Paamiuni iliveqarfitoqaq inuusuttunit aaqqissuunneqarpoq

Paamiuni inuusuttunut sullissivimmi, Piorsaavimmi atuartut 20-t, iliveqarfitoqqami sannigasut aamma ungalut aserfallassimaqisut qalipallugillu iluarsartuuppaat aamma ivikkat naasimaqisut killorlugit.

Iliveqarfitoqqamik iluarsatuussineq aggustimi aallartittoq septembarimi apimmat issilerlunilu unitsikkallarneqarpoq. Aappaaguli aputaarpat iluarsartuussineq nangeqqinneqarumaartoq, Piorsaavimmi pisortap, Kista L. Petersenip oqaluttuaraa:

”Iliveqarfitoqaq ukiut ingerlaneranni assut aserfallassimaqaaq, ilaatigut sannigasut ungalullu qilipaataat katagarlutik aamma qisuttaat asiusimaqalutik. Iliveqarfitoqqamik iluarsartuussineq Paamiuni inuttaasunit assut nuannaarutigineqarpoq, inuusuttullu sullarinnerannik assuk qujaniarfigineqarlutik,” pisortaq oqarpoq imalu nangilluni:

”Inuusuttut Piorsaavimmi atuartut iluarsartuussinertik assut nuannaraat aappaagumullu nangeqqinnissartik qilanaarilereerlugu,” Kista L. Petersen naggasiivoq.