---
title: "Kulturimut tapiissutit"
date: "2026-08-05"
created: "2026-06-01"
---

[Saqqaa](https://sermersooq.gl/)

                    [Innuttaasunut](https://sermersooq.gl/innuttaasunut)

                    [Aningaasartuutinik tapiissutinillu qinnuteqarfissat](https://sermersooq.gl/innuttaasunut/aningaasartuutinik-tapiissutinillu-qinnuteqarfissat)

                [Kulturimut tapiissutit](https://sermersooq.gl/innuttaasunut/aningaasartuutinik-tapiissutinillu-qinnuteqarfissat/kulturimut-tapiissutit)

# Kulturimut tapiissutit

Inuit ataasiakkaat, soqutigisaqaqatigiit, peqatigiiffiit allallu suliniuteqartut Kommuneqarfik Sermersuumi kulturimut tunngasunik aaqqissuussinernut tapiiffigineqarnissamik qinnuteqarsinnaapput.

## **Kommuneqarfik Sermersooq tamakkerlugu kulturimut tunngasunik sammisassaqartitsinernut tapiissutit**

Inuit ataasiakkaat, soqutigisaqaqatigiit, peqatigiiffiit allallu suliniuteqartut Kommuneqarfik Sermersuumi kulturimut tunngasunik aaqqissuussinernut tapiiffigineqarnissamik qinnuteqarsinnaapput.

Tapiissuteqarnermik aaqqissuussaq pingaartumik suliniutinut annikinnerusunut naatsorsuussaavoq. Suliniutit annertunerusut eqqarsaaatigalugit Kommuneqarfik Sermersuumi periarfissaqarpoq Aningaasaateqarfik [Sermeq](https://sermersooq.gl/kl/tapiissuteqartarfik-sermeq-3/) aamma [Nuummi](https://sermersooq.gl/kl/committee/najukkami-ataatsimiititaq-nuuk/), [Paamiuni](https://sermersooq.gl/kl/committee/najukkami-ataatsimiititaq-paamiut/), [Ittoqqortoormiini](https://sermersooq.gl/kl/committee/ittoqqortoormiit/) kiisalu [Tasiilami](https://sermersooq.gl/kl/committee/najukkami-ataatsimiititaq-tasiilaq/) najukkani ataatsimiititalianut qunnuteqarnissaq.

Ingerlatsiviup nammineq ingerlatsinermi qinnuteqaatit 30.000,00 kr.-it angullugit amerlassusillit akuersissutigisinnaavai. Qinnuteqaatit 30.000 kr.-it sinnerlugit amerlassusillit Aningaasaqarnermut Inuussutissarsiornermullu Ataatsimiititamit aalajangiiffigisassanngorlugit saqqummiunneqartarput. Ukiuni arlalinni suliniutigineqartussanut qinnuteqaatit aamma Aningaasaqarnermut Inuussutissarsiornermullu Ataatsimiititamit aalajangiiffigisassanngorlugit saqqummiunneqartarput.

Makkununnga tapiissuteqartoqarsinnaavoq:

- Sammisassat kulturimut tunngasut tamanit orninneqarsinnaasut, aamma sinneqartoorutaanngitsumik ingerlanneqartut
- Sammisassat kulturimik eriaginninnertut nutarterinertullu ittut
- Sammisassat najukkani innuttaasunut nukittorsaaqataasut

Nalinginnaasumik tapiiffigineqarneq ajortut  **** :

- Nipilersuutinik filminillu immiussinerit (kulturip oqaluttuarisaaneranut iluatinnaateqarsinnaasunik immiussat pinnagit)
- Atuakkat allallu saqqummersinneqarneri
- Peqatigiiffiit suliniaqatigiiffiillu, siulersuisunut ilaasortanik akissarsiaqartitsisut
- Aaqqissuussinerit imigassamik aalakoornartortalimmik sassaalliinertallit

Tapiiffigineqarneq ajortut :

- Aaqqissuussat naammassineqareersimasut imaluunniit aallartinneqarsimasut qinnuteqaatip nassiunneqannginnerani
- Suliffeqarfinni sammisassat, taakku suliffeqarfiup nalinginnaasumik ingerlatsineratigut naammassineqartussaagaluartut
- Sammisat inuussutissarsiutinut tunngasut
- Ingerlatsinermut aningaasartuutit
- Paasisassarsiorluni angalanerit
- Aaqqissuussinerit politikkikkut, upperisarsiornikkut, immikkoortitsisumik imaluunniit sulisut kattuffiinut tunngasunik siunertallit

**Qinnuteqarnermut ilitsersuut**

- Qinnuteqaruit taava suliniutigineqartup nassuiarneqarnera, missingersuutit peqqissaarussat, peqataasut allattorsimaffiat, siunertaq kiisalu saaffigineqartut ilanngutissavatit. Aaqqissuussani meeqqanut tunngatinneqartuni ilanngunneqassaaq inuit suleqataasut meeqqanik innarliisimannginnerannut uppernarsaatit.
- Tapiissut akileraartarnermut tunngasut pillugit sukkulluunniit malittarisassat atuuttut malillugit tunniunneqassaaq.
- Qinnuteqaatit uunga nassiunneqassapput: kultur@sermersooq.gl ”Kulturimut tapiiffigineqarnissamik qinnuteqaat: [illit suliniutivit taaguutaa]” pineqartup nalaani.

