Tasiilami aqquserngit iluarsaanneqartut

Tasiilami aqquserngit ukioq’manna pitsanngorsarneqarnissaannut Kommunalbestyrelsip missingersuutini 6,5 millioner koruunit siuartillugit tunniuppai aammalu suli 4 millioner koruuninik aningaasaliissuteqaqqilluni.

Kommuneqarfik Sermersuumi Tasiilami aqquserngit iluarsaanneqarnissaat maannangaaq kissaatigineqarpoq taamaalillunilu ukiut marluk matuma siorna iluarsaassinerit malitseqartinneqarput.

2014-innnguinnartoq aqquserngit nutaamik asfaltilersorneqarput tamannalu ilutigalugu aqquserngit ujaraaqqanik qalliutillit arlallit asfaltilersorneqarput. Tamanna aqqusinernik imertaajaanermi ajornartorsiutinut iluarsiissutaavoq nalinginnaasumillu aqquserngit pitsaanerulersillugit. Maannakkut immikkoortup aappaa suliarineqassaaq taamaattumillu Tasiilami aqquserngit sinneri ukioq´manna iluarsaanneqarsinnaaniassammata aningaasaliinissaq siuartinneqarpoq.

”2014-imi iluarsaassinitsinnit Kommunimi maannakkut ajunngilluinnartunik misilittagaqartoqalerpoq. Tamatuma asfaltip pitsaassusia pitsannguallatsippaa. Kommunip Materielgårdenimi sulisui kingullermik ilinniartinneqarput tamatumalu kingorna aserfallatsaaliugassanik annikinnerusunik isumaginnissinnaalerput. Suliassap ukioq´manna naammassineqarnissaa qulakkeerusupparput taamaattumillu aningaasat 2017-imut immikkoortitat siuartillugit tunniuppavut immikkullu 4 millioner koruuninik aningaasaliissuteqaqqilluta. Taamaalilluta Tasiilami aqquserngit pingaarnerit suli nutaamik asfaltilersorneqanngitsut asfaltilersorpavut,” Ado Holm (IA), Sanarfinermut Avatangiisinullu Ataatsimiittami siulittaasoq oqarpoq.

Tasiilami asfaltilersuinermut tamarmut missingersuutit 16,5 millioner koruuninngussapput. Missingersuutini 6 millioner koruunit immikkoortinneqareersimapput. 2017-imut missingersuutini 6,5 millioner koruunit suliassap siuartinneqarneranut immikkoortinneqareersimapput aamma 4 millioner koruunit immikkut aningaasaliissutigineqarput. Immikkut aningaasaliissutit kommunip karsiatigoortillugit aningaasaliissutaapput.

Suliassaq naammassippat ukiuni tulliuttuni arfineq-pingasuni – qulini annertunerusumik asflatilerisoqartarnissaa Kommuneqarfik Sermersuumi naatsorsuutigineqanngilaq.