Quppernermi uani Aningaasaateqarfik Sermeq pillugu atuarnerusinnaavat, ilanngullugu kulturilerinermi aningaasaliissutinik qanoq qinnuteqassanersutit.
Kina qinnuteqarsinnaava?
Sullissiviit kulturikkut suliaqarfiusut, peqatigiiffiit suleqatigiilluunniit, aamma inuit ataasiakkaat tapiiffigineqarnissamik qinnuteqarsinnaapput.
Sullissiviit pisortanit tapiissutinik pisartagaqareersut ingerlatsinerup nalinginnaasup qanoq ililluni anneruneranik nassiuaateqassapput.
Aningaasaliissutini suna siunertaava?
Kultureqarnermut immikkoortitat kulturikkut suliaqarnermi nutaanik misileraaffiusunik pilersitsinissamut kulturimillu suliaqartut assigiinngitsut, namminersorlutik inuussutissarsiortut kommunimilu innuttaasut akornanni suleqatigiinnermik siuarsaanermut atorneqassapput.
Kommuneqarfik Sermersuumi innuttaasunut kommunimullu tikeraartunut kulturikkut ingerlatanut tapiissuteqartoqarsinnaavoq.
Qinnuteqaatigisat imatut nalilersorneqassaaq
Kulturikkut suliaq Kommuneqarfik Sermersuumi ingerlanneqassaaq tamanillu ornigarneqarsinnaassalluni.
Aningaasaliissutigineqartut pingaarnersiorneqarnissaannut atatillugu Kommunalbestyrelsip aalajangernikuuaa, suliassat imaattut pingaartinneqassasut:
• Kommunip kulturi pillugu politikkianik, pingaarnertut periusissiaanik aammalu suleqatigiinnissamik isumaqatigiissummik tapersersuiffiusut.
• Ullutsinni kalaallit eqqumiitsuliortaasiannik inerisaasut
• Kommunimi inoqarfippassuit akornanni ataqatigiissaarutaasut
• Suleqatigeeriaatsini nutaani kulturikkut ingerlatanik atituumik amerlasuunik peqataasullit
• Innuttaasut ulluinnarnik eqqumiitsulianik kulturimullu tunngasunik ajornanngitsumik naapitsiffigisinnaasaat
• Meeqqat inuusuttullu eqqumiitsulianik kulturikkullu ingerlatanik naapitsinissaannik siuarsaasut
• Tamanit orninneqarsinnaasut
• Annertunerusumik aningaasaliiffigineqarsinnaanermik takutitsiffiusut
Qinnuteqarnissaq qaqugumut killeqarpa?
Aningaasaateqarfik Sermeq ukiumut marlunnik killeqartitsivoq: marsip aallaqqaataani aammalu oktobarip aallaqqaataani. Qinnuteqarnermi killigitinneqartut allatut iliuuseqarfigisinnaanngilavut.
Qinnuteqaat sunik imaqassava?
Qinnuteqaammiipput qinnuteqarnermi immersugassaq quppernerup naqqaniittoq. Qinnuteqartup akisussaaffigalugu isumagissavaa, qinnuteqaat paasissutissanik pisariaqartunik imaqassasoq imaattunillu ilanngussiffiussasoq:
• Sukumiisumik suliniummik nassuiaat
• Suliniummut missingersuutit assilinerat
• Attaveqaqatigiinnissamut pilersaarut, suliniutip/suliassap innuttaasunut qanoq apuunneqarnissaanik takussutissiisoq
MALUGALUGU: Taperneqassagaanni piumasaqaataavoq, nittarsaassinermi atortuni ersarissarneqassasoq, Komuneqarfik Sermersuumi Aningaasaateqarfik Sermeq tapiissuteqarsimasoq.
Aningaasaqarneq
Aningaasaliissutit ukiumut 2,5 mio kr-nik aningaasartaqartinneqartarput. Aningaasaliissutigineqartut qinnuteqartitsinerni marluusuni assigiimmik agguataarneqarnissaat ataqqineqarpoq.
Qinnuteqaat kikkunnit nalilersorneqassavan?
Aningaasaateqarfik Sermeq-mut qinnuteqaatit Kulturitta siuarsarneqarnissaa pillugu Siunnersuisoqatigiit suliarisarpaat. Kulturitta siuarsarneqarnissaa pillugu Siunnersuisoqatigiinni ilaasortat ikinnerpaamik sisamat najuunnerini Siunnersuisoqatigiit aalajangiisarput.
Ilaasortat qinnuteqaammut attuumassuteqartillugit, qinnuteqaatit aalajangiinissami allatut ingerlanneqassapput, tamatumani aalajangiisinnaaneq tunngavigineqassalluni.
Qanoq ilinerani akineqassavit?
Ilimagissavat qinnuteqaativit suliarineqarnerata tiguneqarneraniit sapaatip akunneri ikinnerpaamik tallimat qaangiuppata aatsaat piareerneqarluni akineqarsinnaammat.
Nalinginnaasumik makkua tapiiffigineqarneq ajorput:
• ingerlatanut qinnuteqaammik nassiussinnginnermi pisunut
• paasisassarsiorluni angalanernut
• atuakkanik, kataloginik allanillu allakkatigut saqqummersitanik saqqummersitsinernut
• ataatsimiinnernut, oqalugiarnermillu ingerlatsinernut
• nipilersukkanik saqqummersitsineq*
• pilersitsinermut aningaasartuutinut
• ilassinninnermut aningaasartuutinut soorlu ass. nerisassanut, imigassanut assigisaanullu
*Suliap inerneranik saqqummersitsinermut pinnani suliap imarisaanik pitsanngorsaanissamut sulinissamut aningaasaliissutinik tapiissuteqartoqarsinnaavoq. Aammattaaq inerisaanermut atatillugu innuttaasunik peqataatitsinissamut tapiissuteqartoqarsinnaavoq (soorlu meeqqat inuusuttullu ikiuunnerisigut).
Nalunaaruteqarnissaq/naatsorsuutit
Ima pisoqarsimappat tapiissutisiarisimasatit tamakkiisumik naafferarlugilluunniit utertissavatit:
• sinneqartooruteqarputit imaluunniit
• aningaasat siunertamut atorsimanngikkukkit imaluunniit suliniummi piffissaliunneqartoq qaangerneqarsimappat
150.000 kr.-it sinnerlugit tapiissutisisoqarpat kukkunersiuisumik nalunaarsorsimasumik atuisoqassaaq.
Qinnuteqarnermi immersugassaq
Qinnuteqarfissamut immersungassaq uani aasinnaavat, aammalu suliniummut qinnutigisamut aningaasartuutinut takussutissamik immersugassaq immersorneqareerpata allakkatigut Kommuneqarfik Sermersooq-mut nassiunneqassapput imaluunniit e-mailimut uunga sermeq@sermersooq.gl
Nittartakkat
Illoqarfiit pingaarnersaat pillugu pilersaarut