Sermersooq kajumisutsimik sulineq pillugu nittartakkamik pilersitsivoq

Nittartagaq nutaaq kajumissutsimik sulilluartut imminnut nassaarinissaannut ikiutaassaq

Nuummi aaqqissuussani timersortoqarneranilu unammiuaaqatigiinnerni minnermi anginerusuniluunniit, kulturikkut aammalu isumaginninnikkut tunngatillugu assersuutigalugu utoqqaat innuttaasunut asiarsimaarnissamut aaqqissuussaq imaluunniit Nuuk Marathon ingerlanneqarnerani kajumissutsit tunngavigalugu ikiuukkusuppit?

Taava Kommuneqarfik Sermersooq ilinnut ajornaatsumik periarfissippaatit. Kommuni tamanna pillugu nittartakkamik www.sunngiffik.gl pilersitsivoq kajumissutsimik sulineq pillugu.
Nittartakkami kajumissutsimik sulerusullutit nalunaarsinnaavutit qanorlu suleqataarusunnerlutit kajuminnerit aallaavigalugu suleqataasinnaallutit.
Peqatigiiffiit aaqqissuussanilu aaqqissuisut nittartagaq aqqutigalugu nalunaaruteqarsinnaalerput taamaasillutillu kajumissutsimik sulerusuttunik pissarsiorlutik.
Maannakkorpiaq utoqqaat asimukarnissaannut nammineq kajumissutsimik peqataaniarluni, Nuummi Atoqqitassaasivimmut, Nuuk Marathonimut kiisalu rulleskinik nunatsinni pissartanngorniunnissamut nalunaartoqarsinnaavoq.

“Kajumissutsimik sulineq kommuni tamakkerlugu nukittorsaaqataaffigerusupparput. Kajumissutsimik sulisut suliassanik assigiinngitsunik kivitsisinnaapput, ullumikkormit allaanerusumik iliuuseqarnitsigut. Kajumissutsimittaaq sulineq inoqatigiinni ataatsimoorneq nukittorsaaqataaffigisarpaa taamatuttaaq ikinngutitaartornissaminnik nutaanillu ilinniarnissaminnik periarfissinneqarlutik.” borgmesteri Asii Chemnitz Narup-ip tamanna pillugu oqaatigaa.

Kommuneqarfik Sermersooq kissaatigaa kommunitsinni kajumissutsimik sulinermi sinaakkutit pitsaasut pilersinneqassasut.
Nittartagaq www.sunngiffik.gl aqqutissiueqataassaaq. Siorna kommuni kajumissutsimik sulisut illuat ammaanersiorpaa, taanna peqatigiiffiit allalu kajumissutsimik suliaqartut siunnersorneqarnissaannik aammalu ataatsimiittarfinnik atuinissaminnik periarfissiisoq.