- Qinnuteqartoq kommunip suliffeqarfiinik suleqateqarsimappat tamanna suleqatigiinneq allakkatigut uppernarsaateqartinneqassaaq.
- Qinnuteqartup akisussaaffigivaa oqartussanut allanut qinnuteqaatissat pisariaqartut qinnutiginissai, soorlu nunaminertamik atugassinneqarnissamut akuersissutit.
- Piianeq, eqqaaneq aamma torersaaneq qinnuteqartup nammineq akisussaaffigivaa.

**Qinnuteqarnerup ingerlanera**

- Qinnuteqaatinik nassiussineq ingerlaavartumik pinissaa periarfissaqarpoq. Qinnuteqaatit 30.000 kr.-it inorlugit amerlassusillit sapaatip akunnerini 3-ni suliarineqarsinnaaneri naatsorsuutigineqassaaq, qinnuteqaatillu 30.000 kr.-it sinnerlugit amerlassusillit sapaatip akunneri 8-t angullugit sivisussuseqarsinnaapput.
- Qinnuteqaruit imminut pisussaaffilissaatit isumagissallugu kultur@sermersooq.gl inaarutasumik nalunaarusiorfiginissaanut naatsorsuutitalinnik, taakkulu suliniutip naammassineranit kingusinnerpaamik qaammatit pingasut qaangiutsinnagit nassiunnissaannut. Aningaasat atorneqanngitsut kommunimut utertinneqassapput naatsorsuusiornerup naammassineqarnerani. Aningaasat qinnutigineqartut siunertanut allanut atorneqarsimappata taava tapiissutigineqartut kommunimut utertinneqarnissaat piumasarineqarsinnaavoq.

**Qinnuteqartoq tulliuttut pillugit paasinnippoq:**

- Eqqumiitsuliornermut tunngasunut tapiissutit kiisalu akissarsiat isertitatut A-tut tunniunneqassasut. Aningaasat tunniunneqarneranni A-mik akileraaruserneqassasut.
-
- Suliniummut atatillugu angalanernut aningaasartuutinut, ineqarnermut suliaqarnermullu aningaasartuutinut allanut tapiissutit isertitatut B-tut tunniunneqassasut. Aningaasartuutit taakkununnga tunngasut ilanngaaserneqartussaatitaasut. Isertitat taakku inatsisitigut piumasaqaataasoq naapertorlugu nalunaarutigissallugit qinnuteqartup nammineq akisussaaffigivaa. Ilanngaataasinnaasunik aningaasartuuteqarsimaguni nalunaarutigissallugit qinnuteqartup nammineq akisussaaffigivaa.
- Tapiissutit sumut tapiissutaanerannik erseqqissumik taaneqarsimanngitsut isertitatut A-tut tunniunneqassapput. Aningaasat tunniunneqarneranni A-mik akileraaruserneqassasut.
- Qinnuteqaammi paasissutissat missingersuutillu tunngavigalugit Kommuneqarfik Sermersuumi nalornissutit nalilersorneqartarput. Pisariaqarpat Akileraartarnermut Aqutsisoqarfimmit siunnersorneqareernikkut. Qinnuteqartup aamma Kommuneqarfik Sermersuup akornanni naliliineq pillugu isumaqatigiinngissutit Akileraartarnermut Aqutsisoqarfimmit aalajangiivigineqassapput.

Paasissutissanik pissarsiffik:

- Aningaasarsianit akileraarutit pillugit Inatsisartut inatsisaat nr. 12, 2. november 2006-imeersumi § 14. *Aningaasarsiat akileraaruteqaataasussat, assersuutigalugu: 1) Inuussutissarsiutitut ingerlassamit sumilluunniit aningaasarsiat, , s.i.:… ilisimatusarnermik, eqqumiitsuliornermik imaluunniit atuakkiornermik sulinermut akissarsiat, imaluunniit suliaq, kiffartuussineq imaluunniit ikiuineq sunaluunniit aqqutigalugu akissarsiat tamat,*
- Aningaasarsianit akileraarutit pillugit Inatsisartut inatsisaat nr. 12, 2. november 2006-imeersumi §75.
- Kalaallit Nunaanni akileraarusiisarneq (legatinut)
- Aningaasarsianit akileraarutit aamma sulisoqarnermut akitsuutip akilersinneqartarneri pillugit Namminersorlutik Oqartussat nalunaarutaat nr. 10, 20. september 2011-meersoq

Ukiumut ataasiarluni Aningaasaqarnermut Inuussutissarsiornermullu Ataatsimiititamut ilisimatitsissummik nassiussisoqartassaaq.

Kommuneqarfik Sermersuumi kulturimut tunngasunut tapiissuteqartarnermut malittarisassat kommunalbestyrelsimit suliarineqarput akuersissutigineqarlutillu ulloq: 23-06-2022 (AIAimit)

Malittarisassat 01-10-2022 atuutilersinneqarput tassungalu peqatigitillugu malittarisassatoqqat atorunnaarsinneqarlutik.