Tasiilami aqquserngit nutaamik asfaltilersorneqartut

Sapaatit-akunneri marluinnaat qaangiuppata Tasiilami aqquserngit nutaamik asfaltilersoreersimassapput. Tasiilami aqquserngit iluarsartuunniarlugit atoruminarsarlugillu aallartereerput inaarneqalereerlutillu.

Suliffeqarfiup Colasip sapaatit-akunnerinik marluinnarnik piffissaqartinneqarlutik asfaltiliassat, maskiinat, atortussat sulisussallu Islandimit Tasiilamut tikiuppaat. Suliffeqarfiup Kommuneqarfik Sermersuumi Materialegårdenimi sulisut sulisut suleqatigalugit illoqarfiup aqquserngi kusassarlugit aallartippaat.

Ukiup matuma ingerlanerani Kommunalbestyrelsimi aalajangiunneqarpoq, pilersaarutip ukioq manna aallartinnissaa qulakkeerniarlugu aningaasaliissutit siuartinneqassasut kiisalu ilassutitut aningaasaliissutissat akuersissutigalugit. Tasiilami asfaltilersuineq tamakkerlugu missingersuutit 16,5 millioner koruuninngussapput.

2014-imi Tasiilami aqquserngit suliarineqarneranit misilittakkat Colasimit atorneqarput.

”Colasip aamma Kommuneqarfik Sermersuup qaammatini arlalinni pilersaarusiornermikkut Tasiilami asfaltilerineq piviusunngortinneqarpoq. Illoqarfimmi Tasiilamisut ittumi aqquserngit suliarineqarnissaannut pilersaarut taama angitigisoq suliarissallugu suliassaavoq annertooq. Atortussat tamarmik piffimmut ataatsimut assartorneqarput, nunataatalu inissisimanera silaannarlu aallaavigalugit pilersaarusiortussaalluta. Imalu paasineqassaaq, suliassat tamaasa sapaatit-akunneri marluk ingerlanerini pilersaarutit malillugit suliarineqassapput. Taamaattumik ukioq manna sulinitsinni suleqatigiilluarneq kiisalu 2014-imit misilittakkat aallaavigisinnaagatsigit pitsaaqutaavoq,” oqarpoq Rudi Birkedal, Kommuneqarfik Sermersuumi sanaartornermut pisortaq.

Ukioq manna Tasiilami aqquserngit iluarsartuunneqarnerisa kingorna, ukiuni tulliuttuni arfineq-pingasuniit qulit tikillugit annertuumik asfaltilerisoqaqqinnginnissaa Kommuneqarfik Sermersuumit naatsorsuutigineqarpoq.

Tasiilami aqquserngit iluarsaanneqartut