaneqarnerani suliassat inuusuttunut attuumassuteqartut amerlineqassallutik. Aamma inuusuttut sullissivimmut oqaloqatiginninnissamik innersuunneqarneq ajortut amerlanerit aggersarneqartalissallutik.

”Inuusuttut inuunerminnik aallartitsilluarnissaat pingaartorujussuuvoq. Tamannarpiarlu pillugu tassa kommunalbestyrelsi tamarmiusoq siunnersuummut tassunga akuerseqataapput”, Meeqqanut, Ilaqutariinnut Atuarfeqarnermullu ataatsimiititaliap siulittaasua, Poul Hansen (D) oqarpoq.

Ilinniartut angerlarsimaffigisimasaata allanngortinneqarnissaanut atatillugu inuusuttut pinerluuteqarsimasutut pineqaatissinneqarsimasut inissiisarfissaannik ilaneqassaaq. Taamaalilluni Kommuneqarfik Sermersuumi inuusuttunut pinerluuteqarsimasunut ullumikkut inissiisarfeqanngitsoq peqalissalluni.